¹ Biska ngoiyo ona jireni an geɗobu, biska si sara bolo ngu tuge tilini aka rutanii disa bu. ² Ngoi yo'to onkok jire ka haɗa le e miya, me ngoi yo yobi andi geɗo bume kaba ei tok kari. ³ Ngoi na a hag shenti el shida emiya si ɓok ngoiyo a hagshe bu. Me ngoi na a hag shen le emiya bu si moi leihi ngoiyo hagshentibu. Kika Ndeyi biskini. ⁴ Koi ko lo, ko ina sharya ka ngarui yo'to? Wom yo boti abano na si erai na si gete. Me erta si kika bomu abano iko si ɗo eri. ⁵ Ngoi yo'to a namshe ka hosi yo'to wallikok yo'to.yo'to me shafsu moɗi ngemani. eri ɗo le ngoi yiya ɗaf bo tilini. ⁶ Ngoi na a namshe ka hosi to'to, a namshe ki ka bomu abano ngoi na a tishe atishe kika bomu abano kika a kunanik Ndeyi. ⁷ An ngoi a ɗeya bo kanni bu,ke andi ngoi a mata guda kanni bu. ⁸ Me le mu anandi zau,mu ɗeino bomu abano. Meke na mu matamu, mu matanko ka bomu abano. Me namu ina zau namu matai,muyo bomu abano. ⁹ Kika a Kiristi matko henɗe ki zau harkaiso, kika si ɗeyinni boti ana mato ki zau. ¹⁰ Me koi, kika miya ko ishe sharyak yagenenko? Ko me, kika miya ko ɓokshe yagenenko? Me ko manoti shafmu mu ɗeno gesa sharyak Ndeyi ¹¹ Ke tureno, "Ni kantino," ankoi bomu abano, "Le burui yiya a ngune domno, le linsoi yiya akunnak Ndeyi." ¹² Le ngoi yiya a ana eiyo si iko guda kanni a dom Ndeyi. ¹³ Kika ka a mu idi sharya ka sha e'mubu, mu e'ka a, ke yo'to ɗeyi billa ngete zaf'i. ¹⁴ Nen manoti tintilno ki bomu yeso, andi ai bunobu guda kanni.kaba na ko na ngoi namko ta bu'unobu a gemani ke bu'unobu. ¹⁵ Me na aka wo'to yagenenko yabta tili,ngu marshe tong ndaltubu. ko rugze ngoiyo Kiristi matko kanni bu. ¹⁶ Kika ka'a eiyo ko namko ta zina a zof algi hufli. ¹⁷ A tong ban mene Ndeyi andi eni tishi ki sesha bu,me kaba tili moɗi, ɗeino lahiya,ki kuyu a tong Kelui Bu'uno. ¹⁸ Ngoi na a ɗafshe Kiristi ki bille woiye biskeno gema Ndeyi ke biskeno gem biya. ¹⁹ Eri ɗo mu moktu et ɗeino lahiya ki eiyo a hafta geɗo le ngoi yiya. ²⁰ Me ko rukze ruta Ndeyi kika wo'oto bu. le e miya bu'uno, me ei disa gema ngoiyo a zoha yo'to ngete ka ei si tishe. ²¹ Iko zina ko had luh bu, ko se mishi bu, ki eiyo yagenneko namanko si liha. ²² Shida ona jirei yo ko andi, zisi tintilko ki Ndeyi. barka ka ngoiyo onshe lehi kanni bu aka eiyo si onko jire kanni. ²³ Ngoi na tilini wowona, me na tuko,kika andi onako jire bu ɗeyinni zunhu.