¹ Ki bei somboɗi ɗo Yeso takatko enini, ki majirakuni, ² Ngu manankoti ki bei somboɗi bolo tishi telshu isno, a ontik Lah Ngo a lonkini bo shoho." ³ Me malumshe nekshi ki koknaku biya a daha zuk zehe a bo duɓanak malum yo na'ako yo a esha si Kayafa. ⁴ Nzuni ngarako bonsu ka Yeso nami dugini ⁵ Nzuni ka anshe, a hosi biki bu, ɗo washi a hele bu a hotok biya." ⁶ Ɗo Yeso batanya aban simon a wale, ⁷ ɗo si be'i tishi mandus so'oto so an ula mor dino gemani, nami kasnitik morye akanni. ⁸ me majirakuni moyanko, ka 'a zuni yabtankok tili a anita, "Kausoi woi miya ka ai ye? ⁹ A bo'ta a oyu tim nami on oyunik ana mure.'' ¹⁰ Me Yeso, manotik woiye 'e, ansu ta, kika miya ngu yabta tili mandu wanse? Te ino ei zina. ¹¹ Ngu anandi ana mure lei tomiya gemaku, me ngu anandi ne'e lei tomiya bu. ¹² Kika te gomko mor a zugono, te iko a matonno ki mala ne'e. ¹³ Ki jire nen angkuti, lei tiya tong dunya shafto, eiyo mandu wonse iko a ina eninto a tunga te." ¹⁴ Moɗik hotok dirbolo, suni Yahuda iskariyoti, ¹⁵ Na ansu ta, ngu ona mono nan onku si? nzuni anita dinar bi kunu. ¹⁶ Tinki hotini dafko billei tili ni a onini. ¹⁷ Kauso a hosis tono a hotik sinakir gelle majirakuni ndano gem Yeso ani ta, "mu ramteko tiya beiyo ko tina wo'oto talshu?" ¹⁸ Si anita, nda ga ngoiyo'to a tong gebani ngu ani ta, malum angko ta, "sombodino itito nem. A banotko nen tina wo'oto talshu ki majirakuno.''''' ¹⁹ Majirakuni 'yanko kit shida yo Yeso ansu, zuni ramte tishi talshu. ²⁰ Ɗo zoni iko,ɗeko tishi ki majirakuni. ²¹ Ɗo nzuni katok tishe, si angko ta, ki jire nen anshenku moɗik hototku a onino." ²² Nzuni kasu bo'inni, lei ngoiyiya hante dola kanni, ne'e da, bomu abano?" ²³ Si lafsu ta," ngoi yo zofko sarani tong shoko modi ki ne'e a ona ne'ei si ²⁴ Lah ngo gonni kit shida yo turanko a kanni. Me titikut ngo woiye yo ki saranni a ona lah ngo! ka wallitko na le'yanko si bu." ²⁵ Yahuda, yo gonni ona si a anita "ne'e ɗo malum?" ani ta, "ko angko guda katko." ²⁶ Ɗo nzuni zuk tishi, Yeso namko sinakir, zofko barka, nami dakhe. A onik majirakuni anita, "biskai, haɗai. Woi zugo." ²⁷ Si nam ko garwale a e kunani, a onsu a anita, "sai, shafku. ²⁸ kika woi domno yo ngarako yo kasanko aka biya tim kika a yahe zunhu. ²⁹ Menen angkuti, nen sadi ki hawonni bu, jo kaba hotiyo nen sena ki nguni a tong ban mene Bono." ³⁰ Ɗo olanko arko zuni gosu ka gosho zaitun. ³¹ Nami Yeso ansu ta, shafku ngu ngatakku no a tong beɗi woi ki bone'e, kika turanko, 'nen roktik a deita temkai biris a laktisu.' ³² Me bei henɗano, nen gonno Galili ni keyanku." ²⁰ To nakkok a mene ki koknaku nzukok hankalik algi ɗo dol Barnabbas me duktik kristi, ²¹ A menei dolko nzuni, "A tong bolo yiya ngu dalanko ne ɗeiku si?" zuni ta "Barnabbas." ²² Bilatus ansu ta "Ne ina lolo ki Yeso yongu esha si Kiristi?" shafsu lahanko ta, "A lonkini." ³⁶ Moishe Yeso nduko ki nzuni a be'i yoto a esha ta Gastemani nami anik majirakuni, ɗeya wonɗe nen gonno ɗonshu wonɗi." ³⁷ Si namko Bitrus ki milla Zabadi bolo gemani si hante tama unuk tilini ki yabtuk tilini. ³⁸ Moishe nami ansu ta, " tilinno yabtinni yam har a mokktik mato. era won ɗe ngu moyi ne'e." ³⁹ Si iko marshe shim, a dom, dukne kani, nami e ɗonshu. si anita, bono, na a itinni, ɗo gerwale woiye geɗannik gemano. shaf kika'a dahabo yono me yoko." ⁴⁰ Si dino ga majirakuni boltu zuni monsom, a anik Bitrus ta, "kika miya ngu jowa moya ne'e bu yo sa'a moɗi? ⁴¹ moyai ngu e ɗonshu kika kada ngu ro tong kabtu bu. kelui zina ndaloti me zugoi an geɗo bu." ⁴² Si nduko yo ka bolo nami e ɗonshu, si angko ta, "bono, na woi ageɗe bukaba nan sa, ei ko ndaloi aitini." ⁴³ Si meno har kauso bolno zuni monsom, kika idansu nda monsom. ⁴⁴ Ɗo de'ego zuni har kauso a hatanni. si iko ɗonshu yo ka kunu a anshe shida eni moɗi. ⁴⁵ Ɗo Yeso dino ga majirakui a ansu ta, "har kauso ngu katok monsom ngu zugonto huti? moyai,sa'a itinni, onanko lah ngo a sarak ana zunhu. ⁴⁶ Hinɗai mu gommu. moyai, ngoi yo onko ne'ei a nem." ⁴⁷ Ɗo si a zugonto eni,Yahuda, moɗi ki tong dirbolo, dino. algi tim ndano ki si ki gema nakok a ruta ban Ndeyi ki koknakuk biya. nzuni ndano ki ho'osho ki zawa. ⁴⁸ Ngoi yo gonni ona Yeso ye isu billai yo zuni mantiti ta woi si a ansuto, " na ngu moyanko nen iko lakɗu ndaltu, ngoiye si. ngaha si." ⁴⁹ Yabta jajum bu dino ga yeso nami anita, "lakɗu,malum!" nami ini lakɗu ndalu. ⁵⁰ Yeso a'nita, bunga eiyo ko dino ishe." moishe nzuni ndano gof Yeso a ngahini. ⁵¹ Moɗi ki hotok biyai a zuk zehe ki si ho'oko dirba a ɓatik kuma aruta ban a na'ako a ruta ban Ndeyi. ⁵² moisheYeso anita, matitik dirba koiye a be'ini, me mamaye shafsu a marshe ki dirɓa me a duga zunii dirɓa. ⁵³ Ɗo ngu anshe ta ne esha bono bu ɗo, me si sarnenna taktakaku wallitik dir bolo? ⁵⁴ Me ta lolo a ngamta eni Ndeyi, woi kaba na hala?" ⁵⁵ A jajum wosi Yeso angkok algita, "ngu ndano ki dirɓa ki ho'osho ki zawa a ngaha ne'e kit ne a shiri? nen ɗeino lei tomiya nen shutu ban Ndeyi, ngu ngahagko ne'e bu. ⁵⁶ Me woi shaf hala ɗo ngamte tureshik nabaku." me shaf ki majirakui wusani gunasu. ⁵⁷ Biyai yo ngahako Yeso ye mokani ga Kayafa nakok a ruta ban Ndeyi, beis anatureshi malumshe ki koknaku daheno zuk zehe. ⁵⁸ Me Bitrus ɗafshe si ki gera a be'i ɗeino a nako rutai ban Ndeyi. si runni gebe ɗeyinni ki ana moya ei ahele. ⁵⁹ Kauso manekshi ana ruta ban Ndeyi ki biyansu shaf a katok moya billai yo zuni ngaha leihik Yeso, nami dugini. ⁶⁰ Zuni wanko leihini bu, shafki ana ona seida rerei akanni. me tnki tono ma'ato ndano gemani ⁶¹ Ananko ta,"ngo woi angko ta si ruazitk ban Ndeyi a salti a tong somboɗi kunu.''' ⁶² A nako a ruta ban Ndeyi hinɗe erko a anita, ko an eiyo ko lahabu ɗo? ei miya zuni a anshe katko?" ⁶³ Me Yeso ye'ete no. a nako a ruta ban Ndeyi a 'a nita, " nen onsheko uhe a tong sun Ndeyi a zau, ansu na ko kristi, lah Ndeyi." ⁶⁴ Yeso lafni ta, ko angko ki katko. Me nen angkoti, kika kauso ko moya lah ngo a ɗeino sara tina mene, isnok tong keɓe ki ɓaɓa." ⁶⁵ Moishe a nako a ruta ban Ndeyi a takra suɓani a anita , " si angko ei disa! kauso ngu ndalanko miya be she saida? moyai, kauso mu ngahani ki ei disa. ⁶⁶ Ngu anankko ta miya aka eiyo si angko?" nzuni lahagko ta, "subak ko dugi ni." ⁶⁷ Nzuni a tubshe ni lei a huskani a ini jibo, a gofshe si ki sara, ⁶⁸ A anita, a mu ei a heleba, ko kristi. ngoiyiya gofko koi?" ⁶⁹ Bitrus me a ɗeino a bo dubno, moishe bad bida a nako dino gemani a anita, "ko zuk zehe ki Yeso a Galili." ⁷⁰ Me si shantikko a domsu shafsu, a ansuta, nen man eiyo ngu eni kanni bu." ⁷¹ Ɗo si dunni bo dubno hena, har kauso bad bidai yoto moiko si a anita biyai yo a wonɗi ta, "ngo wo a zuk zehe ki Yeso a nazaret." ⁷² Moise shantikko har ki Tina ana, "nen man goibu." ⁷³ Nasko shim biyaiyo womɗi ndano anik Bitrus ta, ki jire ko moɗi ki hotosu, kika shida enii yo ko ishe tamko." ⁷⁴ Moi she hanta hubli ki har ki ana, nen man ngoi ," moi she gaje iko kokkoroto. ⁷⁵ Bitrus ɗibko eniyo Yeso angko, " ta ko ina shanak manta ne eka kunu kabu gaja e kokkoroto." moishe hatanni hena hante bele yam.