¹ A kabta mene ban Ndeyi ki milla monde bimmad yo na manko yesi moya billa ɗo ndanko biska ngoi ganni babno. ² Bad ki tintilsu yaknaku kine bad yeme wayeno. ³ mamaye yaknaku ɗo gosu bikik babnos e' wusankok mor yesi moya billansu bei. ⁴ Me mamaye wayeno dansu ki mor yesi moya billei gemansu. ⁵ Kika ngoi gonni babnoi heteno kalou bu, shaf milla monde kolanko monsom nami isu monsom ⁶ Me a tintil beɗi woi eni heteno, 'Moyai, woi a babnoi a hena ndai ngu bolsi.' ⁷ Shaf milla mandei hindanko ki monsom a ramte yesi moya billansu. ⁸ Yaknaku maye anankok ana wayo ta, 'Onamu morku shim kika yesi moya billamu a katok mashento.' ⁹ Me ana wayoi anan ko ta, 'Morye a mene muni ki nguni bu, kika ak,a nda ga ana bo,ita ngu keje yoku.' ¹⁰ ƊO ndansu kacca, ngoi a babno te ɗenni, ramtankok zugonsu ndako ki si a be'i babno, a hatik bo duɓano. ¹¹ Ki bei milla monde ndano a anita, 'Bomu a Bano, bomu abano, e hemuba.' ¹² Me si lafko ani ta, 'Jire ne angkuti, ni man nguni bu.' ¹³ Kika ka,a, ɗeya ki shiri, kika ngu mananko hotini bu ke me ki jajumni. ¹⁴ Kika ka,a ɗeyinni kit hoti nango gonni elis so'to. Si esha bidaceni nami onsutik darani. ¹⁵ An ngo moɗi ki hotosu si oni dinar bad, a yo'oto oni bolo, yokunusui si oni dinar moɗi. Le yiya biska kit yo si njouti, moishe ngoi iko marsheni. ¹⁶ Moɗi yo biska dinar bad ye dunni an bo ido nami e goma har wadi dinar bad aka yo si biska. ¹⁷ Ka,a ke moɗi yo biska dinar bolo wadgo bolo moɗi aka boloi yo si biska ye. ¹⁸ Me bidai yo si biska modi ye nduko ofko wuyo mami bunkiti oyu bobi abano. ¹⁹ Ki bei sombodi tim boti abanok ngaraku maye si meno ndalo nzuni ani billei yo nzuni 'yanko ki oyuiye. ²⁰ Ngarui yo biska dinar bad dino a moktu dinar bad yo'oto a ka yo si biska. si angko ta, 'Bono a Bano, ko ono dinar bad. ne wadgok sauwi bad.' ²¹ Bobi abano ani ta, 'Use ngarui zina ko an jire! ko ishe jire aka ei tim bu.' ²² Bidai biska dinar bolo dino anita, 'Bono abano ko ono dinar bolo, moyi, ni wadgo sauwi bolo kanni.' ²³ Bobi ani ta, 'Use ngarui zina ki ona jire! ko itkok jire a eiyo tim bu. nen zohinko na'ako aka ei tim. i kuyu ki boko abano.' ²⁴ Bidai yo biska dinar moɗi dino ani ta, Bono abano, nen manoti koi ko yam ngo ko zunko beiyo ko iko kahi bu, ko worshe beiyo ko kasko 'ya bu ²⁵ Nen nzuba, kika ka a nen nduko ni bunkit ko dinar ko a tong eli. moyi woi karei ko.' ²⁶ Me bodi abano neiko kahi bu nen daho beis nekaskobu ²⁷ Kika ka a ko onko oyuno hi ana jaribu kanan nemno ne biska oyuno ki riba ki gamen su ²⁸ Kika ka'a hiskatik dinarse ki gemani nami ngu onik ngarui yo an ngarui bimbad. ²⁹ Kika ngoi andi, a sauwdi onsheni - tim. me ngo andi bu, abiskitik eiyo si andi. ³⁰ yaktitik ngarui yo jouwa ina 'ya bu a tong tutuɗu, a ina bele ki ata udo.' ³¹ Hotis na lah ngo shaf ki taktakaku ndano a tong nama kah ki si, a ɗeya ka jakɗa sharya ni. ³² Biya shaf a daha domni, si me a tikiti kit shida yo a de i a tika temka ki gem kibarkinshe. ³³ Si wustik temka a saranni yo tina, barkinshe me aka geɗenni. ³⁴ Ma'i me a anak mamaye yo ka saranni tina,ndati, kika bono onnkuti barka, gyada menei onkote ki katku ki zala dunya. ³⁵ Ɗo ni kolshe kizi ngu onano wo'oto, ni kolshe kizi ham ngu onanoti; nen ngerho ngu mokano tong bano; ³⁶ Zugono sarei ngu zoha notik karei; nen an lahiya bu ngu lak ɗanko ne'e.' ³⁷ Ana rutai zina a laha anita, Bomu abano, tomiya mu moyanko ko kizi mu onanko wo'oto ko tuko? ɗo ko kolshe kizi ham mu onan ko ham? ³⁸ Tomiya mu moyan ko ngyerho, mummoktu ko bano? ɗo zugonko an karei bu mu zohanko karei? ³⁹ Tomiya mu moyanko ko an lahiya bu, ɗo ko ban ron, mu ndano gemanko ⁴⁰ Nami ma'i lahi ansu ta, 'ki jire nen anku ti, eiyo ngu 'yako a modi yo mama'ik ana daha ne'e so wanɗe, ngu 'yakok ne'e.' ⁴¹ Si anak mamaye yo a saranii geɗe, a ansu ta ndatkuk gemano, biyai 'kunzakutik bo, ra tong yesi yo a mache bu yo 'yanko k sinkau ki taktakakuni, ⁴² Kika ne kolshe kizi ngu onano wo'oto bu; nen koshe kizi ham ngu onano ham bu; ⁴³ ni ygerho ngu zohanko ne'e bano bu; zugono sarei ngu zohano karei bu; nen an lahiya bu a ban rono, ngu shalankok ne'e bu.' ⁴⁴ Zuni laha anita, bomu abano, tomiya mu moyanko ko kizi wo'oto ki ham, ɗo ygerho, ɗo ko an karei bu, ɗo ko an lahiya bu ɗo ko ban rono, mu 'yanko ruta bu?' ⁴⁵ Si a lafsu anita, ki jire nen angkuti eiyo ngu 'yakok mama'i moɗi hawosu bu, ngu 'yano bu.' ⁴⁶ Mamaye a rusu tong yesi ana rutai zina me anan zau."