¹ Yeso isu enik sere bo Ngamo jo, ta, ² Menei baba kit 'yak ma'i yo wo'oto tishi be'i babnok laani. ³ Sarko ngarakuni go eshetu biyai aknansu bikik babnos 'e, nzuni me ndano bu. ⁴ Nami jo ma'iy sar ngarakui ma'ato, ta, 'Anak mamayei aknansui 'e, "Moyai, Ne wo'okok wo'otono. Komno ki komshinei akreno shaf ne kakratko, lei miya ke shaf ramtangko. Ndati be'i tishik babnos 'e.'" ⁵ Biyaye me onangko kawa ka eshis bu. Ma'ato ndansu korarensu, ma'ato me ndak-yansu be'i gomansu. ⁶ Ma'atoi ngahangko ngaraku ma'iy, isu jibo dudginsu. ⁷ Ma'i me yabtak tili. Sarko ana kesini, dudgitik ana dugya zau ye 'e, nami boktik gyabanisu. ⁸ Nami anik ngarakuni, 'Ngara babnos ito nem, mamayei wundano nzuniy me ndano bu. ⁹ Kika ka' a nda genga bille ngu eshetu algiy shei nditu be'i ngara babnos 'e.' ¹⁰ Ngarakui haktangko bo bille ngangaletu biyai moyangko, ma zignen ki ma disa. Moishe bi ngara babnos ngamitok algi. ¹¹ Me do ma'iy ndino moi ngerhahiy, moiko ngoi yo'oto yo olno suba ngara babno bu. ¹² Ma'i ani ta, 'Zafno bunga, iko lolok ndino wonde wara suba babno?' Ngoye gitko eni bu. ¹³ Moishe Ma'i angkok ngaraku, 'Ngaratik ngoi woi sarak sheke, olani tong be is uunu, be is a hanta bele ki ata udo.' ¹⁴ Kika eshanko algi shei, me worangko shim." ¹⁵ Farisaku ndangko ngarangko bonsu ka billei a ngafdi Yeso ka enini. ¹⁶ Nami nzuni sarni majirakuni, ki Hiridus. Nzuni anangkok Yeso, "Malum, mu manangkoti kok ngoi a jire. Ko damtak leilo bu, kek tamshe ta woi wallak wom bu hotok algi. ¹⁷ Kauso amu, Konta miya? Suba do on ngalanak Kaisar do suba bu?'" ¹⁸ Yeso me manotik disak tilinsu ansu ta, "Kika miya ngu kabta ne 'e ye, nguni ana tili bolo? ¹⁹ Tamano suba dogdoi 'e." Nami mokinni dinar. ²⁰ yeso ansu, "Sun lo ki suba lo a zug dogdo ye?" ²¹ Nzuni ani ta, "Kaisar." Nami Yeso jo ansu, "Onak Kaisar 'ei suba Kaisar ke ki Ndeyi 'ei suba Ndeyi." ²² Do nzuni kolangkoi, 'yangko monmoni. Nzuni wusanik ndishensu. ²³ A hotinniy Sadukaku ndano gemni, mayei a anshe ta an hinduk mato bu. Nzuni dolangko si, ²⁴ ta, "Malum, Musa angko ta, 'Na ngo matko, an milla bu, yagenani kaba ke mandi a we millak ba'i. ²⁵ An yagenaku babilo. Yo tonoi iko babno nami matinni, wusko milla bu. Wusko manik beinoni. ²⁶ Yo boloi ke iko ka 'a, jo yo kunu, har godi ka yo babilo. ²⁷ Ki beisu shaf, mandus suwato. ²⁸ Kauso hoti hindak mato, te deya man lo hotok yagenaku mayei babilo ye." ²⁹ Yeso me lafko ansu taru, "Ngu bo'yangku, kika ngu manangko eni domana gedok Ndeyi bu. ³⁰ Hoti hindak mato an eni babno bu, an ona babno bu. Kaba dei, shafsu kit 'yak taktakaku tong baba. ³¹ Me ka bille hindak mato, ngu karantangko bu do 'ei Ndeyi angko, a anshe, ³² 'Nen Ndeyik Ibrahim, Ndeyik Ishaku, ki Ndeyik Yakubu'? Ndeyi Ndeyik ana mato bu, me ana zau." ³³ Do dahis kolangko woi, monmoni shaf ngahinsu ka shutantuni. ³⁴ Do Farisaku kolangko ta Yeso zofkok Sadukiyaku ye'ete, ngalangko kasu be'i modi. ³⁵ Modik hotosu, a shana ban sherya, dolko si, a kabta si- ³⁶ Malum, na'akoi yiya tong uhe ye?" ³⁷ Yeso ani, '"Ko ndalte Boko abano Ndeyi shaf ki tilingko, ki kelungko, namik dibnatko shaf.' ³⁸ Woi yo na'ako ke yo tono tong uhe. ³⁹ Uhe yo tono ke kit si-'Ko ndalte a deinotko kit katko.' ⁴⁰ A ka uhe mayei boloi tureshis onzi ki Nabaku onangko gedo kasu." ⁴¹ Farisakui do daheno shafsu be'i modi, Yeso dolko nzuni. ⁴² Si ta, "Nguning anshe miya ka Kiristi? Siy la lo?" Nzuni anani ta, "La Dauda." ⁴³ Yeso ansu, "Iko lololo a tong kelu Dauda wunda si Bono abano, a anshe, ⁴⁴ 'Bono abano angkok Bono abano, "Deyi saras tina, kaba nan zofko ana kudangko elelik shekengko.'"? ⁴⁵ Na Dauda esha Kiristi 'Bono abano,' iko lolo si deyi la Dauda?" ⁴⁶ An ngoi gitko lafsheni eni bu, ke an ngoi sauwidgo dola si bu tingki hotinni.