¹ Do Yeso ki majirakuni ndano nem ki Urushalima ndano Betsaida, ka goshok Sinai, moishe Yeso sarko majiraku bolo, ² ansu ta, "Ndai tong gyabani wonsis, ngu bola koro ngarno wondi, andi lanto. Bidati nzuning mokinno nzuni. ³ Lei ngoi yiya na iku eni ka sui ana ta, 'Bomu abano ndalo,'ngoi wom a wusingku." ⁴ 'Ya woi halai tado ngamte ei Nabi angko. Si angko ta, ⁵ "Anak bad Sihiyona, 'Moyi, ma'inshi isno gemshi, isno bei koro mata kanni 'ya bu, a bei la koro."' ⁶ Moishe majirakui ndangko 'yangko kit shida yo Yeso ansu. ⁷ Nzuni mokano korok lanto, nami kak 'e subansu bei koros 'e, nami Yeso de. ⁸ Sheiki algi shaf kak 'yangko kareisu ka bille, ma'ato dadathano kuma roh a kashe ka bille. ⁹ Algiy ndansu tononni ki mayei a dafshe Siy, a lulula, anshe ta, "Hossana ki la Dauda! Ngoi woi isno tong sun Bomu abanoi an barka. Hossana tong baba!" ¹⁰ Yeso do ndino tong Urushalima, gyabanis shaf erito ka shento a anshe ta, "Woi lo?" ¹¹ Dahis lahangko, "Woi Nabi Yeso, ki Nazaret so Galili." ¹² Nami Yeso ro tong ban donsha Ndeyi. Nduko roktik ana bobo'itu ki kejeshi hawoto. Si tutubitkok tebur ana sabya dogdo ki njagdak ana bo'itanta baraku. ¹³ Si ansu ta, "Tureno, 'Banon no deya ban donshu,' mengu matanto wuyok ana shiri." ¹⁴ Moishe makumshe ki biyai sureno ndano gemni tong ban donshui, ke darantinsu. ¹⁵ Me do Ma'i malumshe ki ana tureshi moyangko 'yak dobos Si ikoi, ke jo kolangko milla lulula tong ban donshu a anshe ta, "Hossana ki lah Dauda,"shafsu yabtangkok tili yam. ¹⁶ Ana ni ta, "Ko kolshentik 'ei algi maye anshe men 'i?" Yeso ansu taru, "Wo'o! Me ngu dambangko karanta bu do, 'Ki tong boh kolgaku ki ana ona yedi namshe ka Ndeyi ye'?" ¹⁷ Moishe Yeso hinda wusinsu gonni Betanya suntu wondi. ¹⁸ Yo babadi si meno gyabanis 'e, a kolshe kizi. ¹⁹ Si moiko roh mormi genga bille. Za ako nemto, me bolko an 'yabu kaba kumo. Si anto ta, "Shi sauwidi le'i bu bolo." Kit hena idok ehento roh mormis ho'ito. ²⁰ Majirakui do moyangko woi, 'yangko monmoni nami ani ta mi, "Iko lolo roh mormi wonses ho'iko kato modi ye?" ²¹ Yeso lafko ansu ta, "Nen anshengku jire, nang anan ona jire ke ngu anan tantama bui, ngu ina 'ei 'yangkok roh woi yak'i bu, me ngu gitik anshek gosho wonses, 'Hindi shi go ngete tong haushi,' ke a itinni. ²² Lei miya na ngu dolshe tong donshu kek ona jirei, ngu biska." ²³ Yeso do ndino tong ban donshu, ma'i malumshe ki koknakui tong algi ndano gemni do a zugonto shutantu nami ani, "Ko ishe shida ruta woi ki gedok lo? Ongko gedo wonses lo?" ²⁴ Yeso lafko nami ansu, "Ne 'e ken dola nguni ka modi. Na ngu ananoti, Ne 'e ken angkutik gedos ne ishendi 'ei maye 'e. ²⁵ Baptismak Yahaya-ndinok tiya, ki baba do ki gem algi?" 'Yangko suska hotosu, "Nam anangko ta, 'Ki baba,' a amu ta, 'Kika miya me 'e ngu onangko jire kanni bu?' ²⁶ Me namu anangko ta, 'Ki gem algi,' mu zubak algi, kika shafsu namangko Yahaya kit Nabi." ²⁷ Moishe lahangkok Yeso ani ta, "Mu manangko bu." Si ke ansu ta, "Ne 'e ken angku gedos ne ishendi ruta woi bu. ²⁸ Me ngu moyangko lolo? Ngoi yo'oto an milla bolo. Nduko gem yo tonoi ani, 'Laano, kutei ndu ruta tong kori.' ²⁹ Lai lafko ani ta, 'Nen go bu,' ki bei me sabyak dibnanni ndunni kori. ³⁰ Ngoye jo nduko gem laani yo boloi a ani kit yo tonoi 'e. Lai woi lafko ani ta, 'Ne go,' sime nduko bu. ³¹ Yo yiya hotok milla mayei iko 'ei bobi ndalo ye?" Nzuni ta, "Yo tonoi 'e." Yeso ansu, "Nen anshengku jire, ana biska ngalana ki kilakaku rusu tong mene Ndeyi kabui nguni. ³² Yahaya ndinok tili modi, nguni meng onangko jire kanni bu, ana ngalana ki kilakaku onangko jire kanni. Nguni ke, na ngu moyangko wom halai, wallabu do ngu tube ngu oni jire. ³³ Gosa kumo ngu kol sere bu Ngamos so'oto. An ngoi yo'oto, an hili kori na'ako. Si kafko koriy 'e, kokrantitkok kannik hara, ofdi bei kasa ham yo shom shom hawonni, saldi be'i moya, nami ontik dogonji ana ra'ashe. Ki ndisheni elis so'oto. ³⁴ Do jajum zungka kori zadinto nem, sarko ngarakuniy ma'ato gem ana rada koriy 'e do we bo hawonni. ³⁵ Ana rada koriy me ngahangko ngarakui 'e jibok yo'oto, dugtik yo'oto, yo'oto jo o'oglangko sik gosho. ³⁶ Har kauso jo, a koriy sarko ngarakui ma'ato, wallangkok ma tonoi a shei, ana marai me 'yansu kit shida yo 'yangkok maye yo tonoi 'e. ³⁷ Ki bei wom, a koriy sarko lani yo kanni gemsu, a anshe ta, 'Nzuni kola kawak lano.' ³⁸ Me do ana marai moyangko laniy, anangko hotosu ta, 'Woi a gyadoi 'e. Ndati, dugga muni mu to gyado.' ³⁹ Moishe namangko si, hodani tong koriy, nami dugini. ⁴⁰ Kauso na aboti koriy ndinoi, a ina lolok ana mara kori ye?" ⁴¹ Nzuni anani taru, "Si dugtik ana mara mami i tong billei disa, nami ontik dogonji koriy ki ana marai ma'ato, biyai a onitik bo hawonni na 'yangko zungko." ⁴² Yeso ansu, "Ngu dambangko karanta tong eni Ndeyi budo, 'Goshos ana sali kudangko deyito zina ka sukana. Woi ki gem Bomu abano, ke inni 'yak monmoni idamu? ⁴³ Kika ka an anshengku, a namtik mene Ndeyi ki gemangku ontik elis an barka. ⁴⁴ Leilo na ngata ka gosho wonses a dathinni deyinni yibrara. Me ngoi na gosho wonses ngata kanniy a matini mukdo." ⁴⁵ Do Ma'i malumshe ki Farisaku kolangko sere bo Ngamo wonses, nzuni moishe ta a eniy a kasu. ⁴⁶ Me lei tamiya na 'yangko kit a ngaha siy, a kolshe zubak dahik algi, kika algiy namangko Siy Nabi.