¹ Majirakui shafsu ndano gem Yeso bo zehe ana ni ta, "Na'akoi lo tong mene Ndeyi?" ² Yeso wunda la lalambai yo'oto gemni, zesi tintilsu, ³ nami ani ta, "Ne anshengku jire, kaba nang tubangko ngu mano kit millai mimi'i, ngu gita rishe tong menei baba bu. ⁴ Ngoina mata kanni kit lai woi, a deya na'ako tong menei babai si. ⁵ Ke lei ngoi yiya na biska lalambai mama'i tong sunoi biska ne 'e. ⁶ Me lei ngoi yiya na zofko modik tong milla mayei onangko jire kanno 'e zunhui, gelko ngarani goshok eso gi'yani, nami olini tong haushi. ⁷ Titikuk dunya kika batimo! Ngafko ta shida 'ya maye nditu, me titikuk ngoi 'ei maye hetetuk eheni! ⁸ Na saratko domana shekengko zofshe koi ngete, batinik yaktini. Wallekotik ro tong zau ki sara modi domana sheke modi, a ka ol koi tong yesi ki sara bolo domana ki sheke bolo. ⁹ Na idangko zofshe koi ngete, ho'oti ko yaktiti. Wallekoti ko ro tong zau ki ido modi, a ka olkoi tongko yesi ki ido bolo. ¹⁰ Kadang bok milla maye bu. Kika a baba Malekakunsu moishe huskak Bono tong baba. ¹¹ Kika Lah ngo ndino gyaze ei bo'inni. ¹² Nguning anshe ta miya? Na yo'oto an temka dalmak, modik hawosu bo'ito, siy a wusa bibonuk-bonui a genga hare go gyazetu so bo'ikos bu? ¹³ Na weno tei, Ne anshengku jire, a ina kuyu ka modis wallitik mayei bibonuk-bonui ma bo'yangko bui 'e. ¹⁴ Ka 'a ke 'e, Bokui tong baba ndalo lei modik tong milla maye bo'i bu. ¹⁵ Na yagenangko iko zunhu, ndui, ani leihinni tintilku yak'i. Na gosko kumani kolingko, ko waltitko yagenangko. ¹⁶ Me si na gosko kumo kol ko bu, gyazi yagena modi domana bolo, kika ki bo ngo bolo domana kunui lei shida eniy yiya ke deyinni. ¹⁷ Na si ku'ukok gosa kumo kol nzuni, ndu an eniy a tong bi donshu. Shaf na ku'ukok kola eni bi donshui, wussi deyinni kit ngoi man Ndeyi bu ki a biska ngalana. ¹⁸ Nen anshengku jire, lei miya na ngu ngarangko tong dunya ngarinni baba. Ke lei miya na ngu bidangko tong dunya bidanni baba. ¹⁹ Shafki ka 'an anshengku, ta na ngo bolo ngarangkok eni tong dunya ka ei nzuni dolangkoi, a itinni gem Bono yo a tong baba. ²⁰ Kika be is biya bolo domana kunu dahangko tong su noi, nen hotosu wondi." ²¹ Moishe Bitrus ndino anik Yeso, "Bomu abano, ka mono yagenano ino leihin yahe si? Ka babilo" ²² Yeso ani ta, "Ne angko ta ka babilo bu, me babilo ka bibabilo. ²³ Kika ka 'ai menei baba iko subak Ma'iy yo'oto yo ongko daranik ngarakuni. ²⁴ Do si deikok nzuni, nzuni mokini ngaruni modi yo a dafshe si fam dalmak ka dalmak. ²⁵ Me tinda si an billai a tuhadi bui, bobi abanoi tado go bo'itini, shafki man'i ki millani shafki karei yo si andi, nami tuhe. ²⁶ Ngaruniy ngata domni, kube domni, nami ani ta, 'Bono abano, i habrik ne 'e, ne tuhekotik lei miya.' ²⁷ Moishe boti abno ngaru wom, jig-yayi ngahini, wusini nami yahenitik gudui 'e. ²⁸ Ngaru wom me hata bol modik ton sha'eni ngaraku, yo a dafshe si dinar dalmak. Kurha si, ngafnitik korkollo, ani ta, 'Tuheno gudu no.' ²⁹ Zaf 'i ngarui ngata domni donshe si, a ansheni, 'I habrik ne 'e, ne tuhekoti.' ³⁰ Ngaru yo tonoi me ku'uti. A bo woi, nduko zohini rono, kaba na tuheni guduni. ³¹ Do sha 'eni ngaraku moyangko 'ei halai, yabtangkok tili. Ndano anangkok bosu abano ei hala shaf. ³² Moishe boti abano ngaru wom esha si, ani ta, 'Koi ngarui a tili bolo, ne yaheko gudui katko shafni kika ko donsha ne'e. ³³ Subak deyik jig-yayi ka zafko ngaru bu, kit shida yon kolko katko?' ³⁴ Bobi abanoi yabtak tili ongko sik ana jibo kaba na si tuha gudui a dafshe si shafni. ³⁵ Ka a ke 'e Bonoi tong baba iku, na ngo yaha yagenanik tong tili bui 'e."