¹ Kabui tishik talshu, jajum yo Yeso manoti ta sommodini ndinni yo gonni hindannik dunya wonses a gonni gem Boti, tinda ndaltitkok ma'i ma tong dunya, ndalta nzuni har tata ka. ² Singkau zofko tong tili Yahuza Iskariyoti la Saminu, do on Yeso. ³ Manoti Boti onitik lei miya tong saranni, ke ndinok gem Ndeyi, jo gonni meshenni gem Ndeyi. ⁴ Hindak be'i tina wo'otoi ho'okok kareini. Nam tawul lubdi kannik si. ⁵ Kasko ham tong kube some bubda sheke majirakuni, a sa'ashensuk tawul yo lubgo kannik si. ⁶ Ndino gem Bitrus Saminu, moishe Bitrus ani ta, "Bono abano, gotko bu'usheno shekeno?" ⁷ Yeso lafko ani ta, "Ei ne ishei ko manta si kauso bu, ki bei me ko mantiti." ⁸ Bitrus ani ta, "Ko damba bu'usheno shekeno bu." Yeso lafni ani ta, "Nan bu'uko bu, ko an bo hawo gemano bu. ⁹ Bitrus ani ta, "Bomu a bano, ko bu'uno shekeno modabi bu me shaf ki saranno ki kanno." ¹⁰ Yeso ani, "Shaf ngoi itkok bina suba sauwidi bu kaba dei bu'uni shekeni, siy me tilini zina shaf; nguning bubdeno, me shafku bu. ¹¹ Kika Yeso manotik ngoi a gonni ona si; ei zofko si anshe ta, "Shafku bu ngu bubdenoi e." ¹² Do Yeso bubde sutik shekensu, namko kareini deyinni, ansu ta, "Ngu manangkotik ei ne ikui do? ¹³ Ngu wunda ne e 'malum' ki 'Bomu abano,' ngu anshei jire, Nen ka a. ¹⁴ Na ne Bomu abano ki Malum, ne bubdeku shekengku, nguni ke subang bubde sheke nzehe. ¹⁵ Gyaro ne tamkuti, ngu e shida yon iku. ¹⁶ Jire, Jire, Ne anshengku, ngaru walla bobi abano bu; do ngoi sarangko si walle ngoi sarko si. ¹⁷ Na ngu manangkotik ei mayei shaf, na ngu 'yangko rutak nzuniy ngu ana barka. ¹⁸ Ne enik katku shafku bu, kika ne manotik mayei ne tamko-men anshe woi do eni Ndeyi ngami: 'Si yo ha'ako sinakirno zohino dom.' ¹⁹ Ne anshengku woi kauso kabui a hele na halai, ngu on jire ta Ne e. ²⁰ Jire, jire, ne anshengku, ngoina biska ngoi ne sarno biskai ne e, ngoina biska ne ei me biska ngoi sarno ne e." ²¹ Yeso do angko woi, damtinni tong kelu, iko sheida angko ta, "Jire, jire, nen anshengku ta modik hawotku gonni ona ne'e." ²² Majirakui mobyangko zehe, a monmoni ka ngoi a eni kanni. ²³ Modik tong majirakuni yo Yeso ndalta si, a bo shkoi e, jineno bo gebak Yeso. ²⁴ Siman Bitrus angkok majirakui ta, "Amu ngoi yiya yo a eni kanni." ²⁵ Moishe sauwidgo jine bo gebak Yeso, ani ta, "Bomu abano lo?" ²⁶ Moishe Yeso lafko, "Woi yo gonno jila sinakir ne oni."Do jilko sinakirse ongkok Yahuza la Siman Iskariyoti. ²⁷ Ki bei sinakirse, singkau ruko hawonni. Nami Yeso ani, "Ei ko nda ishei, i marei." ²⁸ A bo shokoi an ngoi man ei zofko Yeso ani eni woi bu. ²⁹ Ma'ato moishe ta, tinda Yahuza ngafshe batkar dogdo ye, Yeso anita,"Kiji ei mu ndalangko kika tishik talshu, do mek on ei ma'atok ana mure gedo. ³⁰ Yahuza do biska sinakirse, erko bu hatanni; ki bedi me e. ³¹ Do Yahuza ndunni, Yeso ta, "Kauso namangko ka la ngo, ke namangko ka Ndeyi hawonni. ³² Ndeyi namni kanni guda kanni, a namni kanni wara dugya sheke. ³³ Milla mimi'i, ne be'i modik nguni yo sommodi shim. Ngu gyaza ne e kit shida yon angkok Yahudaku, 'Be is ne gonno, ngu gita ndishe bu.'Kauson anshengku ei woi, ke e. ³⁴ Ne onshengku uhei hoyo, ta ngu ndalte zehe, kit shida yon ndalta nguni, nguni ke ngu ndalte zehe. ³⁵ Ki bei ka ai algi mantiti tang majirakuno, na ngu ndalta zehe." ³⁶ Siman Bitrus ani ta, "Bomu abano, gotko tiya?" Yeso lafko, "Be is ne gonno, ngu gita dafshe kauso bu, me ngu dahak bei." ³⁷ Bitrus ani ta, "Bomu abano, kika miya ne gitan dafkoi lei kauso bu? Ne ontik zaunok katko." ³⁸ Yeso lafko, "Ko zatik zaukok kanno? Jire, jire, Nen anshengko, kabui gyaja e kokkiroto ko itik shanak manta ne e ka kunu."