¹ Sommodi ba'shimodi kabui tishik talshu, Yeso ndino Beitanya, be is Lazarus hawoto, yo jugta sik mato. ² Nzuni ramtani tishik talshu wondi, Marta ishensu ruta, Lazarus tong mayei a deinok Yeso be'i tishi. ³ Moishe Maryamu namko tutuba atursas, so zei yam, ha'ata ka sheke Yeso, sa'akok shekei ki som yo kato; banos shaf ngamitok zei ki atursas 'e. ⁴ Yahuza Iskariyoti, modik tong majirakuni, yo a gonni ona si, angko ta, ⁵ "Kika miya bo'itangko atursa wonses a bo dinar dalmak kunu on dogdoi ki ana mure bu?" ⁶ Angko woi kika damtak ana murei bu, me kika si ashiri: batkar dogdoi a gemani a worshe 'ei si ndalok hwaonni. ⁷ Yeso ta, "Wusa te zatkok 'yak mala ne'e. ⁸ Ana mure gemangku lei tamiya, ne 'e men deyak nguni lei tamiya bu. ⁹ Dahik Yahudaku shei kolangko ta Yeso wondi, ndano, kika Yeso bu me do moi Lazarus, yo Yeso jugtak mato. ¹⁰ Ma'inshe malumshe ruta ban Ndeyi ngarangko bo do shaf dugtik Lazarus ke 'e; ¹¹ Kika woi Yahuda ku shei ndangko onangko jire ka Yeso. ¹² Dakarak badi dahik algi she ndano be'i geleshis 'e. Do kolangko ta Yeso isno Urushalima, ¹³ dat-haangko ma dibno ndangko goma Boni ki wundis gedo a anshe ta, "Hossana! A barka ngoi ndino tong sun Bomu abano, Ma'iy Israila." ¹⁴ Yeso bolko la koro, da beini,; kit shida yo turangko, "Shi 'e zuba bu shiy bad Sihiyona; moyi, woi Ma'inshi isno, a deino bei la koro." ¹⁶ Majirakuni mantangko 'ei woi bu yo tono, mek bei nama ka Yeso, moishe dibangko ta turangko ei maye kanni, ke 'yani shida ei maye e. ¹⁷ Dahis a gem Yeso badis wunda Lazarus ki tong bure ke jugtinik mato, onangko sheida. ¹⁸ Kika woi dahis ndano do gomik si kika kolangko ta iko shida ei woi e. ¹⁹ Kika ka a, Yahudaku some eni tintilsu a anshe ta, "Moyi, an ei ngu gita ishe bu; ngu moyangko, dunya shaf dahini." ²⁰ An Helenaku hotok mayei a gosu donshu be'i geleshis 'e. ²¹ Maye ndansu gem Filibus, ngoi Betsaida yo a Galili, anani ta, "Malum, mu ndalangkom moi Yeso. ²² Filibus nduko angkok Andarawus; Andarawus ndukok Filibus, nami anik Yeso. ²³ Yeso lafko anita, "Sommodi ndinto do nam ka la ngo. ²⁴ Jire, jire, Nen anshengku, na ela hai ngata eli matko bui a deya modato, me na matkoi a ona ela shei. ²⁵ Ngoi na nda zauni, a yaklinto, me ngoina nda zauni tong dunya bui a wanto so wuye bu. ²⁶ Na yo'oto ishe no ruta, eri si daf ne'e; ke be is ne hawoto, ngaruno ke a deya wondi. Leilo na isheno ruta, Bono namni ka. ²⁷ Kauso zauno tong damto: Nen ana miya? 'Boti, walti ne'ek tong jajum woiye e'? Mek ka 'ya woiye 'en mokno jajum woiye e. ²⁸ Boti, "Nam ka sungko." Moishe dolya hetenok tong baba a anshe ta, "Ne namko jon sauwidi namshe." ²⁹ Do algiy daheno be is kolangko dolyas, anangko ta 'yangko gillek baba. Ma ato ta, "Maleka iko enik si." ³⁰ Yeso lafko ani ta, "Dolya wonses ndinok kanno bu, me ki katku." ³¹ Kauso a sheryak dunya. Kauso roktik a menei dunya wonses e. ³² Ki beini Ne e, na namanok dunya, ne elletik algi shaf gemano." ³³ Angko woi to tam shida matos a gonni ishe. ³⁴ Dahis lahani, a tong sherya ta Masihu deya wara mato. Lolo mek ana ta, "A hafta la Ngo'? La ngoi woi lo?" ³⁵ Yeso jo ansu ta, "Wondek sommodi shim ngu deyak talku hototku. 'Ya marshe tingki ngu anan talku gemku, tutudu he nguni bu. Ngoi na marshe tong tutudu man be is a gonni bu. ³⁶ Ona jire tingki talkus a gemku kika ngu deyitku milla talku."Yeso angko ei maye ndunnik gemansu bungkitik kannik bonsu. ³⁷ Shafki ruta dobos Yeso iko domsu, shafki ka a onangko jire kannibu ³⁸ do eni Nabi Ishaya ngami, yo angko ta:Bomu abano, ongko jire ka enimui lo? "Sarak Bomu abano hetenok lo?" ³⁹ Kika ei woi onangko jire bu, kika Ishaya jo angko ta, ⁴⁰ "Makmantinsu, tilinsu ho'inni; kika woi nzuni moyik idansu, nami jo mantek tilinsu, nzuni wangletun darante nzuni." ⁴¹ Ishaya angko ei mayei kika si moikok namyak ka Yeso ke iko eni kanni. ⁴² Shafki ka a, shei ki tong koknaku onangko jire ka Yeso, mek ka Yahudaku, nzuni tamangko hili bu kika kada rokinsuk tong ban donashu. ⁴³ Ndalangko nama kas gem algi wallesutik nama ka ki gem Ndeyi. ⁴⁴ yeso iko enik dolyas gedo ta, "Ngoi ongko jire kanno, a onshe jire kanno modano bu me shafki ngoi sarno ne e, ⁴⁵ ke ngoi a moishe ne ei a moishe ngoi sarno ne e. ⁴⁶ Ne ndino deinok talku tong dunya leilo na ongko jire kanno a ina marshe tong tutudu bu. ⁴⁷ Shafki ngoi kolko enino me ongko jire kasu bui, ne ini sherya bu; kika ne ndino, ne e sheryak dunya bu, men wange dunya. ⁴⁸ Ngoi ku'uko ne e ke jo ku'ukok biska enino, an ngoi a ini sherya. Eniy ne angkoi a ini sheryai te hoti badis doshi. ⁴⁹ Kika ne ishe eniy ki kanno bu. Me Boti yo sarno ne e, a onsheno gedo ka ei ne anai. ⁵⁰ ne manoti eniniy zau so an bonto bu; kika ka a ne anshe-kit shida yo Boti angko, ne e ken anshe ka a."