¹ Kauso an ngoi yo'oto suni Lazarus an lahiya bu. Si ngoi Baitanya, gyabanik Maryamu ki ba'anonto Marta. ² Woi Maryamu so a go to ha'ata atursa ka Bomu abano nami sa'atik som yo kato, yo bato Lazarus a golla. ³ Minnoni mondei sarangkok Yeso ta, "Bomu abano, moyi, woi ko ndaloi an lahiya bu." ⁴ Do Yeso kolkoi, angko ta, "Golla woi yo mato bu, me dei yo nama ka Ndeyi, kika la ngo we nama kak be'ito. ⁵ Yeso nda Marta ki ba'anonto ki Lazarus. ⁶ Do kolko ta Lazarus an lahiya bu, Yeso sungko bolo wondi. ⁷ Ki bei woi, angkok majirakui ta, "Erim go Yahudiya jo." ⁸ Majirakui anani ta, "Malum, har kutei Yahudaku gyaza koi ogle kok gosho, me jok nda meshe wondi?" ⁹ Yeso lafko, "A tong goli an jajum bimmad dirbolo budu yo a talku ye? Na ngo iko marshek hoti, guudu goha shekeni bu, kika a moinok be'i talkui dunya wonses 'e. ¹⁰ Shafki ka ka, na ngo iko marshek bedi, guudu goha sik ka be is an talku bu. ¹¹ Angko ei mayei, ki bei maye jo, ansu ta, "Zafmu bunga Lazarus inni monsom, men gonnon go jugte sik monsom." ¹² Moishe majirakui anani ta, " Bomu abano, na monsom ye ai a girbinni." ¹³ Yeso me iko eni matok Lazarus, nzuni me moishe kit a eni ka monsom yo huti. ¹⁴ Nami Yeso isu eni ansu ta, "Lazarus matinni." ¹⁵ Ne kuyuk katku, ka ne wondi bu kika ngu on jire. Eram go gemani." ¹⁶ Toma yo a wunda ta la jonaku, angkok kine majiraku, "Eram go mu mati be'i modik Yeso." ¹⁷ Yeso do tedeno, bolko Lazarus mokok sommodi hodo tong bure. ¹⁸ Baitanya me a nem ki Urushalima, 'marshes so shei bu hotosu. ¹⁹ Yahudaku shei ndano gem Maryamu ki Marta do yase nzuni ka matok yagenansu. ²⁰ Marta do kolko ta Yeso isno, te nduko do bol si, Maryamu me a deino tong bano. ²¹ Marta angkok Yeso, "Bomu abano, kana ko gemamu wonde, kana yagenamu matko bu." ²² Lei kauson manoti lei miya nako donshak gem Ndeyi, a ongko ti. ²³ Yeso anto, "Yagenanshi hindinni." ²⁴ Marta ani, "Ne manoti a hindinni hoti hinda ana mato badis doshi." ²⁵ Yeso anto, Hinda ana matoi Ne e, zau se ke jo Ne e; ngoina ongko jire kanno, lei matko, a hindinni; ²⁶ jo lei a zau yiya, ke ongkok jire kanno, a damba mace bu lei shim. Shi ongkok jire ka woiye e?" ²⁷ Te ani ta, "Wo'o, Bomu abano, ne ongkok jire koi ko Masihu, La Ndeyi, yo isno dunya. ²⁸ Do te angko ka a, moishe te ma nduko wunda darato Maryamu genga. Te ta, "Malum tedenni, ke a wunda shi." ²⁹ Do Maryamu kolko ka a, te hindak roshi nduto gem Yeso. ³⁰ Yeso dongo ruko gyabanis bu me a be is so Marta bolgo si. ³¹ Yahudakui a gem Maryamu, mayei ndano yasa tei, moyangko te hatak banok roshi, moishe nzuni dahangko te, a anshe ta bei a goto ka bure e bele wondi. ³² Maryamu do tedeno be is Yeso hawonni, moishe ngata domni ani ta, "Bomu abano, kana ko wonde, yagenano kana matko bu." ³³ Yeso do moiko te zug bele, Yahudakui ndanok te ke shaf a bebele, moishe kolko jig-yayi tong kelui bu'uno damtinni; ³⁴ Moishe angko ta, "Ngu suntangko si tiya?" Anani ta, "Bomu abano, nditik moyi." ³⁵ Yeso bala. ³⁶ Yahudakui anangko ta, "Moya shida ndatui a ishek Lazarus!" ³⁷ Ma'atonsu me ta, "Ngoi woi budu, yo aha ida makum ye, kana ngatko ba ngoi woi mati bu?" ³⁸ Yeso tong jig-yayi hawonni guda kanni, nduko bo bures e. Bures wuyo hangkok bontok gosho. ³⁹ Moishe Yeso ansu, "Tubatik goshos e." Marta yagena Lazarus yo matkoi, angkok Yeso, "Bomu abano, kauso zugoi dabtinni kika mokok sommodi hodok mato." ⁴⁰ Yeso anto, "Ne anshi budu nenta na shi ongkok jire shi moya namyak ka Ndeyi?" ⁴¹ Moishe tubangko goshos e. Yeso hafta idani ani ta, "Boti, ne kunna kika ko kolshe no." ⁴² Ne manoti ko kolshe ne e lei tamiya, me kika dahi wonses a irno kokrantanoi ne eni woi ye e, kika nzuni on jire tak sarno ne e. ⁴³ Ki bei ana enini woi, hafta dolyak gedo, "Lazarus, hete ti!" ⁴⁴ A matoi heteno; shekeni ki saranni ngagrenok malti malu, huskanni lubnok guzur. Yeso ansu, "Bida si, gonni." ⁴⁵ Sheiki tong Yahudakui ndano gem Maryamu do moyangko ei Yeso iko, onangkok jire kanni; ⁴⁶ ma'atonsu me ndansu gem Farisaku aknansu ei Yeso iko. ⁴⁷ Ma'inshe ana ruta ban Ndeyi ki Farisaku dahangko koknaku be'i modi ani ta, "Mu ina miya? Ngoi woi a ishe 'yak dobo shei. ⁴⁸ Namu wusangko modabi ka ai, algi shaf a ontik jire kanni; Romaku nditu a biskitik elimmu ki biyamu." ⁴⁹ Shafki ka a, modik hawosu, Kefas, yo na'akok malum ruta ban Ndeyi sani wonsi i, ansu, "Nguning managko 'ya bu lei shim. ⁵⁰ Ngu moishe walla bu ngo modi matik ka algi shei, a bo algi shei mati." ⁵¹ Angko woi ki kanni bu, me kika si na'akok malum, angko ei a hele dom ta Yeso mati kusa algi; ⁵² ke jok ka algiy modasu bu, me do dahe milla Ndeyo mayei lakteno tong riya lei tiya be'i modi. ⁵³ Tinki sommoɗi woiye nzuni some barta billei yo a duga Yeso. ⁵⁴ Yeso sauwidgo marshe hotok Yahudaku hili bu, me hinɗa gonni elis so'oto nem ki banai yo'oto riya a nem ki Ifraimu. ɗeiko wonɗik majirakuni. ⁵⁵ Tishik talshu yahudaku into nem, timsu ndansu Urshalima ki elis 'e kika ta bu'utik kasu. ⁵⁶ Shafsu a barta Yeso, a enik zugonsu jajum yo a erno tong ban ɗonshu, ta "Ngu dibnak miya? A nditu tina wo'oto talshui buɗo?" ⁵⁷ Na'akok malumshe ki Farisaku anangko ta shaf be'is na moyangko Yeso nditu ansu kika go ngaftu si.