¹ Ngase a kwiji do baka u yiya birwa, eze shammo nan Ədəshəri ənyimi Aco o hodo Yeso Ukase. ² Ənyimi a hame woro konzen eze nan rərə baka uyiya birwa a wame ənyimi ogwene ugiya se baka ōme ze aze gbau. Woro woze izalla ənyimi itəndəsi se Ədəshəri ŋiza do baka u wushu əji, itəndəsi se woro ra wara me ənyimi agata Ədəshəri. ³ Dan igiya base ne, bata woro konzen i wuza izalla ənyimi makpai a mado. Woro ru se ma kpai ma ra nan umutana. ⁴ Umutana ubursi u gara, konzen ugara bursi itəndəsi iwə əji. ⁵ Itəndəsi igiya ita ra nan udira agata ne, bakase Ədəshəri na kuŋku ti barsa te me ənyimi iruwa e hedo baka Uvunu u Saŋsaŋ, ogome se a nyado. ⁶ Uca ogome se a da lauwo, uca u kima Ukase wənǝ baka ano macara. ⁷ Eze gbau owe wənə baka ono u ma gaŋgaŋ. Irənu a mura owe ono ogome se ma nin barsa mə wənə baka ono u wuma. ⁸ Konzen Ədəshəri wə pərsi ti barsa teme a woro, bakase uca ogeme se woro wa da ano macara yəi, Ukase wənə baka woro. ⁹ Enze, wagiya se woro a kpiji do nan mənyi, woro ara ka ohodo baka mame konzen a zuzi do u cərə əburu Ədəshəri. ¹⁰ Nga, se woro wa da ano bi nyarna, woro a gura do nan Ədəshəri baka uwənə u Vana ome, konzen, amaro se ana gura, woro anin kasa do baka ruma reme. ¹¹ Dan nane base ne, baka konzen woro nin wuza izalla ə Ədəshəri baka Aco odo Yeso Ukase, se bakan me ze woro wa kai u gurna u giya. ¹² Eze, uga nane se baka ono vento macara ma pete a masano, nane me ze uwənə wa pete baka macara. Konzen uwənə wa sarmo a ano kweren, bakase ano kweren ŋa care. ¹³ Da makiri ma kazu ra, macara ma rənu a masano, konzen uyisa macara wətə rənuni baka se makiri mə dəmənu ni. ¹⁴ Magita mə dəmənu ni, uwənə wa kira ano əsuru a Adamu a ka deŋe uca Moses, nan ano ageme se ŋa ta wuza macara uga o worko u Adamu ni, se manze uga mme ono ogeme se manze maze da ma rai. ¹⁵ Ne i ta aze nane, Ənǝwə a ta ze uga oworko ne. Ngase baka o worko owe, ano wa wiju cebete, nane ze ogwene Ədəshəri oze cebete nan u ŋiza baka ogwene ono vento, Yeso Ukase, aza ano cebete. ¹⁶ Baka imu nyaka ita ze uga nane se ǝnǝri ono worko ne. A uyu ulu, u biyǝ nlen ma u ŋuna ano a kura ura wa rai baka o worko Ono vento. Konzen a uyu ulu, u nyaka ǝnəwə i waze baka uka ano wa rài amaro oworkozo cebete. ¹⁷ Ngase, baka o worko Ono vento ze, uwənə ra aza ono me, konzen ano ageme ŋa kai ogwene cebete nan ǝnǝwǝ a ma gaŋgaŋ ma nin kira ano ruma ri ono, Yeso Ukase. ¹⁸ Baka nane, ǝsuru ono vento macara ma pitǝli ano a wame uwǝnǝ, nane ze ǝsuru a riwana ri ono vento ri ono magaŋgaŋ wa rai da ma kai ruma ra ano kweren. ¹⁹ Baka ǝnyimi macara ma ono vento ano udira u tarse me cebete a ŋuna ŋe ano macara, nane ze baka utarse me ono vento ano cebete ŋa ra wuza gaŋgaŋ. ²⁰ Enze makiri ma rai ma pete ma tarse, baka da macara mə vətənu. Konzen ara ageme se macara mana kerne, anze ogwene rai ənu cebete. ²¹ A wuza nane baka, ngase macara ma tarse nan ano ǝnyimi u wǝnǝ, nane ze ogwene ra tarse nan ano ǝnyimi magaŋgaŋ ma ruma ri suŋ ǝznyimi Yeso Ukase Aco o hodo.