¹ Iyaze woro nin buku? Woro nin dutana nan u wuza macara baka da ogwene u vərənu? ² Ko bateke i dama ŋuna ne. Woro se iwə wənə a macara, baka iyaze woro nin kuri cikǝ ənyimmi? ³ Ŋi ta ru nane se ano cebete se a zoro ŋe ənyimi Ukase Yeso a zoro ŋe ənyimi uwənə o home ze ne? ⁴ A wase do, enze, nan me ənyimi o zoro a wame u wənə. A wuza igiya baka uga nane se Ukase a yiza me əsuru ənyimi ano u wənə nan agata a wa Aco, konzen da woro mura i ŋana ǝnyimi isau ruma ruma reme. ⁵ Baka ngase woro gura ate nan me uga ənyimi uwənə ohome, nane ze konzen ara gura ate u yira ohome. ⁶ Woro ru nane, se ono ŋono a gare me nan me, baka da ripuŋ ri macara reme a cuwale. A ŋuna nane baka tago woro kuri cikǝ a re rere ri macara ne. ⁷ Ono ogeme se mǝ wənə ana ŋuna me mə cikə ma gaŋgaŋ nan u dira u tarse macara. ⁸ Konzen ngase woro nǝ wǝnǝ nan Ukase, woro na yiya birwa se woro konzen i ra cikǝ nan me. ⁹ Woro ru se Ukase a yiza me əsuru a ano uwənə, konzen se ma taa da ono uwənə ni. Uwǝnǝ utaa da nan agata aza a hame ne. ¹⁰ Aza uwǝnǝ ogeme se mǝ wənə a macara, mə wənə ka vento baka zale. Nane se eze, ruma regeme se ma ra cikǝ nan no, ma ra cikǝ nan no ə Ədəshəri. ¹¹ Urunu ovento me, ŋŋi konzen kake a ŋi yete nan ate ǝhǝŋi se ŋi enkeze manze a macara, bata nan ruma ə Ədǝshǝri ənyimi Yeso Ukase. ¹² Baka nane tago u deke macara ma kira agata ə ripuŋ ŋa re nane se ŋo da ma tarse iburu ni. ¹³ Tago u nyaka turara ti ripuŋ ŋa re a macara ne, u cikǝ tegogoro ti tuma ti u dira magaŋgaŋ. Konzen nya Ədəshəri rete are, uga nkeze ma geme se maze nan ruma wagiya. Nyaka tidara to ripuŋ ŋa re Ədəshəri uga tommo ti tuma da a wuza magaŋgaŋ nan no. ¹⁴ Tago u gare macara ma nya aza a hai ne. Bakase ŋi ta dada a makiri ni, se ənyimi ogwene. ¹⁵ Iyaze konzen? Woro nin wuza macara bakase idama tarse makiri ni se ogwene? Itan ŋuna nane ne. ¹⁶ Ŋi ta ru se ono ogeme se ŋi na nyaka rete əriji ame ago arere manze ono ogeme se ŋi ra tarse ohome, konzen kake ono ogeme se ŋi nin tarse me ne? Gaŋgaŋ ze, né ŋŋi arere a u wuza macara se a wan nan ono u wənə, né arere ano tarse me a waŋa a ma gaŋgaŋ. ¹⁷ Konzen a goŋ Ədəshəri kukwaŋ! Ŋi wa bura eze arere a macara manze, enze ŋi wa tarse ənyimi iruwa i hiŋi a tarse uruna obezezze se ənyəŋi. ¹⁸ Ŋi na nyaka rǝrǝ geten a macara, konzen ana ŋuna ŋi arere a ma gaŋgaŋ. ¹⁹ In rə bənu uga ono baka u yii ripuŋ ŋa riŋi. Uga nane se ŋo na nyaka turara ti ripuŋ ŋa re uga arere a ano u dira saŋsaŋ nan a ano əburu, nane ze wagiya, nyaka turara ti ripuŋ ŋa riŋi uga a rere a ma gaŋgaŋ baka u visuku. ²⁰ Se ŋi wa da a rere a macara, ŋi waze nan rǝrǝ kərən əsuru a ma gaŋgaŋ. ²¹ A uca ogeme, iyaze se ŋina mura e tegogoro egeme se ŋi ra kunan mme mame wagiya? Emegeme se ira tarse a maro me kweren enze uwənə. ²² Enze wagiya se ana sope rərə əsuru a macara a cikə orere Ədəshəri, ŋo na mura iburi ehe iwu visiku. Nane ze irə cikə u maso me enze ruma ri suŋ. ²³ Baka u nuzi u macara onze uwənə, konzen ənəwə Ədəshəri anze ruma ri suŋ ənyimi Yeso Ukase Aco odo.