¹ Iyaze woro nin buku se Abraham, aco ohodo amaro geten a mura me nan i ripuŋ? ² Ngase Abraham wa mura baka ituma, ma wa nin ze nan emegeme se ma nin buzərə, konzen dan Ədəshəri ni. ³ Iyaze egeme se awa darse nə buku? "Abraham wa gare nan Ədəshəri, konzen a wa bare eme aza a hame ma gaŋgaŋ." ⁴ Wagiya ono ogeme se ma wuza ituma, emegeme se a ra nuzi o home nanno a ta bara uga ənəwə ni. ⁵ Konzen ono ogeme se ma ta wuza ituma ne ken nan nane ma gare nan ono ogeme se ma kwiji iruwa ano macara, uyiya biruwa bǝ me u cikǝ magaŋgaŋ. ⁶ David wa nyaka taye aza ono konzen manze Ədəshəri wa bara magaŋgaŋ aza ahame dan nan ituma ne. ⁷ Maa go, "Taye ti ra aza ano ageme se ana yita macara maŋe, nan ono ageme se ana pate macara maŋe. ⁸ Taye ti ra aza ono ogeme se Aco dan bare macara ma me ne." ⁹ Taye tigiya ə buki aza ano ageme se ətuzu ŋi te shoro ze base, né konzen aza ano u dira utuzu te shoro? Baka woro go, "Uyiya birwa a bare aza Abraham magaŋgaŋ." ¹⁰ Innizi a abara? Uca ogeme se a wara tuzu Abraham oshoro, né ənyimi u dira u tuzu oshoro? Iwa tase ənyimi utuzu oshoro ze ne, iwaze ənyimi udira utuzu oshoro ze. ¹¹ Abraham wa kai ka runa ka utuzu oshoro. Enze waze utəsə magaŋgaŋ ma uyiya birwa se ma ruku umura me se ma da adan tuzi mi ni. Ka runa ka geme se ka yoŋko mə cikə Aco a zale ano ageme se ŋa yiya iruwa, kweren nan ano ageme se a dan tuzi ŋi te shoro ne. Igiya enze ara bara o hoŋe ənyimi ano magaŋgaŋ. ¹² Igiya konzen enze Abraham wa cikǝ Aco ano ageme se a tuzu ŋi te shoro aza ano ageme se dan base utuzu te shoro ne a agura ano ageme se ŋa tarse ti kape ti u yiya birwa ba Aco Abraham bata aa ka zu tuzu ohome oshoro. ¹³ əsə aza Abraham ətunu a biya a hame se mara cikǝ ono u mura u masano i wata ra i tarse uruna Makiri ni konzen i wa tarse uruna u magaŋgaŋ u yiya birwa. ¹⁴ Ngase ano ageme se ŋa ra cikǝ baka makiri ŋanze ə cikə ano u mura, uyiya biruwa dəmənu ni, konzen utəsə mi ənə bishi. ¹⁵ Makiri ma rase nan makpai, konzen ara geme se a damen makiri ni, ogora ano dəmənu ni. ¹⁶ Baka nane eze uyiya birwa benze, ənyimi uruna u wuma se ətəsə inin cikǝ aza ogwene enze a nyaka a bisana bi Abraham—dan baka ano ageme se ŋa ra tarse makiri base ne, konzen baka ano ageme se ŋara wara uyiya birwa bi Abraham. Manze aco a ano ome zale, ¹⁷ uga nane se a darse, "Na ŋunai u cikǝ aco u zale nyaŋa ma cebete." Abraham waze ara me nan me mme ono ogeme se ma gare nan me, manze, Ədəshəri, manze ma ŋiza ruma a ano u wiju konzen ma tisa tegogoro te geme se a ta ruza ne ma ruza. ¹⁸ Taken nan zale u rasa arezekon, Abraham wa gare nan Ədəshəri nan birwa be vento baka əji. Baka nane mə cikə Aco a te pee pee cebete, nane se əwə biyə, "Nane ze bisana be bira bəku." ¹⁹ Uyiya birwa beme wa ta kasho ne. Abraham wa ru se ripuŋ a reme ra a ta date ri nyame abiya ne (baka se maze uga siwai rinu nan oyoo). Ma ru konzen se u nyana ɔyɔɔ u Sarah u wata date u zəki əpuru ni. ²⁰ Konzen baka u buku Ədəshəri, Abraham ma ta meshe magita ənyimi udira uyiya birwa ne. Da i cikǝ nane, a gura me ənyimi uyiya birwa enze ma tuŋare Ədəshəri. ²¹ Birwa beme ba nyame zale emegeme se ŋa təsi nan Ədəshəri, ma date ma mura. ²² Baka nane a bare eme ame magaŋgaŋ manze. ²³ Wagiya a wara darsa base baka rete a reme renze ne, egeme a bare aza a hame. ²⁴ Aa darse eme Konzen baka woro, aza ono ogeme se ara bara me aza a hame, woro ano ageme se ŋa yiya birwa ame Ono ogeme se ma yiza Yeso Aco ohodo ǝsuru ǝnyimi ano wiju. ²⁵ Manze ono ogeme se a nyaka me baka macara mado konzen ma yiza me da ma kwiji do.