¹ Enze iyammo ze ti Jews te ze nan no? Iyaze a mursa u tuzu te shoro? ² Ibare a kuyyu uruna. Ubura me zale, ti Jews teme tenze a nyaŋe u ka ubənu nan Ədəshəri ənyimi tero. ³ Iyaze nga adaŋara ti Jews ŋa ta ze nan u yiya biruwa ne? ⁴ Udira u yiya biruwa beŋe nin ŋuna uyiya biruwa bǝ Ədəshəri nan u dira? Idama cikǝ nane ne. Uga, a ta mura Ədəshəri nan magaŋgaŋ, nane ze kǝvi onon mpore ze. Uga nane se a darse, "Nane se ŋi nin biza se ŋi ano magaŋgaŋ ze ǝnyimi amelo əhəŋi, konzen ara zuzu u huŋi ame ǝtiye u biyǝn nlen." ⁵ Konzen ngase udira magaŋgaŋ a mado ma yonke magaŋgaŋ ma Ədǝshǝri, iyaze woro nin buku? Woro nin guna se Ədəshəri damen magaŋgaŋ ne ngase ma kuŋki u cara əpuru aza ahado? (Min ra wuza isana magita ma ano.) ⁶ Idama cikǝ nane ne! Baka nane inni zi Ədəshəri nin biyǝn nlen ma masano? ⁷ Konzen ngase magaŋgaŋ ma Ədǝshǝri ənyimi u biyǝ empore amaŋ mana ra nan utuŋara o home cebete, baka iyaze azene ada əbiyə o hoŋ nlen uga ono ma macara? ⁸ Ita go, uga nane ze ana biyə empore aza a hado, konzen awe na guna nane me ze woro wa buki ago, "deke a woro wuza iburu, baka da iwuma tu a woro"? Ubiyən nlen ma ano ageme mana cikǝ. ⁹ Iyaze egeme? Arə giŋərə uruna u suru? Dan nane ze ne. Woro na ruku u biyǝ agaŋgaŋ aza ti Jews nan ti Greeks, zale ohoŋe, baka u cikǝ ohoŋe ənyimi macara. ¹⁰ Igiya bakase a darse: "Owe damen magaŋgaŋ ne, ono dǝmǝ nu ni. ¹¹ Owe dǝmǝnu se ma ru ni. Owe dǝmǝnu se ma raa giŋərə Ədəshəri ni. ¹² Ŋa na waŋaro zale. Ŋa na gurna ŋa cikǝ ŋa ta dan iyabo ne. Owe dǝmǝnu se ma wuza iyabo iwuma ne, ono dǝmǝ nu ni, ono vento dəmənu ni. ¹³ Ojojo o hoŋe isau egeme se eze nan u pəni zi. Nlen ŋa maŋe ma zenan ugǝllə. Tekono ti buwa tira nyimi ənu ahaŋe. ¹⁴ Tinu a teŋe tezen ubinja nan betoi nan iruwa i kpai. ¹⁵ Atau ahaŋe ra kira da ŋa kuŋki mənyi. ¹⁶ Uwirtizi nan makpai manze a ti runa ateŋe. ¹⁷ Ano agiya ŋa dəwə RU uruna u cikǝ shammo ne. ¹⁸ Ŋa damen iwi Ədəshəri a ŋe əji ni." ¹⁹ Wagiya woro nə ru se eme geme se makiri mǝnə buku, mərə bənu nan ano ageme se ŋa raa makiri. Igiya nze da ənu əkəvi ŋuna wete, konzen masano kweren ma nin gara nan Ədəshəri. ²⁰ Bakase owe dəmə ənu se ərə zuzu ome baka ituma makiri a me ne. Baka makiri ma me manze ana ru macara. ²¹ Konzen wagiya ken nan makiri ənə ru magaŋgaŋ mə Ədǝshǝri. Aa yisu mame baka makiri nan atuma, ²² se manze, igaŋgaŋ iwə Ədəshəri ənyimi uyiya biruwa a Yeso Ukase a wame a zale ano ageme se ŋana gara nan me. Baka se a geme a dama a zərwə awe ken. ²³ Baka nane zale ano an cara konzen ŋa na dira iwuma Ədəshəri, ²⁴ konzen ŋa na mura rəərə ri uzuzu baka ogwene ome ənyimi ri kasa se a mursa ənyimi Yeso se manze Ukase. ²⁵ Ədəshəri wa nyaka Ukase Yeso uga ənəwə baka u yiya biruwa ənyimi mənyi. Ma nyaka Ukase da mə cikǝ dondon imi obeze anlen ŋa ma me, baka ishammo e heme ze ma nika macara ma geme se a wana wuza. ²⁶ Igiya a wuza zale da əpəni magaŋgaŋ ŋa ma me uca ugiya. Igiya ze waze, ma ta beze rete areme manze, konzen ma beze kəvi baka epe u yiya biruwa a Yeso. ²⁷ Aba ze ubəku ka suru ənu? Ana zuzu eme ənu. Aza iyaze? Epe ituma? Oo, eze aza u yiya biruwa benze. ²⁸ Ana gura aza u guna ono ra mura opete baka u yiya biruwa ken nan ituma i makiri. ²⁹ Nee Ədəshəri mi Ədəshəri a ti Jews te ze base? Mme konzen dan Ədəshəri a ano əpən zi ni? Aa, awa ano əpən zi konzen. ³⁰ Ngase nane ze, Ədəshəri avento ze, mara cuwala u tuzu ti shoro nan u yiya biruwa, konzen utuzu ti shoro ənyimi u yiya biruwa. ³¹ Woro konzen inin deke makiri baka u yiya biruwa? Ko tero teme dan nane ze ne! Nan nane, woro mənti makiri ma mi.