¹ Wajiya woro se izinan agata da irusu-biruwa nan uyii uno yiizi, konzan tago i cika nan ubarsa retaredone. ² Deke a ko-avi runtu onoleke oome biruwa a emegemese eze iwuma, da a yiza me. ³ Bakase onokasa dan barsa retaremene, anane, eze katiti uga naese ana darse, "mantinziza magemese awa tinzaŋi mana kura aza haŋ." ⁴ Bakase zale emegemese a wa darse nan amaro awa darsa makirize baka woro, ananese baka urusu-biruwa nan ubukuuwuma ulan ma ǝdǝshǝri ze woro na mura agata. ⁵ Wala deke ǝdǝshǝri unyaka urusu-birwa nan uvati-biruwa ma nyaŋi u cikǝ shammo nan apun baka onkasa Yesu. ⁶ A imme mawuza ija se da nan ogose vento nan bi vento ŋi tuŋare ǝdǝshǝri konzen. Aco u Aco ohodo Yesu onokasa. ⁷ Bakanan nameze kani apun, nanese onokasa mana kaŋi, baka utuŋara u ǝdǝshǝri. ⁸ Bakase mina buku se onokasa na cikǝ orere u ano Isra ita baka magangan ma ǝdǝshǝri, se da a nǝri-nane meze uyita a-biruwan se ma wa wuna onoaco ohodoze, ⁹ konzen baka aworme da ŋa nya Ədǝshǝri u bare baka ogwene ohome. Eze nane se eze nan udarsa, "Baka nane Mi ra tuŋara ohoi anyimi aworme konzen in tuŋare riji are." ¹⁰ Konzen e go, "Wuza ni izalla, ŋŋi ano əpən, nan ano a haŋe." ¹¹ Nan konzen, "A tuŋara Aco, zale u huŋi ano əpən; deke a ano zale ŋa tuŋare me." ¹² Konzen, Isaiah go, "Aregeme ara ŋuna biciti bi Jesse, konzen ono ogeme se ma nin yira ma woze tegomo Aza ano əpəŋ. Ano əpən ŋa ra ŋuna itəndəsi ənyimi ahame." ¹³ Wagiya Ədəshəri a unyaka itəndəsi a binja ŋi zale nan uruntu birwa nan ishammo baka u yiya birwa, nane se ŋi nin binja nan itəndəsi, baka agata a Uvunu u saŋsaŋ. ¹⁴ Mmi nan rete a ron konzen ana ŋunan in gare nan ŋi, ayeno a haŋ. Ana ŋunan in gare se konzen ŋi nan ate ǝhǝŋi eze nan ubinja nan ribiu ri wuma, ubinja nan kusun isana uru. Mmi na gara se ŋŋi konzen ŋi ru nane se ŋinin piyə ate ǝhǝŋi. ¹⁵ Min ra darsa me a rawa iŋi təndəsi aza udaŋara tegogoro te geme se tina ruku da adunza ŋi konzen, baka ənəwə ageme se Ədəshəri wa nyan. ¹⁶ Ənəwə agiya anze waze Mi nin cikǝ orere o Yeso Ukase utuma u waŋa ano əpən, dan nyaka uga u priest on nlen mə Ədǝshǝri. Nin ŋuna nane baka emegeme se a ra nya ano əpən i cikǝ imu ka, nan u visiku baka Uvunu u Saŋsaŋ. ¹⁷ Imu runtu birwa bon enze ənyimi Yeso Ukase nan ənyimi tegogoro tǝ Ədǝshǝri. ¹⁸ Baka Min dama kuru u buku iyabo ne se eme geme se Ukase wa woze ənyimi a haŋ baka da ano əpən ŋa tarse. Igiya ze te gogoro te geme se a wuza baka ubuku nan uwuza, ¹⁹ baka agata a karuna nan ri diyawo, nan baka agata a Uvunu u Saŋsaŋ. Igiya waze nane baka əsuru a Jeruselem, nan ngase a liŋəru uga a ka deŋe peu a Illyricum, In ta date in zuzi zale nlen mu Ukase. ²⁰ A nane me, ubarsa me ohoŋ onze in wa nin ra yisu nlen ma me, dan a regeme se a ru riji ri Yeso ne, nane se in tan piyə aza bi citi bi ituma be owe ne. ²¹ Eze nane se eze nan udarsa: "Ano ageme se owe wata date u mura ubuki nlen ma me aza ahame ne, konzen ano ageme se ŋa taa kuna ne da ŋa ru." ²² Baka nane Mmi konzen ti puru cebete a tunan u ra iŋi. ²³ Konzen wagiya, in taa da nan udaŋara a riya ulu nnyaŋa ma giya ne, nə shə u yisa me siwai cebete se raa ra iŋi. ²⁴ Uca ogeme se in wame a Spain, Na iya birwa raa nǝrǝ u huŋi a wasa, konzen daa ŋi tome awe ŋa rai ŋa pawon u runa, amaro se naa mura rimǝnti ǝriŋi timuru bate. ²⁵ Bata wagiya min giya a wame a Jeruselem dan ka wuza ano u yiya birwa re rere. ²⁶ Imu runtu birwa ze waze se Macedonia nan Achaia ŋa gursa iyabo da ŋa nya ano tiyan ǝnyimi ano u yiya birwa a Jeruselem. ²⁷ Nane ze, i waze u runtu birwa beŋe, konzen, baka, ŋanze ano u ŋiza o hoŋe. Baka ngase ano ǝpəŋ ŋaze nan e heŋe ǝnyimi tegogoro ti uvunu u saŋsaŋ, ŋa tarse ŋe eme konzen ŋa ŋiza ŋe tommo. ²⁸ Baka nane, Uca ogeme se Min mase ituma igiya nan nane se ana ŋunan dondon me ŋana ka eme geme se a a kai, Min ra waŋ a Spain konzen dan ka nərə ŋi u runa. ²⁹ Min ru nane, uca ogeme se Min rai iŋi Min ra ra ənyimi u binja nan taye te Yeso Ukase. ³⁰ Wagiya Na buki ŋi dondon me, baka Aco ohodo Yeso Ukase, konzen baka ti barsa ti Uvunu, mutana nan mi kima ənyimi be remmo əbiŋi ə Ədəshəri bakan mi. ³¹ Remmo nane se anin zuzun a tare ta ano u dira u tarse me ənyimi Judea, baka da re rere a ron a Jeruselem ri cikǝ imu ka a ano u yiya birwa. ³² Remmo ni nane se nin ra iŋi nan izalla nan u barsa Ədəshəri, nan nane se Mmi nin ra ara avento nan ŋi, dan vonke.