¹ Nda Jesu rhi nbut jirgi/shii am, bhi takah waya khi yil lhi nih. ² Bhi yaghal mu ji khi meh gurrum ndhi kut ndhi mu den nih khikha karam. Ndhi naa shinzeen khi mu, bhi Jesu sat ngwo ndhi kut fe nna, "La nih, ghi nok bwakhat yit ghi si. Shikbis fhik a wu-khikon". ³ Bhi, pak niyen ran mu bis khinarr sut, "Gwo si nih phi tihkok khi sihm Naan". ⁴ Ndhi Jesu man bhizing mu yaghal sat mu nna, "A meh lhi deh gun phi leng leng wubis nbhizung guh dih ye? ⁵ A ndhi neh bess sat eh, 'Shikbis fhik a wu-khikon,' ah lot a, 'Ghi yaghal ghi mwan mwan eh'? ⁶ Dang bhi deh gun gu man ndhi La Gurrum nih khi bal ndhighinyil nphe kon khi shikbis,...." hi yaghal sat ngwo wu-kut fe, "ghi yaghal, ghi mang karram fhik ghi waya lih ghi". ⁷ Gwo wu kut fe yaghal khiting bhi waya lih nih. ⁸ Ndhi du gurum si mu naa bih si, bhi mu ap-poo mu plang Naan ndhi shin bal si ngurum mu. ⁹ Ndhi Jesu nih phi del yar, bhi naa meh gurum ndhi sihm muk a Matiyu, ndhi khi tong phi lih niyen shak wap mu. Bhi sat nnih, "Ghi mwan nder nih." Bhi yaghal khiting bhi mwan nder muk. ¹⁰ Ndhi Jesu yaa pehtong nphe sih-sih ndhighin lih, niyen shak wap mu bwer khi niyen shikbis mu wul mu sih-sih a wukhime khi Jesu khi shar shiit/jep kam khimuk mu. ¹¹ Ndhi Farisiyawa mu naa bhi si, bhi mu sat nshar shiit/njep kam khimuk mu, "A meh lhi deh ngu kam-kam fuk nih phi sih-sih nder niyen shak wap mu khi niyen shikbis mu dih eh? ¹² Ndhi Jesu khiling mhisi, bhi sat nna, "Gurum ndhi mu khi bal nshisut mu khi wal naa ngu shin en ma, khi kot a niyen ndhi mu nkakham ma. ¹³ Gu wak gu bhilhip si gu naa, 'An phi dem naajel, a shin zuhum ma.' Nphe ndhi dok a wul, a nphe yong-peh nniyen ndhi mu a wubang mu deh mu tang kon khi shikbis dih ma, a nphe niyen shikbis mu." ¹⁴ Bhi shar shiit mhi Jon mu wul nder Jesu bhi mu sat mu na, "A meh lhi deh mun khi Farisiyawa mun phi tong khi neen (azumi) bhi shar shiit/jep kam fhik mu phi shin fe ma eh?" ¹⁵ Jesu sat nmu "Niyen shin shiit khi peh bwakatdik mu khi mhilip bhi mu khi ngu lap maat fe kudi nder du ah? Dang bhi bhit fe mu nphe wul ndhi ngu lap mat khi yit mu dih, bhi yaghal mu khi tong khi neen. ¹⁶ Meh gurum khi baam kaal leeh wu poo khi kha leeh wu sighir ma, nphe ndhi kaal leeh fe khi yaghal khi kaa leeh wu sighir fe, bhi shin sighit teh leeh fe. ¹⁷ A si duk, gurum mu khi mak dhik am dwang wu pwo nbut shim mhi yaa am nwu sighir ma. Kat mu shin a si, bhi shim fe mu khi pyaram, yaghal am-wu-dwang fe khi kon, bhi shim fe mu nphe tihkok. Khat a si bhi, mu khi dhik am-dwang wu pwo fe nbut shin wu pwo, bhi duk-duk khi mu khitong dih a si. ¹⁸ Ndhi Jesu nih phi sat bih si nmu, dih bhi, gwo wuyon wul bhi ghim kha nih tal Jesu. Bhi sat nna, "Larep nih muut khidetsi, dang bhi ghi ji ghi lhi sar ghi khikha muk, bhi khi bhirhip. ¹⁹ Bhi Jesu yaghal bhi mwan nder muk, a wukhime khi shar shiit/jep kam khimuk mu. ²⁰ Dih bhi, meh mat shi ndhi thighim phi del nnih nphe yii sar po vhil, ji mwan ndangkong Jesu, bhi bhim phikaa leeh khi muk. ²¹ Nphe ndhi sat nkha-sat nna, "Kat a bhim a leeh khimuk det, bhi a kat khaham." ²² Bhi Jesu villing bhi naa nih, bhi sat nna, "Larep nih, yi lhi tukurkaham; shinzen fii lhi nyi yi khat kaham." Bhi mat fe khat kakham di lala. ²³ Ndhi Jesu wul nlih gwo wuyon fe, bhi kat niyen tah-bel mu khi du gurum mu phi orr. ²⁴ Bhi sat nna, "Gu bwak kamsi, nphe ndhi larep fe muut ma, nih a phi saam." Bhi mu shwar nih mhi tet. ²⁵ Ndhi mu pwat khi du gurum fe mu khibang, bhi del ndhighin-lih bhi ya larep fe nsar, bhi larep fe yaghal. ²⁶ Bhilip pehtaa mhisi yaghal kaat peh duk-duk khi yil fe. ²⁷ Ndhi Jesu yit peh fe, wu vuhuum mu vil mu mwan nder muk. Bhi mu pwat khi orr mu phi sat si na, "Ghi naajel nkha mu, La Dauda (Davit)! ²⁸ Ndhi Jesu wa rhi khipang fe, bhi wu vuhum fe mu ji mu kat nih. Jesu sat nmu, "Gu shin zen ndhi a mak nphe shin bih si ah?" Bhi mu sat nni, "Eh, Nda Naan." ²⁹ Bhi Jesu bhim ass yit mu yaghal sat nna, "Gu khat khaham khipe ndhi zen fuk dem," ³⁰ bhi ass yit mu app. Bhi Jesu sat bhilip nmu bal-bal nna, "Gu tap yak meh gwo man meh bih nkha bhisi ma". ³¹ Dang bhi gurum wu vhil fe mu pwat bhi mu mwan khi bhilip fe khi yil fe duk-duk. ³² Ndhi gurum wu vhil si mu phi yok, bhi, mu ji khi meh phi-bam ndhi nih khi mhikwarkum mu nshi-shin. ³³ Ndhi mu shen mhikwarkum fe mu shin pwat, bhi phi-bam fe lap bhilip. Gurum mu ap-poo bhi mu na, "Mu sham naa nkaan bih si khi yil Israila ma!" ³⁴ Dang bhi Farisiyawa fe mu phi sat nna, "Nih phi shin shiit khi bal long mhikwarkum mu nphe shen mhikwarkum fe mu." ³⁵ Jesu mwan shipe-shipe duk-duk nnar yil fe khi jep yil fe mu. Del thikhim khi kam bhilipnaan ngurum mu nbut lihnaan mu, nih phi sat bhilip mhi yilnaan, yaghal lat khi duk-duk shuwal nshi-shik duk-duk gurum fe mu. ³⁶ Ndhi naa du/khi sher gurum fe mu bhi naaje'el khi mu, nphe ndhi bih mu dam-peh nmu yaghal shi-shik mu zughum. Mu deh khipe tihm ndhi nnot ngu tap nder mu si. ³⁷ Bhi sat nshar shiit fhinih mu na, "Sih nphe diip dih bwer, dang bhi niyen diip fe mu bwer ma. ³⁸ Nphe ndhi a si, gu dang phi Nda Naan mhi diip lala, nphe deh nnih kat niyen shin shiit diip sih fe mu dih.