¹ Ghi nok nah tahkat mhi meh gwo sih yakba mu nah tahkat nmak. ² Npeh yat ndhi ghi naa tahkat mhi mhinak, mu nphe naa tahkat mak a si duk, yaghal bih-kam ndhi ghi kampeh khi nih, mu nphe kam nghi a si duk. ³ A meh lhi deh ghi phi naa laah pirit yang ndhi kih lang nyit emnhighin ghi, dang bhi ghi man peh naa ndhi khi lang nyit ghi ma eh? ⁴ Shinnang ghi sat emnhighin ghi, 'Ghi yit n'an a shang lah fell yang ndhi khi lang nyit ghi' bhi ghill shep fe a nyit ghi eh? ⁵ Ngu tahnaan! Ghi she mang shep ndhi nih nyit ghi shinput dang si, deh she ghi man peh naa peh wuret nphe mang lah yang ndhi khi lang nyit emnhighin ghi dih. ⁶ Ghi nok shin bih ndhi a wubang n' ass mu si, shin ghi nok kon bih wubang fhik nthikhin ass mu si. Kat a si mah, mu nphe trang khi kwak du, yaghal mu villing mu teeh ghi kwetkwet. ⁷ Ghi dang, bhi mu khi shin nghi. Ghi bong bhi ghi khat. Ghi bwap philhi, bhi mu khi epp nghi. ⁸ Nphe duk gwo ndhi taal, bhi khi laap; duk gwo ndhi tang, bhi khi khat; a si gwo ndhi bwap philhi, bhi mukhi epp nnih. ⁹ Kot a weh khinaar gu, khat laah muk taal biredi, bhi khi shin pang nnih yeh? ¹⁰ Kot khat taal nphe sherrep, bhi shin nwoo nnih yeh? ¹¹ Nphe ndhi a si, khat gun ndhi a niyen shikbis gu man peh shin bih khizuhum wuret njep gu mu, bhi shinnang Ndah Naan ndhi nih khithing Naan khi man peh shin bih wuret niyen ndhi mu taal phi muk ma-eh? ¹² Nphe ndhi a si, bhi mu ndhi bhi phi dem gurum mu shin nghi, ghi duk ghi shin mu a si duk, nphe ndhi, ndhisi a waar fe khi niyen jagham mu. ¹³ Ghi del nphilih ndhi duut. Nphe philih wu kaam khi yar wu kaam khi mwan khi ghi khi peh mhi tihkok, shi gurum mu bwer mu phi pet a wunni fe. ¹⁴ Philih ndhi duut khi yarkam ndhi lahpoo, a mu a khi mwan khi ghi npehtong wuret, yakhal a gurum mu bwer ma phi khat wuni fe. ¹⁵ Gu tap niyen lep dung mu, ndhi mu khi wul nnder gu nbut leeh piya khipeh shim tihm si, dang bhi mu a niyen ndhi mu khi teeh gurum khipe ass dem mu si. ¹⁶ Khi kop bih ndhi mu shin det bhi ghi man mu. Gurum mu khi man peh khat lah tihng mwoos-bul dem ndhi khi ihrr ah kot a lah kwoon nbut tihng ndhi si phi lah bhit a pel det eh. ¹⁷ Shin a si duk, dukduk meh tihng wuret khi lah a lah tihng wuret, dang bhi tihng wu baan khi lah a lah tihng wu baan. ¹⁸ Tihng wuret khi mak nphe lalah wubis ma, ma bhi meh tihng wu baan khi mak nphe lalah wuret ma. ¹⁹ Tihng ndhi khi mak nphe lalah wuret ma bhi mu khi gap nih mu kon si nbut wus. ²⁰ Nphe ndhi a si bhi, ghi man mu a si shiit-shin khimu. ²¹ Khikot a duk gwo ndhi sat nna, 'Nda Naan, Nda Naan', khi kat peh del khi peh khitingnaan ma, dang bhi khikot a niyen ndhi mu shin shiit wuret mhi Nda Naan ndhi nih khitingnaan. ²² Gurum mu bwer mu nphe sat n'an par nih fe, 'Nda Naan, Nda Naan, gyet mun phi naa-peh khi kha nshim ma, khi sihm ghi bhi mu shen mhikwarkum, bhi shin nsihm ghi bhi mu shin shiit bwer wuret ma ah? ²³ Bhi an Nphe sat ngun khi yit, 'A sham man gun ma! Gu bwk nder nih, niyen shin shikbis mu!' ²⁴ Nphe ndhi a si, meh gwo ndhi khiling bhilip fhin yakhal shin shiit khi nih bhi kot nih a khipe gwo ndhi sen dhik lih fhinih khi kha pang. ²⁵ Fwan sam khi kha fe, am puut, kokhom del shin bwap lih fe, dang bhi lih fe put-tah ma, nphe ndhi mu dhik nih a khi kha pang. ²⁶ Dang bhi meh gwo ndhi khiling bhilip fhin yakhal niyang shin shiit khi nih bhi khi deh a khipe gwo ndhi a wu-yokkor ndhi dhik lih fhinih khi kha eess. ²⁷ Fwan sam khi l kha fe, bhi put-tah, bhi rhighip pwaah." ²⁸ Yakal khi dangkong ndhi Jesu lat sat bhilip si mu, gurum mu ap- poo khi bih ndhi kam ndun, ²⁹ nphe ndhi kam kam nmu a khipe gwo ndhi nih khi bal, bhi a khipe niyen man ran (magatakarda) khi mu si ma.