¹ Gu tap niyak yak shiit fuk wubang khi ndeh a mhi naa yit ma, deh ngurum mu saam gun dih, nphe ndhi kat a si ma bhi gun nphe kat phishi fe nder Nda gu ndhi khitingnaan ma. ² Nphe ndhi a si kat gu shin zughum, bhi gu nok bhilip fe khibang khibih ndhi niyen taanaan mu phi shin fe nlihnaan shin khi yarkam, deh ngurum mu nahdun mu saam dun dih. Zeen, a sat ngun mu kat phishi fut gwe. ³ Dang bhi kat gun mpe shin zughum, tap yak nsar dakul khi man bih ndhi sar dasih phi shin fe ma, ⁴ deh nzughum fuk kot a wu si-sok dih. Bhi Nda gu ndhi phi naa bih nbiya khi kwat phishi ngun. ⁵ Kat gun nphe dangphinaan, tap yak gu deh khi bih niyen taanaan mu si, nphe ndhi mu phi dem direm nphe dangnaan nlihnaan khi peh kaam deh ngurum mu naa dun dih. Zen a sat ngun, mu kat phishi fut mu gwe. ⁶ Dang bhi gun, kat gun nphe dangphinaan, bhi gu rho ndikin lih. Gu okot phi-lih, gu dang phi Nda gu ndhi phi naa bih mu nbiya. Bhi khi kwat phishi ngun. ⁷ Kat gu dangphinaan, gu nok wet tikyit khibih niyen ndhi mu man Naan ma si, nphe ndhi mu phi naa a khibih ndhi Naan khi kiling ah dang ndhi mu wet shi-pwo feh si zak det. ⁸ Nphe ndhi a si, gu tap yak ba gu ndeh khibih mu si, nphe ndhi Nda gu ndhi kiting man bih ndhi gun phi dem fe deshe gu ep phi gu dih. ⁹ Nphe ndhi a si bhi gu dangphinaan a si: 'Nda mu ndhi khitingnaan mu saam sim ghi. Mang ye sihm ghi kat ret. ¹⁰ Mang ye yil fikh sam. Mang ye no-ok ghi kat del khi dighinyil khibih ndhi khitingnaan si. ¹¹ Ghi shin sih mhi puus shinih nmun. ¹² Ghi kon khi shikbis fun nmun, khibih ndhi mun duk mu kon khi nih nniyen ndhi mu shin shikbis nmun si. ¹³ Ghi nok yit nmun mu yaa khipe ndhi mu khi gwam mun si, gwi lap mun phi gwo wubis.' ¹⁴ Nppe ndhi kat gu kon khi shikbis ndhi gurum mu shin gun, bhi Nda gu ndhi khitingnaan khi kon khi nih ngun. ¹⁵ Dang bhi kat gu kon khi shikbis khimu nmu ma, bhi Nda gu ndhi khitingnaan khi kon khi nih ngun ma duk. ¹⁶ Shin, kat gun phi tong khi ne'en mhi naan, tap-bhi gu dokor kwarap yit gu khibih niyen taanaan mu si, nphe ndhi mu kwarap yit du a nphe deh ngurum mu man ndhi dun phi tong khineen mhi naan dih. Zen a sat ngun, mu kat phishi fut. ¹⁷ Dang bhi gun, kat gun phi tong khinen mhi naan, bhi gu vwang yit gu, gu tikir mor nka gu, ¹⁸ nphe deh nyak gurum mukhi man ndhi gun phi tong khineen mhinaan, wak bhi a nphe Nda gu ndhi phi naa bih nbiya det; yaghal Nda gu ndhi naa nbiya, khi shin phishi fuk ngun. ¹⁹ Tap bhi gu shak bihlong bwer khi dighinyil ma, peh ndhi jugub khi jelleng mu khi tihkok khi nih ma, khi peh ndhi wat mu khi del mu mang ma. ²⁰ Wak bhi, gu shak bihlong fuk gu sok khitingnaan, khi peh ndhi jugub ma bhi njelleng khi yaa ma, shin wat khi mang ma. ²¹ Nphe ndhi peh ndhi bihlong fuk dih, bhi enn/bhizung gu a dih duk. ²² Yit a nih a pehbang khi ghit-shik. Nphe wuni, kat yit ghi a wuret, bhi ghit-shik duk-duk kat peh-bang. ²³ Dang bhi kat yit ghi a wubis, bhi ghit-sak khiding nih nkwoo. Nphe ndhi a si, kat peh-bang ndhi shi-sak biring a kwoo, hai bhi kwoo fe bwer! ²⁴ Meh gurum khi dikyil gurum mu vhil ma, nphe ndhi a tiit bhi khi niyang nmeh yaghal dem wu kwa, ma bhi en muk khi wet nbut nmen bhi bak wu kwa fe. Gu mak dhikyil Naan khi bihlong ma. ²⁵ Nphe wuni bhi a sat ngun, gu nok kat leng nkha seen gu si, khikha bih ndhi gu sih khi bih ndhi gu shu- ma bhi ghit-shik gu, ma bhi bih ndhi gu lep. Nphe ndhi seen ndhi gun khi nih met nsih ma a, shin ghit-shik ndhi gun khi nih met nleh-lep ming ah? ²⁶ Gu naa yer ndhi mu khiting. Mu kop sih ma, mu diip mu phi den ndikin meeh ma, dang bhi Nda gu ndhi kitingnaan nih phi sih khi mu. Gun gurum khi phishi gu met nmu ma ah? ²⁷ A weh nnar gu ndhi kat jar nleng bhi nih khi rikit ndhi khi dhil seen nih shin kam eh? ²⁸ A meh khi den gun khi rikit leh mu ye? Gu shinleng khika ting dem mu nmar, yar ndhi mu phi nan dih. Mu phi meh shiit ma, shin mu phi tan leh ma. ²⁹ Khi ndhi a si bhi a sat ngun, nih Suleiman khi ram fhinih bhi jwal leh khibih mu si ma. ³⁰ Deh kat Naan khi jwal leh ndem nbut mar, ndhi dih shini bhi dhidar bhi fih deh mu dik nwus, bhi shin anang deh khi nim gun gurum nleh dih ye, gun niyen shinzen wu kat? ³¹ Nphe wuni fe tap yak rikit khi ya gun bhi gu si na, 'Mun nphe sih a meh?' ma bhi, 'Mun nphe shu a meh?' ma bhi, 'Mu lep a meh?' ³² Nphe ndhi niyen ndhi mu man Naan ma mu phi bong bih wuni mu, shin Nda fuk ndhi khitingnaan man ndhi gun phi dem mu. ³³ Dang bhi gu she tang a yil khimuk khi shiit wubang khi Naan bhi gu kat gokshi bih fe mu duk-duk. ³⁴ Nphe ndhi a si, tap yak gu leng dhidar, nphe ndhi dhidar khi shin leng nphe khasat. Bhit khime-khime khi wubis fhit mu bwer mhi khasat.