¹ Kǝɗetsǝ bǝ pe saan, duk duk nyen shiitnaan wu nan kǝ nyen nan gurummu ben pǝdu nkaa Jesu ɗe mu tǝ ni ɗi. ² Mu ɓwaghat ni, mu ɗel kǝ ni, yaghal mu shin ni nsar Bilatus long wu yon fe. ³ Ɗi nbǝsǝ bǝ Judas, ndǝ viling yit pit nni, naa ndǝ mu dughun Jesu, tǝwap bǝ yaghal waji shin shaghal silva ya gurum kǝ sar mpe shin nyen shiitnaan wu nan kǝ nyen nan, ⁴ yaghal sǝna, "I shin shikbis mpe ndǝ a viling yit pit nkaa gwo ndǝ sar muk paat." Ɗang bǝ mu sat sǝna, "Wuni fe ame ndermu ye? Gǝ naa kǝ bǝk." ⁵ Det bǝ mu shar shaghal silva ɗi nlǝnaan fe, yaghal mu ɗel, bǝ yaghal ɗel mwan lang shini. ⁶ Nyen shiitnaan wu nan fe mu mang shaghal silva yaghal mu sǝna, "Waar ɗem ndǝ mu kǝ ɗen shaghal sǝ ma, mpe ndǝ a shaghal tǝghǝm." ⁷ Mu twaghat nkaa bǝlǝp bǝ yaghal mu mang shaghal fe seet mar Pota mpe wam mǝzep mu. ⁸ A mpe ndǝ asǝ bǝ mu yong pe fe, "Mar pe tǝghǝm" wa mang ɓit wu shini. ⁹ Bi sǝ ndǝ get Irimiyaa ngu jagham bǝlǝp gam, ndǝ ni pǝ sǝna, "Mu mang silva yagurum kǝ sar, a pyan ndǝ nyen Isra'ila mu ɗen nkaa muk, ¹⁰ yaghal mu shin pe fe mpe ngu fǝl, kǝpe ndǝ Nda kam nnan." ¹¹ Kǝɗetsǝ bǝ Jesu ɗar ntǝghǝm long wu yon, yaghal long wu yon tal shipǝmuk, "A gǝ a miskagham kǝ nyen Yahuda mu a?" Jesu lap nni sǝna, "Gǝ sat asǝ." ¹² Ɗang bǝ nyen naan wu nan kǝ nyen pǝtǝghǝm mu lǝ shipǝmuk, piring me bi ma. ¹³ Det bǝ Bilatus sat nni sǝna, "Kan gǝ kǝlǝng duk duk bi ndǝ mu tǝ lǝ shipǝgǝ ma?" ¹⁴ Ɗang bǝ lap me bǝLǝp ma ko nlaani, mpe ndǝ bi fe ɗe ngu pǝtǝghǝm abi aap po. ¹⁵ Kǝɗetsǝ kǝpe sǝpe bǝ ɗen a mai ɗe ngu pǝtǝghǝm ɓot me gurum kǝme nɓut nyen ndǝ nlǝ kwo ndǝ ɗu gurum fe mu mang mpe ɗe nni ɓot ɗi. ¹⁶ Mu kǝ me ngu kaa ɓal (ɓaghalshik) nlǝ kwo sǝm muk a Barabas. ¹⁷ Ndǝ mu kaat kaa nder sak, Bǝ Bilatus sat nmu sǝna, "Gun pǝ ɗem ɗe nan a ɓot awe ngun ye? Barabas a, kot a Jesu ndǝ mu pǝ yong ni a Kristi ye? ¹⁸ Ni kǝ man ndǝ mu shin Jesu kǝ sar muk a mpe tǝlǝk. ¹⁹ Ndǝ kǝ tong ɗi k pepǝtong ɗyel fe, bǝ mat muk lang lep nni sǝna, "Tabǝ gǝ lep pǝ gǝ nɓut bǝlǝp gwo ndǝ sar muk paat sǝ. Mpe ndǝ a shu jeel ɓwer shini mpe sughun ndǝ a shin nkaa muk." ²⁰ Kǝɗetsǝ bǝ nyen shiitnaan wu nan kǝ nyen nan mu ɗwak ɗu gurummu mpe ɗe mu shang Barabas, yaghal mu tǝ Jesu. ²¹ Ngu pǝtǝghǝm tal shipǝ mu sǝna, "Gun pǝ ɗǝm ɗe nan a ɓot awe nnar gurum vǝl sǝ ngun ye?" Mu sǝna, "Barabas." ²² Bilatus sat nmu sǝna, "An nshin ame kǝ Jesu ndǝ mu pǝ yong ni a Kristi ye?" Duk duk kǝ mu mu lap mu sǝna, "Mu pwas ni nkaa shep." ²³ Bǝ yaghal sat sǝna, A mpe me, shin ame wu bis ndǝne?" Ɗang bǝ mu fwa or kǝ ɓal, "Mu pwas ni." ²⁴ Ndǝ Bilatus naa ndǝ jin kǝ me bi shin nkaa fe ma, ɗe shin gurum mu ya rwang, bǝ mang am, vwang sar ni ntǝghǝm ɗu gurummu, yaghal sat sǝna, "An maan sar nǝ mu paat nkaa tǝghǝm gwo sǝ ndǝ sar muk mu paat. Gu naa buk shikasuk." ²⁵ Gurum fe mu duk duk mu sǝna, Yit ɗe tǝghǝm kǝmuk ɗen nkaa mu kǝ jep fun mu." ²⁶ Det bǝ ɓot Barabas nmu, ɗang bǝ ɓyal Jesu yaghal shin ni kǝ sar mu mpe ɗe mu pwas ni. ²⁷ Bǝ soja kǝ ngupǝtǝghǝm mang Jesu shin waya mpe wu yon yaghal shak soja nkwa mu. ²⁸ Mu taghat le kǝmuk yaghal mu lep le wu naat nni. ²⁹ Mu dak zung kǝ ǝr yaghal mu lep nkaa muk, yaghal mu mang dughul mu shin nsar sǝ kǝmuk. Mu kurum ntǝghǝm muk yaghal mu tet ni, mu pǝ sǝna, "Ho nda, Miskagham Yahudawamu!" ³⁰ Mu bwak zeel nkaa muk, yaghal mu mang dughal(kam) yaghal mu shit ni nkaa yaghal shin mu shit ni nkwa. ³¹ Ndǝ mu tet ni, yaghal mu taghat le ndǝ nshishik muk, yaghal mu lep le nkwa nni, yaghal mu dǝl ni shin kam kǝpe ndǝ mu mpe pwas ni. ³² Ndǝ mu ji mpe pwat, mu kat me ngu yil Cyrene ndǝ sǝm muk a Simon, ndǝ mu lǝ tiit nni mpe ɗe nni mwan nder mu mpe ɗe nni mang pak shep pwas ni fe ɗi. ³³ Mu ji wul mpe ndǝ mu pǝ yong fe a Golgota, ndǝ pǝshi sǝm fe a "Pe es kaa." ³⁴ Mu shin am tǝng ndǝ mu ryep ni kǝ bi wu ɗeet. Ɗang bǝ dǝ sham, bǝ nyang shu fe. ³⁵ Ndǝ mu pwas ni lat, bǝ mu koo le kǝmuk nyarkaam kon peel, ³⁶ yaghal mu twaghat mu tap pǝ muk. ³⁷ Ndap deel shep ndǝ mu pwas ni, fe bǝ mu ran nkaa muk, "Ndǝsǝ a Jesu, miskagham kǝ Yahudawa mu." ³⁸ Mu pwas watmu vǝl awukǝme kǝ ni, nme nsar kul yaghal nkwa nsar sǝ kǝ muk. ³⁹ Nyen ɗel kǝ yar mu fǝlǝp ni, mu pǝ taat kaa du, ⁴⁰ yaghal mu pǝ sǝna, "Gǝ ndǝ mpe rǝghǝp lǝnaan shin ba gǝ dyik nter kun, gǝ bǝrǝp kǝ kasak! Kat gǝ a la Naan a zeen bǝ gǝ sam gǝ taa nkaa shep ndǝ mu pwas gǝ!" ⁴¹ A yar wuni duk bǝ nyen bǝlǝp naan wu nan mu tet ni, awukǝme kǝ nyen man yaghal nyen nan, yaghal mu sǝna, ⁴² "Ni ɓaam gurum nkwa mu, ɗang bǝ mak ɓaam kashin ma. Ni a miskagham Isar'ila. Yiɗi ɗe nni sam taa nkaa shep, yaghal mun mu shin zeen nni. ⁴³ Ni shin zeen nNaan, yid ɗe Naan ɓaam ni kǝɗetsǝ , kat Naan ɗem mpe shang ni. Mpe ndǝ ba sǝna, "An a la Naan." ⁴⁴ Asǝ duk bǝ watmu ndǝ mu pwas mu awukǝme kǝ ni mu lap bǝlǝp duk mu pǝ fǝlǝp ni. ⁴⁵ Kǝɗetsǝ ndǝ waji wul puus kǝnaar bǝ kwo oghot yil kǝdǝng ji wul npuus nkansǝghǝn. ⁴⁶ Ɗi shin ya nkansǝghǝn ɗoghos, Jesu wal kǝ ɗǝghǝl wu yon yaghal sǝna, "Eli, Eli, lama sabachthani?" ndǝ pǝshi ni pǝ kam sǝna, "Naan fǝn, Naan fǝn, a mpe me ɗe gǝ mandersak kǝ an ye?" ⁴⁷ Ndǝ pak gurum ndǝ kǝ ɗyam ɗi mu kǝlǝng bi ndǝ sat , bǝ mu sǝna, "Ni pǝ yongpe a mpe Iliya." ⁴⁸ Ɗi nbǝsǝ wai bǝ nme nɓut mu sǝ nasǝ mwan mang soso, lok(gam) kǝ am tǝng wu ɗwang, ɗen nkaa kam, yaghal shin nni mpe ɗe nni shu ɗi. ⁴⁹ Gokshi fe mu sat sǝna, "Gu yit ni ɗi nmǝshin. Nmun naa kot Iliya mpe ji ɓaam ni." ⁵⁰ Det bǝ Jesu shin wal kǝ ɗǝghǝl wu ɓal yaghal riin(seen) kǝmuk put. ⁵¹ Ɗi nbǝsǝ, laɓule lǝnaan ɓak vel kǝtǝng shin wasam nbǝder, yaghal yil fe sǝghǝn, yaghal pang pyerem. ⁵² Kǝshermu mu ap, yaghal kum gurum mǝ nyennaan ndǝ get mu ɗwam nriin kǝ Naan mu yighil kǝ seen. ⁵³ Mu pwat nkǝsher kǝ dangkong yaghal kǝmuk, mu ryo nnaar yil wu ɓang, yaghal mu nin sut ngurum ɓwer. ⁵⁴ Kǝɗetsǝ ndǝ kǝnshong yaghal nyen ndǝ mu pǝ naa Jesu mu naa sǝghǝn kǝ yil yaghal kǝ bi ndǝ mu taa ɗi, bǝ mu lughut yaghal mu sat sǝna, "A zeen ndǝsǝ a La Naan." ⁵⁵ Shorop ɓwer ndǝ mu mwan nder Jesu yighil nGalili mpe tap kǝ ni mu pǝ naa pe njong. ⁵⁶ Nnaar mu bǝ Maryamu Magdalin, Mary nǝghǝn Jems kǝ Josep, yaghal nǝghǝn jep Zebadi. ⁵⁷ Ndǝ waji wul nkansǝghǝn, bǝ me ngu bilong ngu Arimatiya, sǝm muk a Josep, ndǝ shin ni a shaarshiit kǝ Jesu. ⁵⁸ Ni ji nder Bilatus yaghal ɗang mpe ɗe nmu shin kum Jesu. Det bǝ Bilatus lǝ tiit nmu shin shishik Jesu nni. ⁵⁹ Josep mang (kum)shishik fe, shighǝt ni nɓut le wu ɓang mǝ linen, ⁶⁰ yaghal ɗǝn ni nɗǝghǝn tughun fin ndǝ gap npang. Det bǝ ɓiring pang wu yon ɗǝn pǝlǝ tughun fe yaghal ya yar ɗel. ⁶¹ Meri Makdalin kǝ Meri nkwa mu ɗi, mu kǝ twaghat kus kǝ tughun fe. ⁶² Dǝɗaar fe, ndǝ a puus ndangkong ɓit dakshik, nyen shiitnaan wu nan fe kǝ nyen man mu kaat kasut awukǝme kǝ Bilatus. ⁶³ Mu sǝna, "Nda, mu dye ndǝ ndǝ ngu gwampe ni kǝ seen(nkagham), bǝ sat sǝna, 'Kǝdangkong teer kun bǝ an mpe shin yaghal.' ⁶⁴ Mpe ndǝ asǝ bǝ gǝ lǝ mu ak pǝ tughun fe shin ya nɓit wu kun, kat asǝ ma bǝ shaar shiit kǝmuk mu mpe mak ji yaghal mu wat ni yaghal mu sat ngurum mu sǝna, 'Ni yaghal kǝ seen kǝpe wu ɗwam mu,' yaghal bang wu lat ni mpe bis met wu ndǝ nshe.' ⁶⁵ Bilatus sat nmu sǝna, "Gu mang ngu tap pe. Gu mwan yaghal gu daar tap pe fe a wu ret." ⁶⁶ Asǝ bǝ mu ɗel yaghal mu ak pǝ tughun fe, mu dughur pang yaghal mu ɗen ngu tap pe fe.