¹ Waji wul ndǝ Jesu lat sat sǝm bǝlǝp sǝ mu, bǝ sat nshaarshiit fini mu sǝna, ² "Gu man ndǝ kǝdangkong teer bǝ ɓit takaa (passover) ni pǝ ji, mu mpe shin La Gurum mpe ɗe mu kaa shi shep." ³ Bǝ yaghal nyen shiit naan wu nan mu kǝ nyen nan mu kaat kaa kǝrgǝi nlǝ kop mǝ gu shiit naan wu yon, ndǝ mu pǝ yon sǝm muk a Kaifas (Caiaphas). ⁴ Mu ben pǝ du mpe ya Jesu nɓya yaghal mu tǝ ni. ⁵ Mpe ndǝ mu pǝ sǝna, Ni mpe wakot a par sǝpe ma, yak ba me lyak kǝ nyaghal kǝnaar gurummu." ⁶ Kǝɗetsǝ bǝ ndǝ Jesu ni nBetani nlǝ ndǝ ni a mǝ Simon ngu tǝloghom, ⁷ ni pǝ ya petong kǝpe sǝ, bǝ me mat ji kǝ wang moor ndǝ ni kǝ shaghal a lǝlema, bǝ yaghal pwas moor fe nkaa muk. ⁸ Ɗang bǝ ndǝ shaarshiit kǝ muk mu naa ni, bǝ lǝ tughurnung nmu bǝ yaghal mu sǝna, "A me a pǝshi ndǝ mu kǝ tǝkook kǝ bi asǝ ɗi ye? ⁹ Ye kot mu kǝ seet kǝ ni mpe kat baga shaghal yaghal mu shin nyen jeel/shoor." ¹⁰ Ɗang bǝ Jesu, ni kǝ man kǝ bisǝ, sat nmu sǝna, "A mpe me ɗe gu ɓot pong nmat sǝ ma ye? Mpe ndǝ shin a bi wuret mpe nǝ. ¹¹ Gun tong awukǝme kǝ nyen jeel/shoor shiɓit shiɓit nder gu,ɗang bǝ gun mpe tong shiɓit shiɓit awukǝme kǝ an ma. ¹² Mpe ndǝ ɗǝk moor sǝ nshisan, shin a mpe wum an/fǝn. ¹³ An pǝ sat zeen ngun, pe ndǝ mu mpe sat bǝlǝpnaan sǝ ɗi ndǝghǝn yil duk duk, bǝ mu mpe lap bǝlǝp mpe ɗye kǝ bi ndǝ mat sǝ shin." ¹⁴ Bǝ yaghal nme nɓut wu sar povǝl fe, ndǝ sǝm muk a Judas Iskariot, mwan ya nder nyen shiitnaan wu nan ¹⁵ yaghal sǝna, "Gun mpe shin ame nan kat a shin ni ngun ye?" Mu mang pang shaghal wu yon mǝ silver ya gurum kǝ sar mu shin nni. ¹⁶ Yaghal ɗi nbǝsǝ wai bǝ ya tang yar mpe shin ni kǝsar mu. ¹⁷ Kǝɗetsǝ par ɓit wu she mǝ buroɗi ndǝ nnot wup bǝ shaarshiit mu ji nder Jesu yaghal mu sǝna, "Ge pǝ ɗem ɗye nmum mu ɗak pe sǝ sǝ takaa/passover ngǝ a nne?" ¹⁸ Ni sǝna, "Gu mwan gu ya ndǝghǝn la yil nder me gurum bǝ gu sat nni sǝna, 'Ngukam sǝna, "Ɓit fǝn ji wul gwe nsar. An mpe shin ta kaa/passover kǝ shaarshiit fǝn mu a lǝ gǝ" ¹⁹ Shaarshiit fe mu shin kǝbi ndǝ Jesu lǝ mu mpe shin fe sǝ, yaghal mu ɗak pe sǝ takaa/passover fe. ²⁰ Ndǝ waji wul nkansǝghǝn, bǝ ni tong mpe sǝ sǝ kǝ shaarshiit mu sar povǝl. ²¹ Ndǝ mu pǝ sǝ, bǝ sat nmu sǝna, 'An pǝ sat zeen ngun nme nɓut gu mpe viling yit pit nnan." ²² Mu npǝzung tǝkook, bǝ mu ya tal shi pǝ muk shi kǝme shi kǝme, "A an ma ka, Nda?" ²³ Lap bǝlǝp nmu sǝna, "Gurum ndǝ ni mpe lep sar nɗa awukǝme kǝ an a ni mpe viling yit pit nnan. ²⁴ La Gurum mpe ɗel, kǝbi ndǝ ni ɗi a wu rǝran nkaa muk sǝ. Ɗang bǝ bis ngurum ndǝ a ni mpe viling yit pit nLa Gurum!Ye kot kǝ ret ndǝ mu la gurum wuni ma." ²⁵ Judas, gwo ndǝ a ni mpe viling yit pit nni sat nni sǝna, "A an a, Ngu Kam/Man?" Bǝ sat nni sǝna, "Gǝ sat shi kasak." ²⁶ Ndǝ mu pǝ sǝ, Jesu mang buroɗi, lǝ wuret nkaa fe, yaghal terep. Shin nshaarshiit fini mu yaghal sat nmu sǝna, Gu lap, gu sǝ. Ndǝsǝ a sǝsan.' ²⁷ Mang ɗa shu am/jang shin plang, yaghal shin mu ni pǝ sǝna, "Gu shu, duk duk fuk, ²⁸ Mpe ndǝ ndǝsǝ a tǝghǝm fǝn wu ndǝ awu ɗen mpe kon kǝ shikbis mǝ gurummu ɓwer. ²⁹ Ɗang bǝ A sat ngun, An mpe shin shu nɓut am tǝng sǝ ma, ɗangshe ɓit ndǝA shu ni a wu poo awukǝme kǝ gun lǝ nda nǝ." ³⁰ Kǝdangkong ndǝ mu tam me tam, bǝ mu mwan ya nkaa pang paat/Olives. ³¹ Det bǝ Jesu sat nmu sǝna, "Duk duk fuk mpe rang bwak mpe nǝ nlǝpar wushini, mpe ndǝ a wu rǝran, "An mpe shit ngu tap fe bǝ yaghal bong tǝm fe kǝ rang.' ³² Ɗang bǝ kǝdangkong ndǝ mu yaghal kǝ an kǝ seen, An mpe ta ntǝghǝm gu shin ya nGalili." ³³ Ɗang bǝ Pita sat nni sǝna, "Kat duk duk gokshi gurummu ter bwak mpe gǝ, An mpe ter ba ma." ³⁴ Jesu sat nni sǝna, A sat zeen ngǝ, nlǝpar wushini ɗangshe delkoo tok shik, gǝ mpe viling dangkong nnan yit kun." ³⁵ Pita sat nni sǝna, Kat ba wal a muut awukǝme kǝ gǝ, bǝ an mpe viling dangkong ngǝ ma." Duk gokshi shaarshiit fe mu sat a bi wukǝme. ³⁶ Bǝ yaghal Jesu kǝ shaarshiit fini u ɗel ya nme pe ndǝ mu pǝ yon ni a Getsamani yaghal sat nshaarshiit fini sǝna, "Gu twaghat nbǝsǝ ɗe nnan a ya ɗongsǝ a ɗangnaan ɗi." ³⁷ Ni mang Pita yaghal kǝ jep Zebadi mu vǝl nder shin bǝ yaghal ɗe bi naa jeel kǝ pǝzung tǝkook. ³⁸ Bǝ yaghal sat nmu sǝna, "Seen nǝ a wu tǝkook, mak mpǝ muut. Gu ɗyam yaghal gu ɗen engu awukǝme kǝ an." ³⁹ Pan terkam le, pan kurum yaghal sǝp yit, yaghal ɗangnaan . Sat sǝna, "Nda nǝ, kat kǝ shin, yit ɗe jang sǝ ɗel pǝnǝ ɗi. Ɗang bǝ, a shi naa fǝn ma, yit ɗe a nnaa mak." ⁴⁰ Waji nder shaarshiit fini bǝ kat mu pǝ saam, bǝ yaghal sat nPita sǝna, "Ama, gǝ mak ɗen en kǝ an mpe la pong nlani ma? ⁴¹ Gu tong kǝ en gu yaghal gu ɗang naan yak ba gu taa nɓut shikbis. Riin fe kǝ rǝghǝt ɗakko, ɗang bǝ nanshik ni kǝ muutleet." ⁴² Shin ɗel yit mu nwu vǝl yaghal ɗangnaan. Sat sǝna, "Nda nǝ, kat jang sǝ mpe ɗel ma ɗe ɗen a tiit ɗe nnan a shu ɗi, bǝ yit ɗe ɗen ɗi kǝbi ndǝ gǝ ɗen ɗi sǝ." ⁴³ Shin waji bǝ kat mu pǝ saam, mpe ndǝ yitmu tǝghǝn. ⁴⁴ Asǝ fe bǝ shin yit mu ɗi, kǝbi ndǝ mwan wu nshe kǝ wu vǝl fe sǝ b mwan ɗangnaan wu kun, ni pǝ sat bǝlǝp kǝbi nkwa fe mu. ⁴⁵ Bǝ yaghal Jesu waji nder shaarshiit fini mu, yaghal sat nmu sǝna, "Gu kuɗi pǝ lap nook yaghal kǝ saam a? Gu naa, pong fe waji wulkus, bǝ mu mpe viling yit pit nLa Gurum ɗe nmu shin ni kǝ sar nyen shikbis. ⁴⁶ Gu yighǝl, gun nmun ɗel. Gu naa, gwo ndǝ mpe viling yit pit nnan ji wul kus." ⁴⁷ Kuɗi pǝ lap bǝlǝp fe, Judas, nme nɓut sar po vǝl fe mu, ji. Baga ɗu gurummu ndǝ mu awukǝme kǝ nyen shiit wu nan kǝ nyen man mu kǝ der muk. Mu ji kǝ gwam kǝ nkuur. ⁴⁸ Ni gwo ndǝ mpe viling yit pit nJesu sat sǝm bǝlǝp nmu, ni pǝ sǝna, "Du me gurum/gwo ndǝ a oghom ni, bǝ a ni a gurum/gwo fe. Gu ya ni."ǝǝ ⁴⁹ Ɗi nbǝsǝ det wai bǝ ji nder Jesu bǝ yaghal sǝna, "An pǝ tal, ngu kam" bǝ yaghal oghom ni. ⁵⁰ Jesu sat nni sǝna, "Shaar nǝ, gǝ shin bi ndǝ gǝ wul npe shin fe." Bǝ nyen fe mu ji, nu ɗen sar nkaa Jesu, yaghal mu ya ni. ⁵¹ Det bǝ, nme nɓut nyen ndǝ mu awukǝme kǝ Jesu shin sar ni, shang ngwam, bǝ yaghal shit kwerem kǝ ngu pǝtǝghǝm kǝ nyen shiitnaan, yaghal gap kom muk shin ba. ⁵² Be yaghal Jesu sat nni sǝna, "Gǝ ba kǝ ngwam fǝk shin waya mpe ndǝ gǝ shang ni ɗi, mpe ndǝ nyen ndǝ mu pǝ mang ngwam mu mpe ɗwam a shi ngwam. ⁵³ Gu pǝ leng ndǝ an mpe mak kǝ ndǝ a yongpe shin ya nder Nda nǝ, bǝ ni mpe lep kǝ jep lep met nyak gurum sar po vǝl ma? ⁵⁴ Ɗang bǝ bǝlǝp naan ndǝ ni ɗi a wu rǝran mpe shin ananɗe gam ɗi ye, ndǝ sǝna ni nta asǝ?" ⁵⁵ A npong wuni fe bǝ Jesu sat nɗu gurummu sǝna, "Gu pwat kǝ ngwam kǝ nkuur a mpe ya an kǝbi wat sǝ a? A tong nlǝnaan shi ɓit shi ɓit pǝ kam kam, bǝ yaghal gu ya an ma. ⁵⁶ Bi sǝ fe ta a mpe ɗe ran kǝ nyen jagham gam ɗi." Bǝ sshaarshiit kǝ muk mu yit ni ɗi mu sho. ⁵⁷ Nyen ndǝ mu ya Jesu mu lap ni shin ya nder Kayafas ngunaan wu yon, mpe ndǝ nyen ran kǝ nyen man mu kaat kaa du ɗi. ⁵⁸ Ɗang bǝ Pita mwan kǝ der muk njong shin waya nnaarkom nmǝ ngunaan wu yon. Ni mwan ya ndǝghǝn bǝ yaghal tong awukǝme kǝ nyen tappe ɗe nni naa pe lang kǝ bi ndǝ mpe ta. ⁵⁹ Bǝ yaghal ngunaan wu yon fe kǝ nyen shin kar fini duk duk mu ya tang langtǝng ɗung nkaa Jesu, ɗe mu kat yar mpe tǝ ni ɗi. ⁶⁰ Mu kat me bi ma, kǝ ndǝ langtǝng ɗung mu ɓwer mu pwat mu ji. Ɗang bǝ kǝdangkong bǝ langtǝng vǝl mu ji ntǝghǝm ⁶¹ yaghal mu sǝna, "Gwo sǝ sǝna, 'An nmak rǝghǝp lǝnaan kǝ Naan bǝ yaghal shin a ɗik ni nteer kun.''' ⁶² Ngunaan wuyon fe yaghal ɗar kǝtǝng yaghal sat nni sǝna, "Gǝ kǝ mebi mpe sat ma? Mu pǝ sat a me langtǝng me nkaa gǝ sǝ ye?" ⁶³ Ɗang bǝ Jesu lap bǝlǝp ma. Ngunaan wuyon fe sat nni sǝna, "An pǝ sat ngǝ mpe sǝm kǝ Naan ngu seen, gǝ sat nmun kot gǝ a Kristi, La Naan fe." ⁶⁴ Jesu lap nni sǝna, "Gǝ sat bǝk shikasak. Ɗang A sat ngun, kǝdangkong kǝdetsǝ gun mpe naa La Gurum kǝ tong nsar dasǝ wu ɓal, ni nwaji nka liɓin kǝtǝngnaan." ⁶⁵ Bǝ yaghal ngunaan wuyon fe yilang le fini yaghal sǝna, "Ni lap bǝlǝp tǝkook kǝ sǝm Naan!Ame lǝ ɗe shin mu pǝ wal langtǝng mu ɗi ye? Gu naa, kǝɗǝtsǝ bǝ gu kǝlǝng tǝkook sǝm Naan. ⁶⁶ Gu leng ame?" Mu lap mu sǝna, "Mak kǝ ndǝ mu kǝ tǝ ni." ⁶⁷ Bǝ yaghal mu bwak zeel nyit muk shin mu ɓwap ni, yaghal mu fya laap sar nni, ⁶⁸ yaghal mu sǝna, "Gǝ sat jagham nmun, gǝ Kristi. Awe shit gǝ ye?" ⁶⁹ Pita kǝ tong kǝɓang nnar kom, bǝ me larep ndǝ a kwerem ji nder muk yaghal sǝna, "Tong gǝ awukǝme kǝ Jesu ngu Galili." ⁷⁰ Det bǝ shishik ntǝghǝm mu duk duk, ni pǝ sǝna, "A man bi ndǝ yi pǝ bǝlǝp nkaa fe ma." ⁷¹ Ndǝ put kǝɓang shin waji pǝ yar pǝlǝ, bǝ me larep kwerem nkwa naa ni bǝ sat nyen ndǝ mu ɗi mpe fe nna, "Gwo sǝ ni awukǝme kǝ Jesu ngu Nazaret." ⁷² Shin shishik ba twarshik sǝna, A man gwo fe ma!" ⁷³ Lang ɗi le bǝ nyen ndǝ mu kǝ dyerem ɗi nbǝsǝ mu ji yaghal mu sat nPita, "Ni kǝ me kot kot ma gǝ a nme nɓut mu, mpe dǝghǝl bǝlǝp fek seet kǝ gǝ." ⁷⁴ Det bǝ ya fǝlǝp kǝ twarshik, "A man gwo fe ma," yaghal ɗi nbǝsǝ bǝ deelko tokshik. ⁷⁵ Pita dye sǝm bǝlǝp ndǝ Jesu bǝlǝp sǝna, "Ɗangshe deelko tokshik ɗi bǝ gǝ mpe shishik ndǝ gǝ man an yit kun." Det bǝ put kǝɓang yaghal wal bis bis.