¹ Bǝ yaghal pe mwan ya kǝtǝngnaan mpe ɗe a kǝpa jiraap dwan mu sar ndǝ mu kok dang wus mpe mwan naa mismwar. ² Paat nɓut mu a wu yoghor yaghal paat a wu seen. ³ Mpe ndǝ paat wu yoghor mu ǝr dangwus fut, mu pan moor nder sut ma. ⁴ Ɗang bǝ jiraap dwan wu seen fe ǝr moor awukǝme kǝ dangwus fut mu. ⁵ Kǝdǝtsǝ bǝ ndǝ pan shim nmismwar fe, mu ya ɗik sam ba mu taa nsam. ⁶ Ndǝ ba waji wul nnaar lǝpar det bǝ me or shi pǝ sǝna, 'Gu naa, mismwar fe! Gu pwat gu kaat ni.' ⁷ Det bǝ jiraap dwan fe duk duk mu yighǝl mpe ɗak pǝdang wus fut. ⁸ Jiraap dwan wu yoghor fe mu sat wu seen fe mu sǝna, 'Gu shin pak moor fuk nmun mpe ndǝ dang wus fun mu pǝ ɗwam.' ⁹ Ɗang bǝ wu seen fe mu sǝna, 'Mpe ndǝ moor fe nkye mun kǝ gun ma, wak gu mwan gu ya nder nyen seet kǝ moor ɗe ngun gu seet mpe kasuk.' ¹⁰ Ndǝ mu mwan mpe seet fe, mismwar fe ji, bǝ yaghal nyen ndǝ mu kat mu ɗi ndǝ mu ɗak petong pǝ tap pǝ muk mu ryo awukǝme kǝ mismwar shin ya kǝpe sǝpe ɗik fe, bǝ yaghal mu ɓal pǝlǝ. ¹¹ Kǝdangkong bǝ gokshi jiraap dwan mu wakji duk mu pǝ sǝna, 'Ngule, ngulǝ, gǝ ep pe nmun.' ¹² Ɗang bǝ lap nmu sǝna, 'A sat zeen fe ngun, A man gun ma.' ¹³ Mpe ndǝ asǝ gu twaghat ke ɗak suk, mpe ndǝ gu man ɓit kǝ puus fe ma. ¹⁴ Mpe ndǝ kǝ ɗǝ a kǝpe ndǝ me gurum mpe mwan ya nme yilnkwa, Yong jeptong/kwerem fini yaghal shin bilong fini nmu. ¹⁵ Nɓut mu bǝ shin saghal gǝlong kabo paat, nkwa fe bǝ shin kabo vǝl, bǝ yaghal ngwo wukun fe bǝ shin kabo shaghal gǝlong kabo kǝme. Mu lap shaghal fe npǝ kye kǝ bal futmu, bǝ gwo ndǝ shin shaghal fe ɗel mwan fini. ¹⁶ Gwo ndǝ lap kabo paat fe yaghal lala mwan ya gǝlong kǝ shaghal fe bǝ kat kabo paat. ¹⁷ Asǝ fe duk bǝ gwo ndǝ lap kabo vǝl ka vǝl kǝka fe. ¹⁸ Ɗang bǝ gwo dǝ lap kabo kǝme mang kabo fe ok fung nyil, bǝ yaghal wum shaghal ngulǝ fe. ¹⁹ kǝɗetsǝ ndangkong ndǝ ngulǝ fe mang jep teer mu bǝ wawul bǝ tong kǝ jeptong/kwerem mpe ɗe nni man bi ndǝ mu shin k shaghal fe. ²⁰ Latong/kwerem ndǝ lap kabo paat ji waji kǝ kabo nkwa mu paat, bǝ sat sǝna, 'ngulǝ, dok gǝ shin kabo paat nnan. Gǝ naa, a kat kabo nkwa paat nkaa fe.' ²¹ Ngulǝ kǝmuk sat nni sǝna, 'Ho ngǝ, latong wuret/kwerem wuret ngu zeen! Gǝ nin zeen nkaa bi wu ɗyen. An mpe ɗen gǝ a pǝtǝghǝm nkaa bi mu ɓwer. Gǝ rǝ mpe kǝlǝng shang mǝ ngulǝ fǝk.' ²² Latong/kwerem ndǝ lap kabo vǝl ji bǝ yaghal sǝna, 'Ngulǝ, gǝ shin kabo vǝl nnan, Gǝ naa, a shin gǝlong a kat kabo nkwa mu vǝl .' ²³ Ngulǝ kǝ muk sat ni sǝna, 'Ho ngǝ, latong/kwerem wu ret ngu zeen! Gǝ shin zeen nkaa bi wu ɗyen . An mpe ɗyen gǝ a pǝtǝghǝm nkaa bi ɓwer. Gǝ rǝ mpe kǝlǝng shang mǝ ngulǝ fǝk.' ²⁴ Bǝ yaghal latong/kwerem ndǝ lapkabo kǝme ji bǝ yaghal sǝna, 'Ngulǝ, A man ndǝ gǝ a gurum ndǝ laapo. Gǝ pǝ ɗem ɗiip nmpe ndǝ gǝ kop ma, bǝ yaghal shin gǝ pǝ ɗem ɗiip pe ndǝ gǝ fwa ma. ²⁵ Lughut ya an , mpe wuni fe bǝ a mang shaghal fǝk a mwan a kat pe a wum shaghal fǝk ɗi nyil. Gǝ naa, bi ndǝ a mak kǝ ɗye sǝ.' ²⁶ Bǝ yaghal ngulǝ kǝmuk lap nni sǝna, Gǝ a latong/kwerem wu bis da loghom, gǝman ndǝ an pǝ ɗiip pe ndǝ a kop ma yaghal an pǝ ɗiip pe ndǝ a fwa ma. ²⁷ Kat ye gǝ man ndǝ asǝ bǝ yekot gǝ shin shaghal fǝn nyen ɗen shaghal ɗe mu sok ɗi nnan, ɗe kat a wawul bǝ a lap bǝn kǝ langka ²⁸ Mpe ndǝ asǝ gu lap kabo fe nsar muk yaghal gu shin latong/kwerem ndǝ ni kǝ kabo sar sǝ. ²⁹ Mpe nde asǝ bǝ kat gurum ni kǝ bi ɓwer, bǝ mu shin nkwa nni - kǝ langka ɓwer ɓwer. Ɗang bǝ gwo ndǝ ni kǝ mebi ma, bǝ la ndǝ ni kǝ ni fe mu kǝ ɗwan shin ba. ³⁰ Gu kon latong/kwerem wu bis shin put sǝ nkoo, mpe ndǝ wal ɗi kǝ erep aghas.' ³¹ Kat La Gurum wawul nɓut ram fini awukǝme kǝ jep lep fini, bǝ kǝ tong npepǝtong ram fini npetong long. ³² Mu mpe kaat yilmu duk duk ntǝghǝm muk, ni mpe ɓak kǝnaar tǝmmu kǝ ɨgh. ³³ Ni mpe lǝ tǝmmu nsar sǝ, yaghal lǝ ɨghmu nsar kul. ³⁴ Yaghal Long fe/Miskagham fe nyen ndǝ mu nsar sǝ, 'Gu ji, gun ndǝ a Nda nǝ lǝ wuret ngun, gu kok kop ndǝ mu ɗak ɗen nshe ɓut kur yil ɗi. ³⁵ Mpe ndǝ an nneen bǝ gu shin sǝ nnan; An n'amtǝ bǝ gu shin am nnan; An a mǝzep bǝ gu lap an gu shin lǝ nnan; ³⁶ ngum bǝ yaghal oghot gum nan; An a wu gok bǝ gu ɗar nkaa nǝ; An nlǝkwo bǝ gu ji nder nǝ.' ³⁷ Bǝ nyen ndǝ mu shin zeen mpe lap fe mu sǝna, 'Nda, mu naa gǝ a penan kǝ neen bǝ mu shin sǝ ngǝ ye? kot kǝ amtǝ bǝ yaghal mu shin am ngǝ shu ye? ³⁸ A penan ndǝ mu naa gǝ a mǝzep bǝ mu lap gǝ ye? Kot mu naa gǝ ngum bǝ mu shin le ngǝ? ³⁹ Apenan ndǝ mu naa gǝ a wu gok kot nlǝkoo bǝ mu ji nder gǝ ye? ⁴⁰ Bǝ Long fe kǝ lap nmu sǝna, 'An peǝ sat zeen ngun, bi ndǝ gun shin nɓut nme kǝ emnǝghǝn sǝ mu, bǝ gu shin a nan.' ⁴¹ Bǝ yaghal kǝ sat nyen ndǝ mu nsar kul fini, 'Gu bwak nder nǝ, gun ndǝ mu langpoo wu bis gun, shin waya nwus ndǝ tai tai ndǝ mu ɗen mpe shaarfom k nyen lep fini, ⁴² mpe ndǝ an nneen, bǝ gu shin sǝ nnan ma; An n'amtǝ, bǝ gu shin am nnan ma; ⁴³ A ɗe mǝzep, bǝ gu lap an ma; ngum, bǝ gu shin le nnan ma; a wu gok yaghal nlǝkoo, bǝ gu naa an ma.' ⁴⁴ Bǝ yaghal mu mpe lap fe nni mu sǝna, 'Nda, mu naa gǝ apenan nneen, kot kǝ amtǝ, kot a mǝzep, kot ngum, kot a wu gok, kot nlǝkoo, bǝ yaghal mu naa gǝ mu ɓaam gǝ ma ye? ⁴⁵ Bǝ ni mpe lap fe nmu sǝns, A sat zeen fe ngun, bi wu le ndǝ gu shin ma nme nɓut nyen sǝ mu, bǝ gu nyang shin fe a nnan." ⁴⁶ Das ndǝsǝ mu wakya n ɓut jeel wu tai tai ɗang bǝ nyen ndǝ mu kǝ riin kǝ shinzeen mpe wakya nseen wu tai tai."