¹ Jesu shin bǝlǝp nbimaam nkwa, ni pǝ sǝna, ² pe pǝtong kǝtǝngnaan ɗe a kǝbi me long/miskagham ndǝ ɗak pe mpe sǝ pe mǝ ɗik la ni. ³ (Ni) Lep kwerem fini mpe ɗe mu yong nyen ndǝ dok dwam mpe ɗe mu ji kǝpe sǝ pe mǝ ɗik fe, bǝ mu ji ma. ⁴ Bǝ long fe /miskagham fe shin lep kwerem wu nkwa mu, sǝna, "gu sat nyen ndǝ a dwam mu fe, sǝna, gu naa, mpe ndǝ mu tyo rondongmu wu myar, gu ji ɗi kǝpe sǝ pe mǝ ɗik fe." ⁵ Nyen ndǝ mu dwam fe mu ɗen en du ma yaghal mu yak yar fut bǝ mu ɗel, nme ɗel ya bini nmar fini, nkwa fe mwan gǝlong fini. ⁶ nyen nkwa fe ndǝ mu dwam fe mu yak kwerem kǝ long/miskagham mu shin koor kǝ mu nnon kaakul, yaghal mu tyo mu. ⁷ Bi ndǝ mu shin laa nlong fe/miskagham fe bǝ yaghal lep kǝnshong fini, bǝ yaghal kǝnshong fe mu tyo nyen tyo pe fe mu yaghal mu shaan yil kǝmu. ⁸ Bǝ long/miskagham sat nkwerem finimu sena, 'mun nya ɗik fe, nyen ndǝ mu dwam mu wul ma mpe ndǝ mu kǝ pǝshi ma. ⁹ Mpe ndǝ asǝ gu mwan shi pe shi pe kǝ yar gu dwam gurummu shin waji kǝpe sǝpe mǝ ɓwaghat ɗik ndǝ gu kat' ¹⁰ Kwerem fe mu pwat kǝbangmu ya kǝyarshi pe shi pe mu shak duk duk gurummu ndǝ mu kat, nyen wu bis kǝ wu ret. Mpe wuni fe bǝ pe pǝtong gam kǝ mǝzepmu nlǝ ɗik fe" ¹¹ Bǝ ndǝ long fe/miskagham fe rǝ ɗi ɗe nni naa mǝzepmu, bǝ naa me gurum ndǝ lep le ɗik fe ma. ¹² Long fe/Miskagham fe sat nni sǝna, 'shaar nǝ, shin anang ɗe ji gǝ rǝ nbǝsǝ nnon le ɗik fe ɗi ye? Pǝ muk ɓam, lap bǝlǝp ma. ¹³ Det bǝ yaghal long fe/miskagham fe sat nkwerem fini mu sǝna, gu ɓwaghat sar kǝ kwak gwo sǝ, yaghal gu kon ni kǝɓang nkwo, npe ndǝ wal ɗi yaghal kǝ ees aghas! ¹⁴ Mu mpe bun gurummu a le det, nɓut ɓwer kǝ gurum ndǝ mu yong mu" ¹⁵ Bǝ yaghal nyen nbiiman mu mwan yaghal mu kwaghal mpe ɗe nmu lang gwak nJesu mpe bǝlǝp kǝmuk. ¹⁶ Bǝ yaghal mu lep kǝ shaarshiit fut mu awukǝme kǝ nyen Herodmu, yaghal mu sat nJesu sǝna, "Ngu kam, mu man ndǝ gǝ kǝ zeen, gǝ pǝ kam bǝlǝp Naan kǝ zeen, gǝ pǝ teer dangkong sǝm shik kǝ me gurum ma, bǝ shin gǝ pǝ nin ɗǝm kaa nnaar gurummu ma. ¹⁷ Mpe wuni bǝ gǝ sat nmun, gǝ pǝ leng ame? ni nkaa yar ɗe ngurum kwat wap nkaisar a kot hai ye?" ¹⁸ Bǝ mpe ndǝ Jesu man leng ɓutdet kǝmu bǝ sat sǝna, Ame lǝ ɗe gun pǝ kam an ɗi ye? gun nyen taa naan. ¹⁹ Gu nin shaghal ndǝ mu pǝ kwat wap kǝ ni nnan." Bǝ mu ji kǝ dinarios shin ji nder muk. ²⁰ Jesu sat nmu sǝna, "A mǝriin yaghal sǝm we mu sǝye?" ²¹ Mu sat nni sǝna, "A mǝ kaisar" Det bǝ yaghal Jesu sat nmu sǝna, Gu shin bi ndǝ a mǝ kaisar nkaisar, bǝ yaghal gu shin ni Naan nNaan." ²² Ndǝ mu kǝlǝng bi ndǝ sat bǝ aap po nmu , Bǝ yaghal mu yit ni ɗi yaghal mu ɗel. ²³ Ɗi par ni bǝ pak nyen Saduki mu (nyen ndǝ shin zeen ndǝ gurum kǝ muut bǝ ba yaghal ma) mu ji nder muk. Mu talshi pǝ muk, ²⁴ mu sǝna, "Ngu kam, Muas sat sǝna, "Kat gurum muut ɗe ni nnon jep, bǝ ɗen a tiit ɗe emnǝghǝn muk lap mat fe ɗe nni ɓe jep ngwo ndǝ muut fe ɗi. ²⁵ Me emnǝghǝn shak mu ɗi mu poghovǝl. Bǝ ndǝ nshe lap mat bǝ ba muut. Ni kǝ jep ma, yit mat kaa ɗi n'emnǝghǝn ni. ²⁶ Bǝ wu vǝl tong kǝ mat fe b muut duk nnon jep, duk duk kǝmu poghovǝl fe mu lap mat fe. ²⁷ Mat fe muut ke dangkong mu duk. ²⁸ kǝɗetsǝ bǝ ni mpe kot a mat we nnaar mu poghovǝl fe nɓit ndǝ mu yaghal ntǝghǝm Naan ye? Mpe ndǝ ɗyak mu duk duk kǝ mu poghovǝl." ²⁹ Jesu sat nmu sǝna, "gun a nyen laghar, mpe ndǝ gu man bǝlǝp kǝ Naan ma, shin gu man ɓal kǝ Naan ma. ³⁰ Mpe ndǝ nɓit yaghal kǝ dangkong muut ntǝghǝm Naan bǝ mu mpe lap shorop kǝ shin kǝ ɗyak ma. Mpe ndǝ gurum mpe ɗe a kǝpe jep lep Naan kǝtǝngnaan sǝ. ³¹ Mpe bǝlǝp yighǝl kǝdangkong muut, gu tang bi ndǝ sat gun ni pǝ sǝna, ³² "A an a Naan mǝ Ibrahim, Naan mǝ Ishaku, yaghal Naan mǝ Yakubu ma? Naan a Naan mǝ muut ma ni a Naan mǝ nyen seen" ³³ Ndǝ ɗu gurummu kǝlǝng bǝ aap po ya mu mpe kam kam kǝmuk. ³⁴ Ndǝ nyen man mu kǝlǝng sǝna Jesu ɗyorop nyen Saduki mu bǝ mu kaat kaasut awukǝme. ³⁵ Name nɓut mu, ngu man bǝlǝp kǝ Naan kam ni kǝ me tal. ³⁶ "Ngu kam, A waar ndǝne a wu yon nɓut waarmu ye? ³⁷ Jesu sat nni sǝna, " Gǝ ɗem Nda Naan kǝ pǝzung duk duk, yaghal kǝ seen gǝ yaghal kǝ en gǝ duk duk. ³⁸ A ndǝsǝ ani waar wu yon yaghal ndǝ nshe. ³⁹ Waar wu vǝl asǝ - Gǝ ɗem emnǝghǝn gǝ ƙǝpe kasak sǝ. ⁴⁰ A nkaa waarwu vǝl sǝ mu bǝ gokshi waar mu pǝ yighir nkaa fe yaghal kǝ nyen jagham mu shin/nyen naa pe shi kaa mu shin." ⁴¹ Kǝdetsǝ bǝ nyen man mu awukǝme kǝ pǝtǝghǝm, Jesu tal shi pǝ mu. ⁴² Sat sǝna, Gun pǝ leng a me nkaa Kristi? Ni a la we?" Mu sat nni sǝna, "Ni a la Devid" ⁴³ Jesu sat nmu sǝna, kat asǝ bǝ shin anang ɗe Devid ni nriin bǝ yong ni a Nda, ni pǝ sǝna, ⁴⁴ Nda fe sat Nda fǝn sǝna, "Gǝ tong nsar sǝ fǝn, An mpe lǝ nshaar foom fǝk mu ɗe ape lǝ kwak ngǝ ɗi ye?" ⁴⁵ Devid yaghal shin yong Kristi fe a Nda, shin anang ɗe ni a la Devid ɗi ye?" ⁴⁶ Me gurum mak lap kǝlǝp kǝ ni ma yaghal ndangkong wuni fe bǝ shin mu mak mpe tal me tal nder muk ma.