¹ Bǝ yaghal Jesu bǝbǝlǝp nɗu gurummu kǝ shaarshiit finimu. ² Sat nmu sǝna, Nyen ran kǝ nyen man mu pǝ twaghat a pǝ kop Musa. ³ Mpe wuni fe, gu tap kasuk, duk duk bi ndǝ mu sat ngun gu shin ɗi bǝ gu shin, gu nok ɗing sǝm shik kǝ mu sǝ, mpe ndǝ mu sat bi bǝ yaghal mu shin bi ndǝ mu sat ma. ⁴ Asǝwai, mu pǝ ɓwaghat le ndǝ laapo nmang, bǝ yaghal mu lǝ nkaa gurum fut mu. Bǝ mu shi kaasut mu kǝ ter la sar mpe shin ɓaam mang le fe nmu ma. ⁵ Mu pǝ shin shiit fut a mpe ɗe nyit gurummu naa. Mpe ndǝ mu pǝ shin ɗyan shim mulak fut nan nan, daskagham pǝ kom le kǝmu wasam wal nfǝrǝm mu. ⁶ Mu pǝ ɗem petong wu npe sǝpe, kǝ petong wu nan nlǝ Naan, ⁷ Mu pǝ ɗem ɗe ngurummu mang ɗun kǝ pǝshi nlǝtuk, yaghal shin gurummu yong mu a nyen man. ⁸ Gu nok yong mu a nyen man, mpe ndǝ ngu kam a kǝme det, yaghal duk fuk a emnǝghǝnshak. ⁹ Yaghal gu nok yong me gurum a nda kǝ dǝghǝn yil sǝ, mpe ndǝ gun kǝ nda a kǝme, ni kǝtǝngnaan. ¹⁰ Shin gu nok yit ɗe mu yong gun a nyen kam sǝ, mpe ndǝ gun kǝ ngu kam a kǝme det, ni Kristi fe. ¹¹ Gwo ndǝ ni a yon nnaar gu a ni ɗe kwerem fuk. ¹² Duk me gurum ndǝ mang shini kǝ yon mu mpe sam kǝ yon fe, yaghal duk me gurum ndǝ mang kaashini a amebi ma mu mpe shin yon nni. ¹³ Bis ngun wai nyen kam kǝ nyen man, gun a nyen taanaan! Gu oghot pǝlǝ ka kǝtǝngnaan ngurummu. Mpe ndǝ gun shi kasuk gu ryo ma,bǝ shin gu dǝn nyen ndǝ pǝ ɗem ryo. ¹⁴ Bis ngun wai nyen kam kǝ nyen man, nyen taanaan! Mpe ndǝ gun pǝ sǝ bi ndǝ a mǝ shoropkaa, gun pǝ gwam gurummu kǝ daskagham bǝlǝp nɗang naan fuk mpe ɗe ngun gu sok taanaan fuk, mpe wuni fe bǝ gun nkat pǝshi fe ndǝ ni a dughun wu ɓaan/shwal. ¹⁵ Bis ngun nyen kam kǝ nyen man, nyen taanaan! Gun pǝ mwan shi yil shi yil gu neer pe duk duk mpe kat ngu tǝwap kǝme det, kat gu kat, bǝ gu lǝ nni ɗe ngu shikbis, la wus yit ɓwer met nmuk. ¹⁶ Bis ngun, gun ndǝ a nyen ya kam wu vughum ndǝ gun shi kasuk a wu vughummu, gun pǝ sǝna, kat me gurum twarshin kǝ lǝ naan, bǝ amebi ma, bǝ ba gu sǝna kat gurum twarshik kǝ bi wuret ndǝ ni nlǝ naan bǝ ɗen a tiit ɗe nni mang twarshik nkaa ni. ¹⁷ Gun wu yoghor wu vughummu, a ndǝne a wu yon, bi wuret ndǝ nlǝ naan a kot a lǝ naan ndǝ lǝ ɗe bi wuret ɗe wu ɓang? ¹⁸ Gun pǝ sǝna, 'Kat gurum twarshin kǝ lǝ naan bǝ shin mebi ma, ɗang bǝ kat gurum twarshin kǝ bi ndǝ mu ɗen ɗi nlǝ naan fe bǝ twarshik kǝ ya ni.' ¹⁹ Gun nyen wu vughum, a ndǝne yon met, bi ndǝ mu ɗen nlǝ naan a kot a lǝ naan ni pǝ vwang bi ndǝ mu ɗen ye? ²⁰ Mpe wuni fe duk me gurum ndǝ twarshin kǝ pe lǝ naan twarshin kǝ ni kǝ mebi ndǝ mu ɗen ɗi nkaa fe. ²¹ Gwo dǝ twarshin kǝ lǝ naan, twarshin kǝ ni yaghal kǝ gwo ndǝ pǝ tong ɗi ndǝghǝn fe. ²² Yaghal gwo ndǝ twarshin kǝ kǝtǝngnaan, twarshin kǝ pe tong kǝ Naan kǝ ngu tong nkaa pe tong fe. ²³ Bis ngun nyen kam kǝ nyen man, nyen taanaan! Mpe ndǝ gun pǝ ji kǝ pun kǝme nɓut (zakka) sar mǝ bi ndǝ gun kǝ ni, yaghal gu yit bi wu tǝghǝn ndǝ ye kot gu shin mǝ waar - put kǝ zeen kǝ naa jeel yaghal shin zeen. Mpe ndǝ asǝ a ndǝsǝ ndǝ ye kot gu shin bǝ ba gu yit pak ɗi nnon shin. ²⁴ Gun wu vughum, gun pǝ taghat jep ngum wu ɗyen bǝ yaghal gu ɗal wu nan! ²⁵ Bis ngun nyen kam kǝ nyen man, nyen taanaan! Mpe ndǝ gun pǝ vwang dangkong jang kǝ ɗa, bǝ yaghal dǝghǝn fe gam kǝ ɗem kaa/bǝlak. ²⁶ Gun wu vughum nyen man! Gu vwang dǝghǝn jang yaghal ɗa, ɗe ndangkong fe ɓang di duk. ²⁷ Bis ngun, nyen kam ke nyen man, nyen taanaan! gun a kǝbi kǝsher ndǝ mu vwar ɓang ɓang, nyen ndǝ mu ret naa kǝɓang, dǝghǝn fe a es kum gurum ndǝ mu ɗwam kǝ bi wu ɗǝng pe sǝ. ²⁸ Asǝ fe bǝ gun a wu ɓang nyit gurummu, bǝ ndǝghǝn pǝzung gu a mǝ nyen taanaan kǝ shiit wu bis. ²⁹ Bis ngun, nyen kam kǝ nyen man, nyen taanaan! Mpe ndǝ gun pǝ ɗik kǝsher jagham yaghal gu ɗak kǝsher kǝ gurum wuret. ³⁰ Gun pǝ sǝna, 'Kat ye mun ɗi get ɓit kǝder yit bǝkaammu, ye kot mun mpe kaat sar kǝ mu nkon tǝghǝm nyen jagham mǝ Naan ma' ³¹ Mpe ndǝ gun a langtǝng kasuk, a gun a jep nyen ndǝ tyo nyen jagham. ³² Gu gam shiit bǝkaam gu mu! ³³ Nwomu, nkaan jep zem, gun mpe shin anang ɗe gu gam shiit rǝ nwus ye? ³⁴ Mpe wuni fe , gu naa, An pǝ lep nyen jagham yaghal nyen seen ke nyen kam. Pak gu mu mpe tyo yaghal mu kaa; bǝ yaghal pak mu mpe nas gurummu nlǝ naan yaghal gu shen gurummu shin put nyil shin ya nme yil. ³⁵ Pǝshi bi ndǝ gu shin fe ni nkaa gu mpe tǝghǝm nyen zeen ndǝ gu kon kǝ yil, shin waji ntǝghǝm Abel ngu zeen, kǝ tǝghǝm Zakariya la Barakia, ndǝ gu tǝ naar pe wu ɓang kǝ pe ɗǝk yil nNaan. ³⁶ An pǝ sat zeen ngun, bi sǝ mu mpe wakji nkaa gang ndǝsǝ. ³⁷ Jerusalem, Jerusalem, gun ndǝ gu tyo nyen jagham yaghal gu fya nyen ndǝ mu lep shin ji nder gu! A A yit ɗang ndǝ a sha ɗe nan shak jep gu nder shak, kǝbi ndǝ koo pǝ shak jep nshaap dǝ, bǝ gun pǝ lǝ en ma! ³⁸ Gu naa, lǝ gu mpe ɗe shing lǝ nnon gurum. ³⁹ Mpe ndǝ a sat ngun, gun mpe naa an zak ma kat ba gu tang mpe naa an ma. Wuret nkaa gurum ndǝ ji nɓut sǝm kǝ Nda