¹ Ndǝ Jesu kǝ shaarshiit fini mu pǝ kus Jerusalem bǝ yaghal mu ji wul nBethpage, kus kǝpe pang mǝ tǝng paát, bǝ Jesu lep shaarshiit fini mu vǝl, ² Ni pǝ sat nmu sǝna, Gu ryo nyil ndǝ kǝ ɗe ntǝghǝm, bǝ yaghal gu kat me nagham a wu ɓwaghatɗi , mu kǝ la dǝ. Gu foon mu Gu ji kǝ mu nnan. ³ Kat me gurum sat me bǝlǝp ngun nkaa fe bǝ gusat nni sǝna, "A Nda mpe shin shiit kǝ mu, bǝ gu fe kǝ yitɗi ɗe ngun gu wakji kǝ mu ɗi." ⁴ Kǝɗetsǝ ndǝsǝ a mpe gam bǝlǝp ndǝ ngu jagham sat sǝ, ndǝ sǝna, ⁵ "Gu sat nlarep Zayon,'Gu naa Miskagham/Long fuk no pǝ ji nder gu, mang kashini kǝbi ndǝ ni a mebi ma mpe ndǝ ni a nkaa nagham - nkaa la nagham." ⁶ Bǝ shaarshiit fe mu mwan mu shin kǝbi ndǝ Jesu sat mu sǝ. ⁷ Mu mwan wakji kǝ nagham fe kǝ la dǝ yaghal mu lǝ le nkaa nagham fe mu, yaghal Jesu tong kǝka le ndǝ mu lǝ nkaa nagham fe. ⁸ Gurummu ɓwer mu lǝ le fut kǝka yar, yaghal pak gurum kwap song tǝng mu fwa ɗi kǝka yar fe. ⁹ Bǝ yaghal ɗu gurum pak mwan ntǝghǝm Jesu yaghal pak mu mwan a wukǝme kǝ ni mu pǝ fwa or mu pǝ sǝna, "Hosanna nder La Devid! wuret ni nkaa gurum ndǝ ji ndǝghǝn sǝm kǝ Nda! Hosanna a ni a wu yon fe!" ¹⁰ Ndǝ Jesuji nJerusalem, duduk nyen ndǝ mu ɗikǝ yil mu sat sǝna, "ndǝsǝ awe?" ¹¹ Ɗu gurummu mu lap mu sǝna, "Ndǝsǝ a ni a Jesu ngu jagham ndǝ a ngu yil Nazaret ndǝ ni a nGalili." ¹² Bǝ yaghal Jesu rǝ nlǝ naan. Shen nyen ndǝ mu pǝ gǝlong ndǝghǝn lǝ naan fe, yaghal vilang pe ndǝ mu pǝ shin shiit kǝ ni mpe piring shaghal kǝ pepǝtong nyen serep kǝ bul mu. ¹³ Sat nmusǝna, "No ɗi a wu rǝran sǝna, Mu mpe yong lǝ nǝ a pe ɗang naan/ lǝ naan, bǝ gun gu mang ni a pe kaat kǝ watmu" ¹⁴ Bǝ wu vughummu kǝ kungkuutmu muji nder muk ɗi nlǝ naan fe, yaghal lat kǝ shwal kǝmu mu. ¹⁵ Ndǝ nyen shiit naan wu nan kǝ nyen man mu naa bi aap po ndǝ shin, yaghal mu kǝlǝng jepmu mu pǝ or ndǝghǝn lǝ naan mu pǝ sǝna, "Hosanna under La Devid ," bǝ mu mang tughurnung a lǝle ma. ¹⁶ Mu sat nni sǝna, "Gǝ kǝlǝng bi ndǝ nyen sǝ mu pǝ sat fe a?" Jesu sat nmu sǝna, "E! kǝnaķan gu sham tang fe ma ndǝ, "saam sǝm ndǝ ni nkaa yar ni pǝ put a npǝ jep wu dyen mu a?" ¹⁷ Set bǝ Jesu yit mu ɗi yaghal put ɗi kǝyil ɗel ya nyil Betani teer ɗi nbǝsǝ. ¹⁸ Kǝɗetsǝ nɓit bǝ shin wa ya ɗi nyil ndǝ dǝghǝn wa ɗi, neen laa nni. ¹⁹ Naa tǝng koon pǝ yar, mwan ya ɗi nbǝder tǝng fe bǝ kat me la ɗi ntǝng fe ma ni a kǝ kom det. Sat ntǝng fe sǝna, "Mang ye yi lang me la nkwa sǝ" yaghal ɗi nbǝsǝ wai bǝ tǝng fe ɗoghom fii. ²⁰ Ndǝ shaashiit fe mu naa bǝ aap po nmu yaghal mu sǝna, "Shin anang ɗe tǝng koon ya fii kǝɗǝtsǝ kǝɗetsǝ ɗi e?" ²¹ Jesu lap bǝlǝp sat nmu sǝna, "An pǝ sat zeen ngun, kat gun kǝ shin zeen nnot tan koo, bǝ gun mak mpe shin a bi ndǝ mu shin ntǝng koon sǝ det ma, mpe ndǝ gun mpe ɗen kǝ ɓal ndǝ gun mpe mak sat ndǝghǝ pang sǝ sǝna, "Dǝghǝr pang fe sam ta nnǝghǝn am," ni mpe shin a bi ndǝ gu sat sǝ fe. ²² Duk me bi nd ǝ gu ɗang gun pǝ shin zeen bǝ gun mpe kat/lap fe." ²³ Ndǝ Jesu waji rǝ nlǝ naan, ni pǝ kam kam bǝ nyen shiit naan kǝ nyen nan mu ji nder muk mu sat sǝna, "Gǝ shiit sǝ mu a kǝ ɓal we, yaghal shin awe shin ɓal sǝ ngǝ ye?" ²⁴ Jesu lap bǝlǝp sat nmu sǝna, "An mpe tal me tal shi pǝ gu, kat gu sat pǝshi tal fe nnan bǝ an mpe sat ɓal ndǝ an pǝ shin bi sǝ mu kǝ ni ngun. ²⁵ Baptisma kǝ Joon - tong ane ji ye? A kǝtǝng naan a a nder gurummu ye?" Mu lap bǝlǝp kǝnaar sut mu pǝ sat sǝna, "kat mu sǝna a kǝtǝng naan, 'ni mpe sat nmun sǝna, 'Ame lǝ ɗe gu shin zeen nni ma ɗi ye?' ²⁶ Kat shin mu sǝna, 'a kǝpe gurummu, 'mu lwaghat ɗuu gurummu, mpe ndǝ gurummu mu pǝ naa Joon a nyit ndǝ a ngujagham" ²⁷ Bǝ mu lap nJesu yaghal mu sǝna, "mun mu man ma." shin yaghal Ni sat nmu yaghal sat sǝna, "An mpe sat ngun kot an pǝ shin bi sǝ mu a kǝ ɓal kǝ me ma. ²⁸ Kan gun pǝ leng ame? Me gurum ni kǝ jep mu vǝl. Mwan ya nder ndǝ nshe bǝ yaghal sat sǝna, Gǝ mwan gǝ shin shiit nmar shini,' ²⁹ La fe lap sǝna, 'A mwan ma' bǝ ba kǝdangkong bǝ viling en ni bǝ mwan mar fe. ³⁰ Ndǝ gwo fe mwan ya nder la ni wu vǝl bǝ yaghal sat bi ndǝ sat nla ndǝ nshe fe nwu vǝl fe. La wu vǝl fe sat sǝna an nmwan fe nda, bǝ kǝdangkong bǝ ba mwan ma. ³¹ A ndǝne kǝnaar jep vǝl sǝmu shin bi ndǝ ni kǝ en nda ni e? Mu sǝna, "A la ndǝ nshe." Jesu sat nmu sǝna, An pǝ sat zeen fe ngun, nyen lap wapmu kǝ napapagharmu mpe ɗel kǝtǝngnaan ɗangshe gun gu ɗel ɗi. ³² Mpe ndǝ joon ji nder gu nyarkaam mǝ en wu ɓang, bǝ gu shin zeen nni ma. Nyen lap wapmu kǝ napagharmu mu shin zeen nni. Bǝ gun, duk kǝ ndǝ gu naa bisǝ kǝ yit, gu nyang tǝ wap kǝdangkong ɗe ngun gu shin zeen nni. ³³ Gu kǝlǝng bimaam nkwa, Me gurum ɗi, a ngu fǝl, sak yaghal kop la tǝng Vine, bǝ yaghal neer mar fe, yaghal ok pe ɗwat la tǝng ɗi ndǝghǝn fe, yaghal ɗik shin ka kǝtǝng mpe ak pe, yaghal shinpe fe kǝ ɗang nyen shiit ɗwat la tǝng nmu naa pe fe ɗi. Bǝ ɗel ya nme yil nkwa. ³⁴ Ndǝ pe mak ndǝ la tǝng fe ni nnung, bǝ yaghal gwo fe lep kwerem fini mu ɗe mu lap la tǝng kǝmuk ɗi nni. ³⁵ Bǝ nyen naa pe fe mu nas me kwerem fe yaghal mu tǝ nme, yaghal mu fya wu nkwa fe. ³⁶ Bǝ shin ngu fǝl fe lep kwerem nkwa mu, bǝ nyen naa pe fe mu shin bi ndǝ met ndǝ mu she shin fe sǝ. ³⁷ Kǝdangkong wuni fe bǝ ngu fǝl fe lep la ni nder nyen naa pe, Ni pǝ sǝna, 'mu mpe shin yon nla nǝ.' ³⁸ Ndǝ nyen naa pe mu naa la ngu fǝl, bǝ mu sat nshak mu sǝna, "A ngu kok kop ngu fǝl fe sǝ." Gun nmun tǝ ni ɗe nmun mu kok kop fe ɗi' ³⁹ Asǝ fe bǝ mu mang ni, mu tǝ ni yaghal mu kon kum fe shin put. ⁴⁰ Kǝɗetsǝ kat ngumbi felǝ ji, ni mpe shin ame kǝ nyen naa pe sǝ mu e?" ⁴¹ Mu sat nni sǝna, "Ngu fǝl fe ni mpe tyo nyen naa pe wu baan sǝ mu, yaghal shin fǝl fini nyen naa pe wu nkwa mu, nyen naa pe ndǝ mu mpe shin kaa mar kǝdangkong ndǝ mu ɗiip sǝ." ⁴² Jesu sat nmu sǝna, "Gu tan nɓut vilip kǝ naan ma, 'Pang ndǝ nyen ɗiklǝ mu nyang a ni ɗe pang kuur lǝ. Ndǝsǝ a bi ndǝ mu kat nder Nda, yaghal shin a bi wuret nyit mu?" ⁴³ A'npewuni, an pǝ sat ngun, mu mpe ɗwan pe kǝtǝngnaan nsar gu ɗe mu shin nme nyen ndǝ shin bi ndǝ ni kǝ pǝshi wuret. ⁴⁴ Duk gurum ndǝ puta nkaa pang sǝ bǝ kǝ terep. Duk me gurum nde pang fe puta nkaa muk bǝ pang fe kǝ ees ni." ⁴⁵ Ndǝ nyen pǝ tǝghǝm kǝ shiit naan kǝ nyen man mu kǝlǝng nbimaam kǝmuk , bǝ mu man ndǝ ni pǝ sat bǝlǝp fe a nkaa mu. ⁴⁶ Mu pǝ tang yar ya ni, mu pǝ lughut ɗu gurummu; mpe ndǝ gurummu pǝ mang ni a ngu jagham.