¹ Waji wul ndǝ Jesu lat sǝm bǝlǝp sǝ mu, bǝ yit Galili yaghal ji nkwang Judiya ndǝ pan ntǝghǝm Kong Jodan. ² Ɗu gurummu mu mwan nder muk, bǝ yaghal lat kǝ shwal (gok) kǝ mu ɗi nbǝsǝ. ³ Gurum mu ji nder muk, mu pǝ kam ni, mu pǝ sǝna, "ni nkaa yar ɗe gurum ɓwot mat ni mpe me pǝshi det a?" ⁴ Jesu piring ɗe sat na, " Gu tang ndǝ Ni ndǝ ɗakmu nshe ɗakmu a wu mis kǝ wu mat ma?" ⁵ Ni ndǝ ɗakmu shin sǝna, "mpe pǝshi ndǝsǝ bǝ mis kǝ yit nda ni kǝ nǝghǝn ni ɗe kaat kashini kǝ mat ni, bǝ mu vǝl mu kǝ ɗe nan kǝme ma? ⁶ Asǝ bǝ mu a vǝl zak ma, mu a nan kǝme. Mpe ndǝ asǝ bǝ bi ndǝ Naan kaat awukǝme yit ɗe me gurum nok gap naar fe" ⁷ Mu sat nni sǝna, "Kat asǝ bǝ ame lǝ ɗe Musa shin pe nmun mpe ɓwot mat ba mu shen shin ba ɗi e?" ⁸ Sat nmu sǝna, " a mpe ɓal kǝ pezung gu ɗe Musa yit ɗi ɗe ngun gu ɓwot shoropgumu ɗi, nshe fe bǝ ye kot asǝ ma. ⁹ A sat ngun, duk me gurum ndǝ ɓwot mat ni, kat ba a mpe ndǝ ni pǝ ngaa ma ɗe lap mat nkwa, bǝ ni a pǝ tǝleet; mis ndǝ lap mat ndǝ mu ɓwot bǝ ni a pǝ tǝleet" ¹⁰ Shaarshiit kǝ Jesu mu sat nJesu Sǝna, "kat bi fe asǝ kǝnaar mis mu kǝ mat ni, bǝ ret fe wak gurum nok lap mat sǝ." ¹¹ Bǝ Jesu sat nmu sǝna, "a gurummu mpe lap kam sǝ ma, a nyen ndǝ mu kat pe mu mpe ɗem ɗi det. ¹² Mpe ndǝ pak a ɗyotmu mpe ndǝ mu ɓe mu asǝ nɓut nǝghǝn, pak ɗyot fe a gurum shin asǝ nmu, asǝ fe bǝ pak ɗyot fe mu mu ɗe asǝ fe a mpe pǝshi ndǝ amǝ tǝngnaan. Gwo ndǝ naa kat jin nlap kam sǝ yit ɗi ɗe nni lap ɗi" ¹³ Bǝ mu ji kǝ pak jep wu ɗyen nni ɗe ni ɗen sar kǝka mu yaghal ɗangnaan, bǝ shaarshiit kǝmuk mu ɓyal mu. ¹⁴ Bǝ Jesu sat sǝna, "gu yit njep wu ɗyen mu ji nder nǝ, gu nok dǝn mu mpe ji nder nǝ sǝ, mpe ndǝ tngnaan a mpe nyen wuni" ¹⁵ Ɗen sar nkaa jep fe mu, yaghal ɗel yit pe wuni fe. ¹⁶ Det bǝ me gurum ji nder Jesu yaghal sǝna, "Ngukam, a shin ame bi wuret ndǝne ɗe nnan a kat seen wu tai tai ɗi e? ¹⁷ Jesu sat nni sǝna, "Ame lǝ ɗe gǝ tal bǝlǝp nkaa bi ndǝ a wuret ɗi e? A ngu kǝme det a wuret, mpe wuni kat gǝ pǝ ɗem rǝ nɓut seen, gǝ tap waar mǝ Naan." ¹⁸ Gwo fe sat nni sǝna, "A waaar ndǝne? Jesu sǝna, tap ba gǝ tǝ gurum, tap ba gǝ shin tǝleet, gǝnok wat, gǝ nok lap lang tǝngɗung sǝ, ¹⁹ gǝ shin yon nda gǝ kǝ nǝghǝn gǝ, yaghal gǝ ɗem tǝnglǝ fǝk kǝpe kasak sǝ" ²⁰ La ɗengmaar fe sat nni sǝna, "waar sǝmu duk duk a tep ma, Ame ndǝne ndǝ shin ɗe nnan? ²¹ Jesu sat nni sǝna, "kat gǝ ɗem ɗe nnon laghar, mwan, gǝ seet kǝ bi ndǝ gǝ kǝni gǝ shin nyen shoor, bǝ gǝ kat bilong kǝtǝng; bǝ yaghal gǝ ji, gǝ mwan a wukǝme kǝ an" ²² Ndǝ ɗengmaar kǝlǝng bi ndǝ Jesu sat nni,yit pe fe ɗi npǝzung tǝkook, mpe ndǝ ni kǝ bilong kǝ sar kat. ²³ Jesu sat nshaarshiit finimu sǝna, "An pǝ sat zeen fe ngun, ni mpe laapo ɗe ngu bilong ɗel kǝtǝngnaan. ²⁴ Shin a sat ngun, "ni mpe laapo ma ɗe mu sǝna rakumi ɗel nɓut fung nnyir kat ɗe ndǝ ngu bilong kǝ rǝ kǝtǝngnaan nder Naan." ²⁵ Ndǝ shaǎshiit Jesu mu kǝlǝng ndǝsǝ, bi fe shin aap poo nmu yaghal mu sǝna, "Awe mpe mak bar ye?" ²⁶ Jesu naa mu yaghal sǝna, nder gurummu bǝ ni nshin ma, nder Naan bimu duk duk mu kǝ mak shin." ²⁷ Bǝ yaghal Pita lap nni sǝna, "Gǝ naa, mu yit bimu duk duk ɗe nmun mu mwan nder gǝ ɗi. Asǝ fe bǝ mun mpe kat ame?" ²⁸ Jesu sat nmu sǝna, "A sat zeen ngun, ɓit ndǝ pǝ waji kat la gurum tong kǝka pepǝtng ram fini, bǝ gun ndǝ gu mwan awukǝme kǝ an mpe tong kǝka pepǝtong ram sar po vǝl, gun pǝ tok dyel nkaan sar po vǝl mǝ jep Isar'ila. ²⁹ Mpe ndǝ duk duk gwo ndǝ yit lǝmu, kǝ emnǝghǝn wu mismu, kǝ emnǝghǝn wu matmu, kǝ nda, kǝ nǝghǝn, kǝ jep, mak anang bǝ kǝ fǝl mpe nǝ, ni mpe lap pǝshi fe yit yak gurum paat (ɗali) yaghal kat seen wu tai tai. ³⁰ Mpe ndǝ asǝ wu yon ndǝ a wu nshe mpe ɗe wu lat (sǝkǝǝs), yaghal wu lat (sǝkǝǝs) mpe ɗe a wu nshe.