¹ Par puus no'ok khi Naan bhi Jesu del yar khipe mar sih mu. Jep kam khi muk mu ndhi ne'en laa nmu bhi mu tep kah sih mu yah taghat mu arr. ² Dang bhi ndhi Farisiyawa mu naa det, bhi mu sat Jesu mu na, "Ghi naa, jep kam fhik mu tep waar Par puus nook khi Naan." ³ Bhi Jesu sat nmu nna, "Kan gu sham tang bih ndhi gyet Dauda shin ma mhi, ndhi neen laa nnih, khi gurum ndhi mu mwan a wukhime khi nih ma? ⁴ Bhi del ndighin lih Naan bih sih buredi ndhi tong a wu den, ndhi wuni bor a tep waar nphe ndhi kat sih shin niyen ndhi nder muk mu tep waar duk, nphe ndhi a niyen shiit Naan det mu khi sih bhi mu tep waar ma. ⁵ Gu tang nbut waar ma ah, ndhi Par puus no'ok bhi niyen shiit Naan mu del khidel waar bhi waar khi yah mu ma ah? ⁶ Dang bhi a sat ngun ndhi gwo ndhi khi yon met nlih Naan nih si. ⁷ Kat yeh gu man phishi bih ndhi bih si, 'An phi dem a naajel dang a bih zuhum ma,' yeh gu kok shen niyen ndhi mu tah laghar ma. ⁸ Nphe ndhi La Gurum a nih a Nda nkha Puus no'ok khi Naan. ⁹ Bhi Jesu yit mu bhi del nlih Naan khimu. ¹⁰ Det bhi, meh gwo ndhi sar muk fii nih dih. Niyen Farisiyawa mu tal phi Jesu, mu na, "A bih tep waar kat mu lat khi shuwal ngurun Par puus no'ok khi Naan ma ah? nphe deh mu sat si na gwar shin shikbis dih. ¹¹ Jesu sat mu nna "Kan a gurum ndhi neh khinar gu, ndhi, kat nih kih tihm khimeh, deh puttah nbut ntughul ndhi jurum Par Puus no'ok khi Naan, bhi khi lep sar nih shang nih shin put ma yeh? ¹² Deh khi tah a gurum, ndhi, ndhi khi phishi met ntihm! Nphe ndhi a si kat mu shin bih wuret Par puus nook khi Naan bhi a tep waar ma. ¹³ Bhi Jesu sat ngwo fe nna "Ghi dhil sar ghi shin put." Gwo fe dhil shin put, bhi sar fe viling deh, khipeh wu vhil fe si. ¹⁴ Dang bhi Farisiyawa fe mu pwat khibang mu ya ben bih wubis khikha muk. Mu phi tang yar ndhi du pet deh du t'ih nih dih. ¹⁵ Jesu man leng khi mu, bhi yit peh fe. Gurum mu bwer mu mwan nder muk, bhi lat khi shuwal khi mu khiding. ¹⁶ Nih taat sar nyit mu yak mu nwoo jin ngohotshi gurum mu, ¹⁷ deh nnih put zeen dih, khipe bih ndhi gyet Ishaya ngu jagham, sat nna, ¹⁸ "Gu naa, kwaram ndhi a mang; ndhi a dem, ndhi riin fun mu yak shak. A den Riin nhi khidel muk, yaghal a nih khi yong peh nphe tok diyel nNiyen ndhi mu man Naan ma. ¹⁹ Khi fwat shin ma bhi wal khi dighil ma; bhi shin meh gurum khi khiling dighil muk khi yar ma. ²⁰ Nih khi tep meh kom dem ma; khi pit wuss ndhi khidel luk ma, kat del tighim khi bih ndhi a zeen yaghal si kohorrong dang si ma. ²¹ shin nbut sihm muk bhi Niyen ndhi mu man Naan ma mu khi den en du nphe ntighim." ²² Bhi meh gurum ndhi nih a wu vughum shin a phibam, nih khi riin wubis, bhi mu ji khi nih nJesu. Nih lat kih shuwal khimuk, bhi gwo fe lap bhilip shin naa-peh. ²³ Fii-pwo ndu gurum mu ndhi mu dih yaghal mu sat mu na "Kot si gwo si a La Davit/Dauda wo?" ²⁴ Dang bhi ndhi Farisiyawa mu khiling bih fii-pwo ndhi si, bhi mu sat mu na, "Gwo si nih phi taghat riin wubis mu a khi bal nin ndhi nih a mhi Beelzebul, la kop mhi riin wubis/mhikwarkum mu." ²⁵ Dang bhi Jesu man no'ok mu yaghal sat nmu nna, "Meh yil ndhi khi liyak sat bhi khi deh a shinglih/kau, yaghal meh yil ma bhi lih ndhi khi bak khinar sat bhi kih run/dar ma. ²⁶ Kat sharfom/shetan khi shen sharfom/shetan bhi nih nphe liyak khashin. Bhi yil khimuk nphe dar anang eh? ²⁷ Shin zak kat an phi pwat khi riin wubis/mhikwarkum mu shi riin Belzebul, bhi jep fuk mu phi pwat khi mu a khi meh? Nphe wuni a si bhi mu khi deh a niyen tok diyel khikha gu. ²⁸ Dang kat an phi pwat khi riin wubis/mhikwarkum mu a khi Riin mhi Nda Naan, bhi yil mhi Naan sam kat gun. ²⁹ Khi shin anang deh meh gurum khi del nlih gwo ndih nih kih bal deh kok bih khimuk nwat dih yeh kat she bwaghat gwo ndhi nih khi bal fe dang si ma eh? Bhi khi kok bihlong nlih fe. ³⁰ Gwo ndhi mun nshimwan a wukhimeh ma bhi nih phi dem an ma, yaghal gwo ndhi khi shak jep bih mu nder nih ma bhi nih min a phi fwat fe. ³¹ Nphe ndhi a si a sat ngun, meh shikbis khi tihkok khi sihm Naan mu khi kon ngurum mu, dang bhi gwo ndhi tihkok khi sihm Riin Wubang bhi mu khi kon khi wuni fe ma. ³² Kat meh gurum sat bhilip wu baan khidel La Gurum, bhi mu khi kon khi nih ngwo fe. Dang bhi gwo ndhi sat bhilip wu baan (wubis) khidel Riin Wubang, bhi wuni fe mu khi kon khi nih nnih ma, kot a ndighin yil ndhi si, kot a ndhi kudi nnot nwul oh. ³³ Mu khi dak tihng a wuret yaghal la khimuk khi ret, ma bhi kat mu niyang dak tihng bhi la khimuk khi biss, nphe ndhi mu khi man tihng a shi la khimuk. ³⁴ Gun jep zem mu, nphe ndhi gun a niyen wubis bhi shin anang deh gun nphe sat bih wuret dih yeh? Nphe ndhi a nbut bih ndhi bwer nbhizung gurum deh nih phi pwat kih bhilip mu dih. ³⁵ Gurum wuret khi put khi bih wuret ndhi nbhizung nih, yaghal gurum wubis khi put a khi bih wubis ndhi nbhizung nih. ³⁶ A sat ngun par puus diyel bhi gurum mu khi pwat khi sat phishi meh bhilip wubaan (wubis) ndhi mu sham sat. ³⁷ Nphe ndhi a nbut bhilip ndhi nih phi pwat nphigu ndhi mu nphe man wuret fuk, shin a nbut bhilip fuk duk ndhi mu nphe gap diyel ngun. ³⁸ Det bhi niyen man ran khi Farisayawa mu pring nJesu mu na, "Ngu kam, mun phi dem naa sar shiit fik." ³⁹ Dang bhi Jesu piring nmu nna "Nkaan gurum wubis kih niyen tihleet mu phi dem naa sar shiit fhinih. Dang bhi an nphe nin sar shiit fin nmu ma kat dang a sar shiit mhi Jona ngu jagham nmu det ma. ⁴⁰ Khipeh ndhi Jona gyet shin puus kun khi lhipar kun nbut sherep, bhi La Gurum nphe shin puus kun khi lhipar kun nbut tukun wum. ⁴¹ Daas ndhi mu gyet Ninevi nphe yighil dihram khiting par puus diyel khi nkaan gurum ndhi mu dih khidetsi. Nphe ndhi mu mut gyet mu tihwap dhi mu khiling bhilip Naan ndhi Jona/Yunana kop nmu, dang bhi gu naa, gwo ndhi yon met nJona/Yunana nih si. ⁴² Mat Long ndhi nkwang bhider khi yaghal khi diyel khikha daas ndhi a nkaan gurum ndhi mu dih khidetsi yaghal mu tihkok khi mu. Nih mat fe gyet wul a sihittis khi yil nphe khiling nbih-man khi Solomon, bih gu naa, meh gurum ndhi yon met nSolomon nih si. ⁴³ Kat riin wubis put nshi-shik gurum, bhi khi pet yar khipeh ndhi am fii deh nnih kat peh no'ok dih, dang bhi khi kat ma. ⁴⁴ Bhi yaghal khi sat nna 'Shin a wahyah nkop lih-nih wusighir ndhi dok a tong dih a wul.' Kat wawul, deh kat lih feh a wu kum shin mu dak nih. ⁴⁵ Bhi khi mwan kok riin wubis wu kwa mu pohovhil ndhi mu khi bal met mhimuk, bhi mu khi wakji mu twaghat dih. Bhi gwo wuni khi sighit tihkok met ndhidok nih dih nshe. Nih nphe kot a si khi nkaan gurum wubis si mu. ⁴⁶ Ndhi Jesu kudi phi sat bhilip khi du gurum mu, det bhi, nighin muk khi emnighin muk mu mu dihram khibang, mu phi dem lap bhilip khi nih. ⁴⁷ Meh gurum sat nnih nna "Ghi naa ah, nighim ghi khi emnighin ghi mu khi dihram khibang, mu phi dem lap bhilip khi ghi." ⁴⁸ Dang bhi Jesu sat nnih nna, "A weh a nighin nih yaghal a weh mu a emnighin nih mu eh? ⁴⁹ Bhi nin khi sar nin njep kam/nshar shiit fhi nih yaghal sat nna, "Gu naa, ndhi si mu a nighin nih khi emnighin nih mu. ⁵⁰ Nphe ndhi meh gwo ndhi shin nook mhi Nda nih ndhi khitingNaan, bhi a gurum wuni a emnighin nih wu miss, khi wu mat, yaghal nighin nih.