¹ Igom ane bangho waa itum yeme tap Jesu ji yemeh ngor mboke Pilate. ² Mbor kpeb amumala boleh, yor bong, uyeneh nenom wengha meh shumo mfam yereh tugor, tern mbeh weh nim ba kagah ntubor ka Caeser, fenghe yor bong mbeh weyor reror Christy, Ntol. ³ Pilate ba bebeh nah, wor yor areror Ntol Jews? Jesu ba fangha fenghe bong, wor yor abongho. ⁴ Pilate ba bong neh ntol adim ne igom ane feb. Nka yen isha-shab njenden-dege ngha idi nenom weh-ah. ⁵ Mbor koro asherk, yor bong, "Ayor yib aneh yemeh fenghe imeh kpele feli idi waa, ngor Judea, kpeb Galilee balomo ngha idinja." ⁶ Igara nti Pilate yogor ntingha, aba bib jolor nenom nyah neh Galilean yor. ⁷ Nah arenghor mbeh ayop ubor ikor Herod, aba tome Jesu tugor Herod, weh fefene jolor gor Jerusalem ngor atu nya. ⁸ Igara nti Herod yenor Jesu, item iba yebeh, tep ne weh bu cheb ba ayebeh yeneh ikede ibu rap. Weh bu yoke gumeh akpi ichebe nor alem utanikor mbin tege nor weh yen. ⁹ Herod yor ba bib Jesu ngor nlome bong feb, Jesu faghim meh ijome-jome. ¹⁰ Ntol adim ne ba yonyonor itum yemeh yor bong neneh ngor ilam. ¹¹ Herod neh ba-gome-gomoe beh iyor toe Jesu fenghe yor yorleh. Ikukulor je mbor kageh awuror nya ikelor infan fenghe tomeh fenghe idi Pilate. ¹² Igara ntor Herod mboneh Pilate ibu jol uterm neh ijibor ngho ufomfo bor pii, nor ufomfo bor igum lomoe mbor fonor ujing neh aterm. ¹³ Pilate ba kok bor konor-ashi ntol adim neh anepkole ne igom aneh fonor. ¹⁴ Fenghe bong ka bor, wun kolor nenom wengha ba kameh na neyor meh jumor mfam tugor, fenghe breh, mbibeh meh bib ngha amerr yeneh, nkayen ijome-jome iji nenom wengha beh lem gara ngho abaga nya wun meh bong gumeh. ¹⁵ Herod fufene ba tern tugor bor, ngho aba tomeh fenghe tugor bor fenghe yen, nenom mbe nenom wengha ka lem ijome-jome nji lagor iku ka-eh. ¹⁶ Ikukulor nyebeh kaga akanya fenghe yageh abor. ¹⁷ Ngha tiga Pilate ikor iyurr ba torbeh nor ayige ka Jews ne mgbagobor nwreng igara ikak fornor. ¹⁸ Mbor fenghe rerr joke igol njreng waa, yor bong, chong wun ne nenom wengha, nor wun yagah Barabbas! ¹⁹ Barabbas jolor nenom weh mbor kage mgbagobor tep neh uteneh, mbeneh ngho ibugor fonor ne uyolo neh. ²⁰ Pilate kpeh ba bong nebor, cheb nor mbor yaga Jesu abor. ²¹ Mbor ba rann, fenghe yor bong, yoleh wun, yoleh. ²² Aba bong nebor ngor igorl ira, na nor, ba-isha-shab ibaga nenom wengha lemor? meh mbu yenim ijome-jome ngho nji ilago iku ka-eh. Igara nti nye kak akanya, nyebeh yaga abor. ²³ Mbor tege yor tern neh agboro alome, yor cheh nor mbor yolleh, Alome bor iba jumor Pilate tugor. ²⁴ Pilate ba kabor ikor. ²⁵ Aba yige weh mbor bongho weh mbor kage mgbagobor tep ne ilam ne uyolonneh. Aba yaga Jesu abor kabor nah mbor chebor. ²⁶ Na mbor tabeh tum, mbor tap Simon ne Cyrene, weh beh yurr gor ibugor jeh meh ba, mbor fenghe chege ajarr-te fonor nor ashol yor tonor Jesu. ²⁷ Igboro igom ane, ne anebkal mba item iyolor yambor fenghe yor nongho iku ka-eh iyor toneh. ²⁸ Akebeh breh bor bong abon anebkal Jerusalem, kawun kpeh fab abibi ka meh, fab wun abibi ka ijibineh ne abon bineh. ²⁹ Fenghe breh atuu fonor ikpe baga nya mbor ba bongho, inonob ijol ka anemba ikama bel ne alingha nya ika fonor mbel, ne abel nya ika fonor alip ulege mbon. ³⁰ Ngha mbor ba kpebe mbongho ka igboro ngole gbor yedeh wurr neh mon ngole bolo wurr. ³¹ Jolor mbor lemor abodo nya na ite ireror yerii, nanor iba jolor igara nti iba kpogor.? ³² Aneblome mbagor, akaga fem ishibal, itabeh tum yi yoleh. ³³ Igara nti mbor balor gor idi nji mbor kogor ne "Skull", mbor ba yoleh ngho, akaga fem fonor nwereng ngor uboblome beh, nwereng ngor ubobkal beh, ³⁴ Jesu ba bong Ada, bak bor tep ne mbor yim ijome ji momeh lem Ngho igara ntor mbor ba yege ane yor bak awuror yeh. ³⁵ Ane fonor iyeme yor yen na atol fufene iyolor yor nyorgeh fenghe bong, anogor ane mbagor, nor anog ijibeh, jolor areror Christy Ishor iyiyige ne. ³⁶ Ba gomgomoe iyor yoleh fufene yor jen kluleh, yor ka-eh alolole lip. ³⁷ Fenghe bong, jolor areror Ntol Jews nog ijibah. ³⁸ Iyornor ijolor ngho ishi jen fufene, "Ntol Jews yor ngha. ³⁹ Nju nwereng weh kpagor ngho yor toeh yor bong, wor Christy shangha? nok ijibah ne wurr geh. Wegor ba tern tugor, bong wor ⁴⁰ ayom beh Ishor, tep ne ayop nene fufene idi mbor yaga wurr yoelor? ⁴¹ Ililak nor wurr ujol ngha, tep ne ukpi yene nti ilagor inyor umeh yen ngor isha-shab nleme yrer. Ka nenom nya alemum ijome-jome ji ishabor. ⁴² Ngha igara ntor aba bong, Jesu, boro gum meh igara nti ayelor gor ikun-iborr ba. ⁴³ Jesu ba bong neneh, "Itembaga mkpi bongho ka, ilela aba jolor ne nama ngor ikun-iborr. ⁴⁴ Ngha tiga itumor gor nkar inka irara yi ne igorr, ngho ijinghe iba bolo ndege waa teh-teh-teh lomoe gor nkarinka irumugole nyi ne fomfo. ⁴⁵ Na njole nimor ngha igara ntor mbomor ikun-iborr ba bak idibal. ⁴⁶ Yor rerr ne igboro ilome, Jesu ba bong, Ada mbu fenghe ne ufu bama kaka ngho ubor. Igara nti abongho nta, aba kpor. ⁴⁷ Igara nti ne Centurion yenor nti ibejol, aka Ishor ntege yor ba bong, itembaga, nenom wengha jolor innonob neh. ⁴⁸ Igara ntingho igom ane feb mba ibalor igara ntring nor mbor ba yen ne amerr bor iyen abaga nya ibeh jol, mbor kror iyor rome ijibor abor ngor abel. ⁴⁹ Ane waa mba iyileh, ne anebkal mba itoneh gor Galilee, iyeme feh, yor yen abaga nya. ⁵⁰ Ngha ijolor nenom weh mbeng ye jolor Joseph, weh bagor jumor ngho igom anemba ilameh. Ajolor inonob neh, ne nenom weh ka kpelor ibebe. ⁵¹ Nenom wengha tamum ngor lamabor ne nleme. Ayuror gor Arimathea, ibugor Jews, fenghe yor cheb ukun-iborr Ishor. ⁵² Nenom nya na alomor idi Pilate, bib gum ngopji Jesu. ⁵³ Abo meh ngor ndege gba-eh gor inonob mbomor, fenghe kageh ngor ulim mbi ikpalor gor utal, ngor idi nene kabor ti yiyel. ⁵⁴ Ijolor ufomfo logo-ngopji, ne ufomfo regeh asheh ishaga ikped-ikped nor ikeb. ⁵⁵ Anebkal fonor mba ibalor ne Jesu ngor Galilee itonor yi yen ulim fenghe yen na ngopji nongho. ⁵⁶ Mbor ba kror yi loke abodo lilam ne akurr. Ngho ufomfo regeh asheh mbor ba regeh gara gor mbene Ishor.