¹ Uwe, obhughe bhintu bhisemeye omunjeghesiya esemeye ya kidini. ² Oghambile abhasasa bhakulu bhakwetaghibhua kubha bhantu bhatekane, bh'etayamu bhitinisa, bhadoti, bhaikilije, mumakundane kandi n'omukugumisilija. ³ Kilaghibhuwe abhakali bhakulu nabho enja y'okwesemelia bhabhe n'okwoleka bhitinisa, bhatabha na mbugha mbi, bhat'ekola kubha bhatamili bha maluwa, kyonka bhahanuli bhalungi n'omukighendeleluwa kya kweghesiya, ⁴ omu kighendeleluawa kya kutendeka bhana bh'obhukali kukunda bha bhali bhabho na bhana bhabho, ⁵ kwechuleja, kweyonja, kukola milimo syabhufumbu, kubha bhalungi, kudotela bha bhaliye bhabho, nukuwo kighambo kya Luhanga kitasemanguwa. ⁶ Ohanulile abhatabana kubha n'ebhitekelejo bhilungi, ⁷ nuweyoleka mubhantu bhona kubha kyakuloleloho omu bhikoluwa bhilungi, nonaha njeghesia eghi esemeye n'eghi ebonganuwe, ⁸ ebhughe lisemeye, litali na bhisoghose, nukuwo omuhakani atabhanguke na abhuluwe bhintu bhibi bhya kubhugha ali etuwe. ⁹ Ohanulile abhakoli bhadotele abhaguda bhabho, kubhadedeluwa mu bhuli kimuwi, bhatakuhakangana nabho, ¹⁰ Bhataba kintu na kimuwi, noo nibholeka obhwesighibhuwa obhusuliye kimuwi, nukuwo ekighambo kya Luhanga Mujuni watu, kitebhuwemu kitinisa. ¹¹ Nangaa ngughuma sya Luhanga, ensulo y,okujunuwa kw'abhantu bhona, sikeyoleka. ¹² Sikutweghesiagha kulekana na bhukafwile na kweghomba kw'ensi, na kukala omu bhwele bhw'obhwalo kukwamangana n'aamagheji, majima, na kwobhaha Luhanga, ¹³ tunalindiliiye kuniila kulungi, n'okweyoleka kwa maani gha Luhanga Omunamulito na Yesu Kilisito Omujuni waatu, ¹⁴ Akehayo ha bhwatu nikuwo atujune kulugha mu bhibi bhyatu bhyona, n'okwekolela ehanga liye lyeleiye naye enini na e lili n'okwehayo bhwebhikoluwa bhisemeye. ¹⁵ Obhughe ebhighambo bhini, kutamu bhantu maani, na kutanuka n'obhutoki. Na muntu atakughaya.