¹ Obhasukiye bhabhe ansi y'abhachui bh'emisango n'abhakulu, kwebhundalia, na kubha habhwele bhwona ha bhikoluwa bhilungi, ² Kutabakisiya muntu, kubha w'obhisinge, kubha bhantu bh'agatigati mu bhyona, kubha bhadoti mu maso gha bhantu bhona. ³ Nanga etuwe bhona, tukabha tuli mpughe, ntaghuwa, bhantu bhaabhuliye tuli hansi ya bhuli kweghomba, na kw'eghomba kwona kw'omubhili, ntu tula omu bhibi n'omu kweghomba, tulibhakw'ohuwa na ntwohana. ⁴ Noo, obhu bhulungi bhwa Luhanga Mujuni waatu na makundani ghe ewatu, bhyabhonekiye, ⁵ Akatuchungula, teli nanga ebhikoluwa bhya majima twakoliye, noo nanga bhw'engughuma, kusalila batisimo y'okubhywaluwa bhuhyaka n'okw'ongelebhuwa omwoyo alukwela, ⁶ oghu atuseseeye omubhnji kusalila Yesu Kilisito Mujuni waatu, ⁷ Nukuwo, tukabhaluwa bhihikiliiye kusalila engughuma siye, tubhe, omu kiniila, bhagwetuwa bha bhw'omeja bhw'ebhilo n'ebhilo. ⁸ Ekighambo kini nky'amajima, kandi okitoo maani nikuwo abhahikiliije Luhanga nabho bhatoo kulu n'enkokolo kukola bhikoluwa bhilungi. ⁹ Olole ekisemeye n'ekibonganuwe mu bhantu. Kyonkaa mwelinde mpaka sya kidoma, kuhakana bhyambele bhyabhataata bha bhantu, kutongana, mpaka sikwetoo bhilaghilo; nanga tasili na maghobho kandi tasili na mughaso. ¹⁰ Wetantalee muntu wena oghu akuleta kweghabhanija hanuma ya ku muhabhula limuwi keda kabhili, otatoda kukala naye, ¹¹ Ona maniye ngoku omuntu w'omuling'oghu amaliiye kuhabha, kandi asiisa na kwesingisiya musango enini. ¹² Obhu ndikutumila Alitema keda Tikiiko, wanguwe kunsanga e Nicopoli; Nanga hala niyo nabaliye kusaliliy'ekilogholi ky'embula. ¹³ Obhu Zena, Dakitali omu bhilaghilo, na Apollo bhakubha mbabhunga, otabhululuwa kubhabhohela ntanda nukuwo bhatabhuluwa na kantu kamuwi. ¹⁴ Ebaliye abahatu bheyeghesiye kukola milimo silungi habhwa kumala bhyetaghiso bhyabho bhyabhwango bhwango, nanga bhabhe bha mughaso. ¹⁵ Bhoona abhali nanje mbakulamukiya. ninkeeliya abhatukundiye omu nikiliija. ngughuma sibhe n'enuwe bhona.