¹ Hanuma y'ebhilo bhikee, Yesu ataha e Kapelenaumu na bhakikenga ngoku ali omunumba, ² Bhegumbania kibula kikaniye kya bhantu ha jighati halulengo lwa kubhuluwa bhutahilo. Nabhatebheja ekighambo. ³ Bhantu bhas'ewe kumuletela muntu aghenagheneuwe, ahekebhuwe na bhasasa bhana. ⁴ Obhubhuluwe mulingo ghwa kumukidoho, nanga okukana kwa bhantu, bhatobola olusuwi lw'enumba ambali abhaghaa asitamiye, dumbi ambamukoteliya a kuhulu hamui n'obhulili bhuwe. ⁵ Yesu, abhona eniliija yee, aghambila omughenaghenuwa: Mana wanje, bhisobhi bhyawe bhyaghanilibhuwe. ⁶ Akabhaliyo bhamui bhabhahandiki, abhaali bhasitamiye mbeebhuliya mukati kabho: ⁷ Habhwaki musas'one nabhugha atio? Asemangiye Luhanga. Niani aghu angughanila nsobhi, atabhaye Luhanga enka? ⁸ Yesu, kusalil'omutima ghuwe, akenga ebhi bhelilikanagha munda yabho. Abhaghila ati: Abhuwaki mmwelilikana mutiyo om mitima yanu? ⁹ Nikyaha kili kikulu, kuhambila omughenaghenuwa: Ebhisobhi bhyawe bhyaghanilibhuwe, hamui na kughila nti: Uwe muka, Kwat'obhulili bhwawe olubantange. ¹⁰ Habhweki, kikubaluwa mukenge ngu Mana w'omuntu ali omunsi n'obhutoki bhwa kughanila ensobhi: ¹¹ Nkulaghiye, naghambila omughenaghenuwa, Omuke, Heeka obhulili bhwauwe, na oghend'ewawe. ¹² Hala nahonaho, Amukaa, Ahek'obhulili, nakutuwa mu maso gha bhantu,tooli bhona mbasweka na kutandika kuha Luhanga kitinisa mbaghila bhati: Tatukabhonagha kitiyo. ¹³ Yesu natwela mubhuhyaka aluhande lw'enanja, Ekibula kyabhantu kyamwisoho naye natandika kukitebheja. ¹⁴ Na nasaala, abhona Levi, mutabhani w'Alufaayo, asitamiye omusika kyabhasasuliya bh'emisolo, amughamba: Onkwame. Levi amuka na kumukwama. ¹⁵ Ngoku Yesu analiaghaa omunumba ya Levi, kigambi kya Bhaholiya bh'emisolo, n'abhankoli bh'ensobhi, mbatandika kuliya nabho hamuwi na bhakwamilili bhe: Nanga bhakamukwama bhakaniye. ¹⁶ Abhahandiki n'abhafalisaayo, bhaakamubhone naliya na bhaholiya bh'emisolo n'abhakoli bh'enso, mbaghambila Abhakwamilili bhe; Habhwaki naliya n'okunuwa n'abhaholiya bh'emisolo n'abhakoli bh'ensobhi? ¹⁷ Obhu Yesu abhaghuuye abhaghamba ati: Tibhali abheighuye kulungi bhongubala omugegi, noo abhaluwaye. Tinasiye kubala abha majima, kuyoho abhakoli bh'ebhibi. ¹⁸ Abhakwamilili bha Yohana na bha Bhafalisaayo bhasibhaghaa. Mbasa ewa Yesu kumubhuliya: Habhwaaki abhakwamilili bha Yohana hamuwi na bha bhafalisayo mbakusibhagha, kyonka abhaawe bhatasibha? ¹⁹ Yesu abhakukamu: Bhabotu bha kisweela bhongusiibha bhatiya analinabho? Bhanabhoone kiswela, tibhanguguba kusiibha. ²⁰ Haliyo ebhilo ebhi Kiswela bhalimutwala, na nibhuwo ekilo kii bhalisiibha. ²¹ Muntu tangubandika kihande kya suuka mpyaka alughoye lukulu, nanga ekihande kihyaka kikusaaliya maani olughoye lukulu, tii ndwatemukiye ekitemukile kikubha kyakabi. ²² Na muntu tanguhisiliya nsandi mpiyaka omu mulinga ghukulu, nanga nsandi mpyaka eghukumuula, dumbi ensandi n'omulinga bhyona bhibiye; kibaliye kuhisiya nsandi mpiyaka omu mulinga ghuhiyaka. ²³ Kyahikoo, kilo kya sabiite, obhu Yesu asalila omu musili ghwa bhuluwe . Bhakwamilili bhe, mbanasala, mbatandika kubhunogha. ²⁴ Bhafalisaayo bhamughila bhati: Habhwaaki mbakola ebhintanguwe kilo ky'esabite? ²⁵ Yesu abhkukamu: Tamukasomagh'oo ebhi Daudi akoliye obhu abhagha mu kyetagho na njala emukwete eye na bhantu bhe; ²⁶ Habhwaki obhu aatahiye omu numba ya Luhanga omu bhusumi bhwa mubhembi mukulu Abiatali na kuliya emigati y'ebhibhembo, eghikabha eli ya kulibhuwa na bhabhembi bhoonka, na natoda kughabhiloo abha abhgha nabhoo! ²⁷ A kwongeloho, abhaghila ati: Sabiite ekakolebhuwa bhwa bhantu, noo bhantu tibhakolebheuwe bhwa sabiite, ²⁸ nikiyo kilekiye Mutabhani w'Omuntu ali Mukama w'esabiite.