¹ Kitabho kini kibhughiyo enjili ya Yesu Kilisto, muana wa Luhanga. ² Nguku mulangi wa Isaya ahandiikiye ati: ntumiye mutumuwa wanje ahikiliye, kukutekaniliya kihanda atakasiye; ³ alisa nalangilila omwelungu ati: mutekaniye kwisa kwa Mukama, mughomole ebhihanda bhiyee. ⁴ Mutumwa oghu Luhanga atumiye, ni Yohana mubatiji, oghu akasa omwelungu nabatija kandi nalangilila ati bhekukemu na bhabatijibhuwe nikuwo Luhanga abhaghanile bhi bii bhyabho. ⁵ Kyalo kyona kya Yudaya n'abhaakali bha Yelusalemu bhaghendagha kumutegheleliya, mbekukamu ebhi bii bhyabho, bhabatijibhuwa omumasi gha Yoladani. ⁶ Yohana abhagha na lughoye lukolewe omubhyoha bya nkaina na muchipi ghwa luhu mumighelu. Aliyagha nsinini na njoki. ⁷ Alangagha ati: oghu akwisa andabiye ansaiye bhutoki, kandi taniikiye kubha muhelelia wee, nin'ehonilaniya ensi ya nkaito siye. ⁸ Siye nibhuwo na batija omumasi, noo eye, akubatija na mwoyo ghuikiliye. ⁹ Obhele obhu, Yesu alugh'e Najaleti omukyalo kya Galilaya, Yohana amubatijila mumasi gha Yolodani. ¹⁰ Amakalugha ati mumasi, abhona eghulu lighulikiye, no mwoyo ghu ikiliye ngusunduka nga kibimbo. ¹¹ N'elaka lyalugha omweghulu ndighila liti: niwe muana wanje nkundiye, oghu neededeuwe. ¹² Dumbi, mwoyo ngutuala Yesu mukyelele, ¹³ mbali akoli bhilo Makumi ana, mulimu ngunamulengesa. Aakalagha na nama sy'omukisaka na bhamalaika bhasa kumukonyela. ¹⁴ Anuma ya Yohana kukwatuwa mukomo, Yesu aghenda e Galilaya, natebheja yo enjili ya Luhanga. ¹⁵ Aghila ati: obhwele bhaikiye, bhulemi bhwa Luhanga bhwaikiye, mwekukemu kandi muikilije njili ya Luhanga. ¹⁶ Nguku Yesu asalilagha akisiyo kya nanja ya Galillaya, abhona Simoni n'Andeleya, nduku wa Simoni, mbategha bhutimba munanja, nanga bhakali bhali bhakomani bha nsui. ¹⁷ Abhaghila ati: munkwame, na nkubhafola bhakomani bha bhantu. ¹⁸ Dumbi, Simoni n'Andeleya bhatigha bhutimba bhwabho, bha mukwama. ¹⁹ Amak'esukan'oo kabii, bhabhona Yakobo nawanina wee Yohana bhona bhana bha Jebedayo bhali omubhuati mbaghomola bhutimba bhwabho. ²⁰ Dumbi, abhabhilikila, na bhatigha esebho Jebedayo n'abhakoli bhe omubhuati, na bhamukwama. ²¹ Yesu nabh'eghesebhuwa bhe bhakida mukibhugha kya Kapelenaumu.Obhu ekilo kya sabato kyaikiye, Yesu ataha dani omuelamiliyo na eghesiya. ²² Bhaswekela kimui kughuwa ebhi akwete kweghesiya; nanga eghesiyagha nga muntu ali nabhutoki atali nga bheghesiya bha bhilaghilo. ²³ Musasa oghu kilimu kikwete akabha ali omwelamiliyo eli, dumbi atandika kutakangana ati: ²⁴ uwe Yesu owomukibhugha kya Najaleti mbiki bhili agati yatu nawe? okutubhuniya kii? wasiye kutubhuliya? nimaniye nuwe oghu aikiliye wa Luhanga. ²⁵ Yesu atanuka ekilimu, ati: oholiye, kandi omuloghoo. ²⁶ Ekilimu kya tukumilila kimui, dumbi kyalugho omusasa oghu na mani kandi nkinatakangana. ²⁷ Bhantu bhona bhasweka, bhaatandika kubhulaniya bhati: kini nkikii? ninjeghesiya mpyaka! Omusasa oghu akulaghilagha na bhutoki wabhona akubingaghoo bhantu bhilimu, kandi bhimughuwa! ²⁸ Na makulu gha Yesu ghamalakaka kibhugha kya Galilaya kyona. ²⁹ Amatuha omusinagogi, bhakaghenda na Yakobo na Yohana omukaa ya Simoni n'Andeleya. ³⁰ Mukuwe wa Simoni akabha alangaye alwaye muswija; dumbi bhaghambila Yesu. ³¹ Amuikohoo, amumukiya anamukwete aamukono, dumbi ala muswija ghwa mukila. Na abhaha bhyokuliya. ³² Lwagholo, musa ngwa kotiye, bhantu bhatandika kuletela Yesu bhalwaye bhabho nabha bhilimu bhikwete. ³³ Bhantu bh'omukibhugha bhekumaniliya bhekumaniliya amulyango ghw'enumbe eghi. ³⁴ Akiliya bhantu bhakaniye abhabhagha na malwaye gha mulingo ghwona; ahuma bhilimu bhikaniye, na tabhisimilaniye kubhugha, nanga bhikali bhimumaniye nguku ali mana wa Luhanga. ³⁵ Kinsakiya, bhunalilane, amuka, n'atuwa kughenda omulwelele , mbali asabhiye. ³⁶ Simoni n'abhabhagha naye bhaghenda kumubala; ³⁷ obhu bhamubhone, bhamughila bhati: bhona mbu bhakubala. ³⁸ Abhakukamu ati: tughende hanji, omu mubili oghulabane naghuni, ntebheje yo dee; nanga eki nikiyo kyalekiye nasa omu nsi. ³⁹ Kandi naghenda kutebheja mumalamiliyo gha Galilaya, nanabingoo bhantu bhilimu. ⁴⁰ Musasa alwaye ntumbi namwisoo; atelia, amwesengeliya ati:gutu onseniye. ⁴¹ Yesu, amukwatuluwa kisa, ananula mukono ghuwe, amukumoo, n'amughila ati: mbaliye okile(osene). ⁴² Dumbi ntumbi ya mulughoo, kandi akila. ⁴³ Yesu amulagha naho naho, kandi amukonkomagilila, ⁴⁴ amughila ati: otaghambila na muntu n'omui; noo oghende wegholeke ow'omubhembi akulole nguku wakiliye, kandi ohe kisembo eki Musa alaghiye, nikuwo bubhe nga bhukahiso bhwabho. ⁴⁵ Noo omusasa oghu aghenda alalangiya makulu agha, ekyalughiyemu Yesu ataguba kughenda benibeni omukibhugha. Akalagha enja, amu bhikalo bhya lwelele na bhantu bhalugho honahona bhamuisoo.