¹ Mulole ngoku Esetuwe atukundiye, etuwe kwetuwa bhana bha Luhanga! Kandi majima tulibhana bhee. Ensi ekakubha etatukengiye, ni bhwakubha ti yaamukengiye. ² Bhakundani, endindi ngoku tuli bhana bha Luhanga, takikamanuwe nangoku tulibha; noo, tumaniye ngu obhwele obhu kilimanukuwa, tulibh'angaye nanga tulimubhona ngoku ali. ³ Kandi wena oghutagha kuniila kuwe om'eye akweyeliagha ngoku kilisito eliye. ⁴ Ti muntu wena oghu akukalagha nasobhiya akubhagha noleka na ngoku ahendiye kilaghilo kya Luhanga nnanga kusobhiya ni kuhenda kilaghilo. ⁵ Kuni, mukikengiye, ngoku Yesu abhonekiye kuyoho ebhibi, na omuye taliho nsobhi yona. ⁶ Wena oghu akukalagha omuye, tangukola nsobhi, ti oghu akukala nasobhia takamubhonagha kandi tamumaniye. ⁷ Bhana bhato, muntu n'omwi atabhadimaga. Oghu akukolagha ebhihikiliiye ngoku Kilisito aikiliiye ali na majima. ⁸ Oghu akukolagha nsobhi ni wa mulimu, nanga mulimu ghukatandika kukola nsobhi mu ntandiko. Kighendeleluwa kya kwisa kwa mana wa Luhanga ni kuhajanga bhikoluwa bhya mulimu. ⁹ Wena oghu abhyauwe na Luhanga takukolagha nsobhi, nanga nsigho ya Luhanga eku mukalagha mu; na takuguba kukola nsobhi, nanga akabhyaluwa na Luhanga. ¹⁰ Ala niyo bhana bha Luhanga na bh'omulimu bhakenguwagha. Wena oghu atakukolagha majima taali wa Luhanga, kandi noghu atakundiye munakiye. ¹¹ Nanga ebhi bhabhalangiiye n'ebhi mwaghuuye kuila mu ntandiko, ni kughila ngu kibaliiye tukundangane, ¹² na tutasusa Kaini, oghu akabha ali wa mulimu, at'owanina. Na akamwita bhwaki? Nanga ebhikoluwa bhiye bhikabha bhili bhibi, ebhyowanina wee bhiikiye. ¹³ Bhahikilija bhanakyanje, mutasweka nsi eni kubhooha. ¹⁴ Etuwe tumaniye ngoku twalughiye mu luku twatahaa mu bhwomili, ha bhwokukunda bhahikilija bhanakyatu. Ti oghu atakundiye mwanakiye akukalagha akuye. ¹⁵ Muntu wena oghu ohiye munakiye ni mwiiti, Na mukimaniye ngu taliyo mwiiti n'omuwi oghu alitunga bhwomili bhutalihuwo. ¹⁶ Tukakenga makundane, akubha nahayeyo obhwomili bhuwe a bhwatu, natu kibonganuwe tuheyo obhwomili bhwatu bhwabhanakyatu. ¹⁷ Baitu muntu nabhaye ali n'etunga ly'ensi ini ti abhona mwanakiye abhululuuwe noo abenga kumughwila kisa, kukunda kwa Luhanga kungubha kuli mukati ke? ¹⁸ Bhana bhato, tuleke kukunda mw'ebhugha lyonka n'aakilimi, noo mubhikoluwa n'amajima. ¹⁹ A bhweki tulikenga ngoku tuli bha majima, na tuligumiya emitima yatu mumaso ghe; ²⁰ Nangaa mutima ghwatu ngwa tusoghosiye, Luhanga mmunamulito kusaliya mutima ghwatu, na amaniye bhulikyona. ²¹ Bhakundibhuwa, mutima ghwatu ghutatusoghosiye, tuli na bhwesighibhuwa mu maso gha Luhanga. ²² Bhyona ebhitukusabha, tukubhitunga kulugh'ewe, nanga tuhondeye bhilaghilo bhiye na tukukolagha ebhimudediye. ²³ Na kini nikiyo ekilaghilo kiye: Tuhikilije mu lina lya manawee Yesu Kilisito, na tukundane, kukwamangana n'ekilaghilo eki atuhaye. ²⁴ Oghu ahondeye ebhilaghilo bhya Luhanga akumukalamu, na Luhanga omuye; na tukengiye ngoku atulimu kusalila mu mwoyo oghu atutighiiye.