¹ Asungila-li, badhami, ngaa ma boibodhusi angasu sinde boanga botambela nee na kondisa la Mokonga, na indo wa ande inde bokola, beenomema na boolakelaga la nganu a ina Mokama nde masu Yeso, bogee mosa hele atambela lanu. ² Ngama boubha, maano sina inde beibenopi toa lang'amenasu Yeso. ³ Inde Mokonga akaba, ande boobhumisa a meema nu; bomae dholo nabenu eteti; ⁴ kela n'to aubhe dhungila la nkeke ae a boobhumisa na bootongananisa, ⁵ boodoleanai a bosebose nda djede sinda bande ndaga banebei Mokonga; ⁶ on'kolelai meno dhao budjede na ngee ndemagalaae, beeno ngodea nde bete Amenasu Auma aekonga bande bakola indo. ⁷ Ngaama Mokonga ndaga ai aasokogi nde abudjede, che a boobhumisa. ⁸ Imbe akomi maano nde ndaga n'komi nde n'to, che Mokonga, imbe ayanopi nabenu Meema ndae Nd'Abhu. ⁹ A inda ekondi'etoba, ndaanga beeno saela go; ngaaye meno bogoli kondana anga Mokonga, ¹⁰ na nde nde bookolela bande ba Makedonia. Beelakelaga anganu, badhasu, bobe tondo asub'ekondi nde. ¹¹ na bosikise a boohohia, na bokola mobili ndanu, na bokola mobili nadjaga nu, sinda bei beeno hangii, ¹² ngaa botambe na lokengo anga bande baiki na n'senge, na bobai na bungu la n'to. ¹³ Inda bekondi, badhami, bodje na ebhobho a mbino'a bande baale, ngaa bogai bosusumana sinda bande bangboo bande ndaga bana maha. ¹⁴ Ngaa, naye belebei sinda nde Yeso ai aku na abai a djudjua, bolebee go sinda nde Mokonga ama ebhia na baku an'kindi na Yeso. ¹⁵ Bolenge, impa inde beeno ngodea aya lengeleli yonga la Mokonga: besu nde bebeli, betigi na bebondeli bhia la Mokonga, indaga uma beteisa mosa la bande ai baku. ¹⁶ Ngaa Mokama li ye mene, ama kinda toa la na kobha na molondo, na molengea mangese, na baluma nda Mokonga; na bande ai baku asuba Klisto ama bakengetisa djudjua. ¹⁷ Mbusa inde, besu nde beonea, besu nde bema betiga, bama basobheneta besu bobhu na ibo na mpena gaa tulana la na Mokonga na kobha, na iwa beuma ba an'kindi na Mokonga. ¹⁸ Botabelaneye in'to na ndaae ayonga ndo.