¹ Ka gərne aɗa nən gazgara bai. se de ka gabɗakshi ka ki mayauwu. A gabɗi mapindawad kaki yaganauccin ² A gabɗina gwangurauccin amatau kaki miwanuccin gamaɗ, dababkin kaki yaganuccin gamaɗ ikun be bəlan. ³ A sasakci i gudugwamccin, gudugwamccin ki jirewa. ⁴ Amman gudum mina kwithlai ko kakanccin, akshi da jəba tatika marim kwina ikun yagananin shi. Akshi da jəba tatka be bəlan i gazgaruccin shi, gaɗa Kakasəku akəmu ka raggu. ⁵ Amman gwangurak ki jirewa mi getak gara, dampa gizhi gara iɗak Kakasəku. Fatawanke asukuna a wili na magita dəvid na afa. ⁶ Amman ama mi ntu karak nabai mutən gara, ko atu na aro. ⁷ A thlam wazik bitiku gaɗa da thlaba bi nanga bai. ⁸ Amman nən me adumu biyata ki jikti yaganauccin gəri bin, musamman yal wənduwa gəri,thlan na gamɗaya bar jirewa gəri, wate ngara nən me a ɗiga bai iɗa gəri. ⁹ Aama a thlab gudugum bai se thlan aman gumu-zədu (60), aama mi misək gayi. ¹⁰ Ndaz gatu na wananin canduwa, gaɗa da shalina kwthli gara, ko atu mi gini magirafccin, ko mi viya zəgir magirafccin, ko mi banata ndawa mi nda ravanshi, mi dawa aɗa ikun thlama be bəlan tawanke. ¹¹ Amman i aɗak gudugwamccin dababkin kwadawakshi kun naa bai. Gaɗa aviginakshi kun ntau ki təka kwina mi ate funa gayi bai na Masihu, a ntutina zəba. ¹² Da ritiku ne akshi chachpuna ngubta i aɗakshi thlathlana alkawarshi ki səkur. ¹³ Thlan na hal ki taski kwina, ayawo wənduwa-wənduwa. Akshi athlaba taskin jab bai. Amman har a thlaba ndak rubu-rubu ndak tife kun be akshi zigabai, ndak akaktəka. A rama be atu bai. ¹⁴ Gaɗa kasau, nanci gudugwamccin mi akun awayukshi da thlan zəba, da yawi kuthlai, da ankalci na wənduwa, gaɗa da bara lakwtu nda nangawa na wana kəmangar bai. ¹⁵ Gaɗa jəgab na bai thlag dinakshi aɗiga lisper. ¹⁶ Inde aama mi ɗiga na gudugwamccin nin da tambakshi gaɗa dampak dukshi iɗa Iklisiya bai, gaɗa Iklisiya dabanaci gudugwamccin ki jirewa. ¹⁷ Gazgarauccin me a garva bəlan kalkal nda barici marum kwina zəgir shirin, musamman ndawa mi a wana na marnyi bəlan na ndak gugza in dawa. ¹⁸ Atiro rama Suku ma, "Kwaɗawa chambi i miyak thla lakwtu mi a dika au nin," gada "ngawanak kalkal nda bari ci miya nginpu gəri." ¹⁹ Ka gəna na gabai i aɗak nən gazgara bai se na saidadin shirin ko kwan. ²⁰ A girnyi i aɗa ndak aibu i kəma tiye gaɗa gagizhingu dakəmi kalau. ²¹ Na nibkakun na Səku, na Masihu Yeso, na melakawaɗ mi nda chikɗu, a digi kayidadin tuku banda thlimiɗ dlugun, kwa thlama tanke na bamabmta bai. ²² Ka thlama wuzgaya pi ammai i aɗa ginən bai. ka nipka aɗaci ikun aibuk ɗagai bai. Ari adaci ikun canduwak thlama. V 23 Ka ta kəma bai na sa amm fau. Amman i sirim sən asi amm inabi rab gaɗa kunaci na gawa dagas ci. ²⁴ Aibun ndo jigab datatika, a patata tun da hagatakshi. Amman ndo jəgab aibakshi aɗiga akau. ²⁵ Kasən ke ndak thlama wana bəlan wanakshi a patata, amman jəgab adibis bai.