DCS-Mirror-krispy_ged_mrk_text_ulb

Usula Tọva

¹ Ifalisiyawa nu banị ibe ga ka ne, nbe fu nu Ulusẹlima. ² Ba pa batsagba yọ Uyesu nba li ibe bée ibo ga sọ. ³ Gebo gẹ̀dẹ, Ifalisiyawa nu Uyahudiyawa nẹ, ba sọ'u ibo tse'a nba li ibe, gebo ka gẹ̀dẹ ba fulu a ba ibe izizi ya batinibo yaba. ⁴ Nde Ifalisiyawa be fu ngigyẹ nbe be bana'a sọ iwụ, tse nba li ibe. Ibe imẹ nba gini a mẹ tẹ̀; ẹ vu'u ukopi ga nyini, nkpaki ga nyini, nu ibe idẹ ne nu nu ibe gali nẹ. ⁵ Ifalisiyawa nu banị ibe ga ka nẹ, byi Uyesu gẹ̀dẹ, ngyẹ iyi nbatsagba yẹnyẹ a fulu'a ba ibe izizi ya batinibo la, gẹ̀dẹ ba li ibe be'a ibo ga sọ? ⁶ Nde u uwụlụ ba gẹ̀dẹ, anabi Isẹya, gẹ̀ lika nu lutu kẹnẹ gẹ̀dẹ nyinẹ vu banị gatime ga me ka iyapụlị. Gebo gụyẹ nnyinẹ a vini a gimi, nde iye yẹnẹ nya likpa nimi nẹ. ⁷ Nyịnẹ a vini a gimi sá kili, nde nyine a ba ibe iziz ya banị yapụ. ⁸ Nyine tse ibe izizi yọ Usigapa fene nnyine a mẹ ibe izizi ya banị yapu. ⁹ Nyine tse ibe izizi yọ Usigapa fene, nnyine a ni ibe izizi ya banị yapu mọ gubo. ¹⁰ Si gẹ̀dẹ, Umusa ka gẹ̀dẹ, gọngọ a fulu a ba "Ada ana nu Nma ana nẹ", unị umẹ u kyẹ Ada ana nu Nma nẹ, ugọ gẹ̀dẹ a wụ'a. ¹¹ Nde nyinẹ gẹ̀dẹ, gbyi ibo ga dẹ kẹnẹ, ana'a gi Usigapa (ukumba), ¹² Gebo guyẹ tẹ̀, nnyinẹ gia ganu gẹ̀dẹ, uga mẹ gyẹngyẹ gi banị imẹ nba mọa tẹ̀ la. ¹³ Nyinẹ a su ibe yọ Usigapa zi gyẹngyẹ la, gebo ka ibe izizi yẹnẹ. Ni ibe idika imẹ nnyinẹ a mẹ tẹ̀ nẹ. ¹⁴ U vala gedu ka banị ugẹ ba gẹ̀dẹ, nyine a zi gutakpụ a wu mi, gi nyinẹ a wa gaba kọ ube umẹ nma gẹ̀ tẹ̀. ¹⁵ Anya ube umẹ nnyẹ wu nu gasẹ, gi uwa gigi nnyẹa vu uni byibyi te la, nde ube umẹ u fu nu ginye kọ unị tẹ̀ ugigi unị vu unị byibyi, ¹⁶ unị umẹ unya gutakpụ wea wu, wea wu. ¹⁷ Utu ume Uyesu nabo gedu u zwi gami tẹ̀, nbatsagba yana byia gẹ̀dẹ, ngyẹ uvu ga sá ka akizi umẹ uta tẹ̀. ¹⁸ Uyesu gẹ̀dẹ, nyinẹ a kpu ube umẹ n gẹ̀ tẹ̀ la? Nyinẹ kpu gẹ̀dẹ ube umẹ unị wu we zọa la na? ¹⁹ Gẹ̀dẹ u zwi wea kyẹ a fu. Ni lika gumẹ gbyi ibe ilili yi tsa. ²⁰ Ube umẹ uyi ni ginyẹ kọ unị tẹ̀ u we zoa. ²¹ Gẹ̀dẹ nu iye yọ unị, ibe ibyibyi a fu, ikilaki, ibe geyị, banị ga wụ, ²² ikilaki, unị gatsịla, unị iye ibyibyi, inẹzẹ, unị gufu, liboki, titọ aka nikpụkpụ, liwụlu. ²³ Gbyi ikikpa imẹ nba fu nu iye yọ unịyapụ, nba gini a zoa unịyapụ. ²⁴ U fu nnẹ̀ iyẹ, u gẹẹ tịzẹ kọ Usiya nu Usodomi nẹ. U zwi gami gudẹ̀, gẹ̀dẹ gọngọ a ga pa na la. Nde banị paa. ²⁵ Nde unyine udẹ̀ paa, umẹ ubyi unyineni ana nya liba ka alizini tẹ̀, unyine uyẹ wu tẹ̀, uba vini nu gezugẹ kana. ²⁶ Unyine uyẹ vu banị yọ Uteliniyawa nu Basulofikiniya. U gẹ̀ a gẹ̀dẹ̀ tsuku-tsuku dẹ mi ibo, gi nnyẹẹ a fune alizini yọ ubyi yẹ a kia. ²⁷ N beli gi nma gi bebyi yami ibe ilili tsea, gebo gẹ̀dẹ wa gọ gẹ̀dẹ a su ibe ilili ya bebiki a tse agi nbiki la. ²⁸ U wụlụa gẹ̀dẹ, nkpụ tẹ̀, nbiki ana li ibe ilili imẹ ikyẹ̀ ibo nu gubo ka bebiki tẹ̀. ²⁹ Gebo gẹ̀dẹ, nyẹa gẹ̀dẹ tẹ̀, a gẹẹ kẹnyẹ gami ubyi yẹnyẹ a sẹẹ. ³⁰ U gẹẹ gami ubyi yana ni sẹẹ. ³¹ U fu nu Usiya u tse Usodomi gee uteku ya ugalili gulekyé kọ Udikapolusi. ³² Nbe bene utsi gutakpụ umẹ uwa gẹ̀ lika anu la tẹ̀, nbaa saa ibo giwa sẹa. ³³ U fu ne'a ki gedu, u tse kikyẹ le nu gubo u ba'ana atakpụ, ugini da ga kulẹ kana. ³⁴ U pa nki u sẹnẹ gụwụ, ugẹ̀dẹ wu atakpu. ³⁵ Nnẹyẹ uwe wu atakpu. Ube umẹ ugigi uwa bi lika ga gẹ̀ la tẹ̀, nabo'a, nnẹyẹ utọpọ ya lika ga gẹ̀ sesele. ³⁶ U gẹ̀ ba gẹ̀dẹ nyinẹ a ga gẹ̀ gọngọ tẹ̀ la, nde ba gẹ̀ banị ni gedu tẹ̀. ³⁷ Uvu ba lika ka anyni, gebo gẹ̀dẹ umẹ lika sesele ugigi itsi atakpụ a wu atakpu, itsi ganu a gẹ lika.