1
Ufu gase ni nyiye ugee igame ile yana, batsagba yana nba baa.
2
Ko uzu wo aladi nu te kuwa topo lika gage te na nigakwa ka bani gabi te, bani nagadune wu lika kana dadama. Nba gede, inano uwa gatseni yilime? Nge vugakpo yilime ina kpo me te? Ngye vu lika dadama me ume nagubo kana ne te?
3
Avu na uvu ukapitala, ubi wa Umaliyamu se uni vuva wo Uyakubu nu Ujase nu Ujuda nu Usaminu la? Baniko yana bale ne nyi ne naa? Naba Uyesu maba ubame uwa seba nyi la te.
4
Uyesu ge ba gede, uni sako wo Sigapa ataba wa ga yaba ni ile yana, ni baniko, ni gami kana la.
5
Ina utaba bi gatime ka tsi gamela, nde wa tana gubo kana nu bani aba gayi giwa seba.
6
Gebo ko ga wolu kaba la, uwu na lika udadama. Uzwi ginye ko ile me uyi ba gwo te uwa tsini ba.
7
Uvala ubone-iva u fune ba iva-iva u neba gite, u giba ntsi nu gumunu byibyi,
8
ugeba gede, nyene ka su ubede nu tuzu kane la, ulugbo kili bege su ibelili ko ukapo su iku nu abayi yaba la,
9
nde ade adaba kili, bagade itogo iva nu iwu ya ba la.
10
U ge ba gede, sami gume nyene zwi nyene a damo gbogbo gi nyene a balike.
11
Nde ile me i nyene zwi mo agunela nyene a pyi gulili gume uyi na gine kene te giwa vuba lika sesele.
12
Nbage gage bani gede banabo akabibi game.
13
Be fune alizeni nu gedu ne, befo ba bani nba se ba.
14
Ugwele Uhilidu uwu te, gede liye ko Uyesu uvu ukpupa nu gongo. Bani a gede uvu Uyakuya nu ubatizima ulike nu bekune, gebo kana.
15
Bani de ba gine a gede, Iliya, bani dika ba gede uvu ude nu ginye ko anabawa ye ekiyekiye.
16
Ku Uhilidu wu te te ugede, Uyahaya ume nfuna lutu te ugini like?
17
Gebo ko Uhiludiya a mo Uyahaya de nu ubulusuna gebo ko Uhiludiya (unyine wo Ufilibusu uni kwaa na, gade uvaa.
18
Gebo ka ga gede Uyahaya ga Uhilidusu gede wa go gede wa vo unyine wo unuko yana la.
19
U Uhilidiya weye utumozi ume uwa wa te nde wa wala.
20
Gede Uhiludusu wa mo nzize wo Uyahaya gede ukpu gede uvu uni wo alimanki tsa. Gebo ka ga gede Uhiludu weye gede gyengye egetu Uyahaya la, nde ipisi ana ma tume uwu uwa'azi yana nugayi tene wone wu uwa'azi yana nu liyesi ne.
21
Uhulidiya uwo udama wo game ubeme uweye te. Ku uzu ume amoa te unu te, uzi gapya nu banime nba me gatime nu litse kana te, nu itinibo wo Ugalili ne.
22
U Uhulidiya ubyia na unyineni ubezi imu, usi u Uhilidusu nu baniza ya gapya kana iye ugwele byia gede gemi ubeme nyeyete nmagye.
23
U ga gede nu kukwasi ne ubeme nnye te magye, su gatsi iva ka litse kami magye.
24
U ge byi umana gede wa gimi ngye? Ugede lutu ko Uyahaya unu ubatizima.
25
Ukolegi bili ge nu ugole, uga gede meye gede nya gimi lutu ko Uyahaya nu ubatizima nu ugbami.
26
Lika giye mwo ugole, ka wage anula gebo ka ga gede ugya ganu be nu gegu ko baniza yana.
27
Ugole ne usoza de gite gede uga bene lutu ka Uyahaya. Uge ga tsa nu ubulusuna bene gi ubikinyine zu ye, ugene vo umana.
29
Ku batsagba yana wute te nba gesu gekiki kana gene ge pu.
30
Batsagba wo Uyesu wute nba ge gage Uyesu ubeme nbagame su ubeme nba tsini te.
31
Ugeba gede begeye nede wowo giba nde aze genyi, gede bani age nu gebene ba gaze tse gyi aba gede ibelili gali.
32
Nba zwi ukpa ko uzo ge ne uwowo de nu iwuyaba ne.
33
Bani paba ku bage te, nu gedu kpuba nba funu ginye ko ile ile nu akyine nu mo tse nbanu.
34
Ku ba nute upa gedu unukpukpu u mwo gunumgba kaba gede bayi ku ibe ikpakpa me nba nya unigeguba late, utopo wa ga tsini ba ibe ni gedu ne.
35
Utume uzu date, nbatsagba yana be woze na nba ga gede neme ile mete uvu unigewowo uzu ginida.
36
Nabo gongo giwa ge ginye ke ile ni guleke ne, gi uga si ibo ali.
37
Nde ugaba gede gine a agiba ibelili gibali. Uba ga gede yaga gawa uboki di wo usule nve bali?
38
Ugaba gede ubolidi gune nba nya? Ngine a gapa. Kaba gee gapa te nba ga gede ubuludi ito nu lugbotu iva ne.
39
Ugi bani ganu gbi gede ba dende negapa ko a bi susu.
40
Nba dende nu lukpolukpo, bani dika delideli, bani dika koma ibobo e ta.
41
Usu uboludi itu ni lugbotu iva ne. Usu uboludi ito nu lugbotu iva ne, unyine ikii uda a nibali ka, umiya gibaa ugini su lugbotu ugini tse ugiba.
42
Dudua aba ba li utse ba.
43
Be su imimi wo ubulodi, ukaki ubo ne iva lele, nu tsi tsi yo lugbotu ne.
44
Bani me mba lite vu dubu ito.
45
Nneye kukwa uge batsagba yana gede baga zwi gukpa ko uzo, nbe nea gezuge tse gi na salama gedu gume gine be.
46
Kyi bage te ugo lugu uga mee aduwa.
47
Uzu da te u gukpa yi ngaki gaki ko uzo udana ngapa ka lugu nsusu na.
48
Upaba nba lu ogu, afu awulu giba gi ba ge la. Uba nu gegigi ka yapu gaku nba pa uwa zutuzu ngapa ko uzo, uweye akye ba.
49
Kyi ba pa uwa zutuzu ngapa ko uzo te. N bani mele gede uvu abalatu, nbe sulegba ni gunyi ne.
50
Bapa te nzize moba. Nne ye kukwa ugeli ka niba ne, ugede nyine moliye gede avu nimi.
51
Uzwi ginye ka gukpa za ni ba na u afi ze game. Nlika guye ni dama ba.
52
Nde bawa gaba ko ubuledi ye la, gebo geye te iye ya ba yentse.
53
Kyi bo tsesa te be tize ka Ujeniselita nba do gukpa atsagba.
54
Kyi be fu ngiye ko gukpa ye te bani kpu gede uvu Uyesu.
55
Nde ba tsaki gi nni gesi ka ba, nba ni bene bani aba nginye kye igebene ya ba nu neme ude te.
56
Ni nneme uge, ko guleke ko ile bani ebene bani aba ni gige, nba sa ibo gede wa wolu gibani adaa guge kana gi ba wa gase.