DCS-Mirror-krispy_ged_mrk_text_ulb

Usula Ita

¹ N gene Uyesu zwi guza ka Aduwa, a nya unị́de umẹ'ẹ gubo kana vu káká tẹ̀. ² Banị́ dẹ̀ a nyinẹ'a gẹ̀dẹ wa sẹ'ẹ unị́ yẹ nu uzu ya aduwa nẹ, gi ba mọ'a nu lapyi. ³ Uyesu gẹ́ unị́ gubo káká guyẹ gẹ̀dẹ likyé gyengye ni gakigaki ka banị́. ⁴ Ubyi banị́ gẹ̀dẹ uyeliye gi a mẹ lika usesele nu uzu ya aduwa nẹ? Kọ lika bibi, a sẹ'ẹ unị́ ma, ko a wụ unị́? Nde ba yi kpọ. ⁵ U nyinẹ̀ ba ni ipisi nẹ, iye yana ni zo'ẹ gebo ka iye bibi yaba, ugẹ̀ unị́ yẹ gẹ̀dẹ tana gubo kẹnyẹ utana gubo, Uyesu na'a sẹ. ⁶ N gene Ifalisiyawa mọdẹ fu gẹẹ nu Uhirudu, nba gẹ̀ lika gumẹ nba mẹ gi ba wụ'a tẹ̀. ⁷ Ngene, Uyesu ni batsagba yana nẹ, gẹẹ ganu kọ uzọ unikpụkpụ, gedu unikpụkpụ ba'a u wa zwi Ugalili, nu Uyahudiya, ⁸ nu Ulusẹlima, nu Edom nu gezugẹ kọ Urudu, ni gegigọ kọ Utaya nu Usido nẹ. Nbanị́ ni gedu nẹ wu ube umẹ, u mẹ tẹ̀, nbe be'e uwe za ana. ⁹ U gẹ̀ batsagba yana gẹ̀dẹ, be ye gukpa kọ uzọ ukiki gebo ka gedu gumẹ, gi ba ka na tsu'a la. ¹⁰ Nde usẹ banị́ ni gedu nẹ, banị́ imẹ nba ba tẹ̀, a ye gẹ̀dẹ niba da. ¹¹ Utu umẹ unị̀ gumunu ubibi gumẹ u pá, wa kuluso gi wa goligba gẹ̀dẹ, nyẹ vu ubyi wa Usigapa. ¹² U gẹ̀ ba gẹ̀dẹ ba ka gigi gi'a kpu na la. ¹³ U go lugu uvala banị̀ imẹ uwe ye tẹ̀, nbe be we zana. ¹⁴ U fune banị̀ ubo nẹ iva uvala ba gẹ̀dẹ batsagba, gi be le na'a nẹ giwe né ba gitẹ, nba ga mẹ uwazi, ¹⁵ U giba ntsi gẹ̀dẹ be gu alizini, ¹⁶ utẹ́'ẹ banị̀ ubo nẹ iva, Usaminu ugi'a liyẹ gẹ̀dẹ Ubutulusu. ¹⁷ Uyakubu ubyi wa Uzabadi nu Uyahaya unị́kọ Uyakubu umẹ ugiba liyẹ gẹ̀dẹ Ubuwanazi, ba vu bebyi ya gagbana, ¹⁸ nu Andulu nu Ufilibusi nu Ubatalamawu nu Umata nu Utoma nu Uyakubu ubyi wa Halifasu, nu Utadawus, nu Usaminu Ubakananiye, ¹⁹ nu Uyahuza Iskariyoti umẹ uzunẹ Uyesu tẹ̀. ²⁰ U zwi gami, ngedu gii ba kpọ wa, nde ba wa ibe le la. ²¹ Utu mẹ nbanị́kọ yana wutẹ́ tẹ̀, nba gẹẹ nnẹ̀ yẹ, nba gẹ̀dẹ, wa gọ la. ²² Banị́ ibe gaka gumẹ fu nu Uluselima tẹ̀, gẹ̀dẹ gumu uwa mẹ'a tẹ̀, gebo gẹ̀dẹ, uvu uganibo ka alizini, uwe fune'ẹ alizeni. ²³ Uyesu vala ba, uta akizi gẹ̀dẹ, "Ngyẹ yi Usẹtan gini fune Usẹtan? ²⁴ Nde litsẹ uni tsí iva, litsẹ guyẹ a gyengye la. ²⁵ Nde ngami uni tsí iva gami guyẹ a gyengye la. ²⁶ Nde Usẹtan u likyé, ni iwụ yana nẹ gi wa tsí, gami kana iva, we gyengye la, nde uyi tẹ́, uvu utu wa gegwe utẹ́. ²⁷ A nya unị́ umẹ uwa zwi gami kọ unị́ ntsi, gi wa yị ibe tẹ̀ la, ukyẹ'a ni ilị nẹ, tse gi wa tsaka'a gami. ²⁸ Kwasi ma'a gẹ̀ nẹ gẹ̀dẹ gbyi aka ibibi imẹ nbanị́ mẹ tẹ̀, a na'a mọ ba, ²⁹ nde banị́ imẹ nba kyẹ̀ gumunu tsa tụtụ tẹ̀, a mọ ba la, gebo ka aka ibibi imẹ nba mẹ tẹ̀. ³⁰ Uyesu gẹ̀ ibe imẹ, gebo gẹ̀dẹ ba nya gumunu ibibi. ³¹ Nma ana ni banị́kọ yana nẹ gyengye ngasẹ. nbe né gitẹ vu'a. ³² Gedu dẹ̀ndẹ gii'a gọ, nba gẹ̀'a gẹ̀dẹ nma'ẹ nyẹ ni banị́kọ yẹnyẹ nẹ gyengye nẹ gasẹ a pu'ẹ lị. ³³ U wụlụ ba, u gẹ̀dẹ ngọ nẹ'ẹ nba vu banị́kọ yami ni nma mi nẹ? ³⁴ U gẹ̀dẹ pa banị́ imẹ nba dẹ̀ndẹ gii mi gọ mẹ tẹ̀, nba vu banị́kọ yami ni nma yami nẹ. ³⁵ Unị́ umẹ uwụlụ ni lika kọ Usigapa nẹ tẹ̀ uvu banị́kọ yami nu nma mi nẹ.