¹ Kụ kolegi nu UKafanahum tẹ̀ igi izu gẹnyi a wu gẹ̀dẹ u dẹ nu gami. ² Banị́ ni gedu nẹ, ba gọ nmọ, a nya nnẹ̀ki nu ukpaki la, uyesu gẹ̀ lika ni ba nẹ ³ Nbanị́ dẹ̀ bene unị́ gubo utsitsi ukpasa udẹ̀, banị́ inọ nbe su'a. ⁴ Be be tsutsu na nẹ nu la, gebo ka gedu, nba ná guná, nba zwi nẹ unị́ utsitsi upkasa udẹ̀, nu ugodo umẹ u zi nmọ tẹ̀. ⁵ UYesu pa ubangasikiya yaba u gẹ̀ unị́ utsitsi ukpasa udẹ̀ umẹ gẹ̀dẹ '' Ubyi, aka ibibi yẹnyẹ ani mọ'ẹ'' ⁶ Nde banị́ ibe gaka imẹ nbe dẹ̀ndẹ nmọ tẹ̀, nba nyinẹ̀ ni iye yaba. ⁷ Ngyẹ unị́ umẹ a gẹ̀ lika tẹ̀? u mẹ aka ibibi! ngọ uwa mọ banị́ aka ibibi '' Usigapa kili?'' ⁸ Nnẹyẹ Uyesu kpu ni gumunu kana, ube umẹ nba nyinẹ̀ ni ginyẹ. Ngyẹ nnyinẹ'a nyinẹ̀ lika ni iye tẹ̀? ⁹ Ngyẹ uyi fẹnẹ, pe gẹ̀dẹ, unị́ utsi-tsi iwụ umẹ, ani aka ibi yana mọ'a, ko a gẹ̀'a gẹ̀dẹ 'likye' gi nyẹ su igebene yẹnyẹ a gẹẹ''? ¹⁰ Gebo gẹ̀dẹ nyinẹ kpu gèdẹ ubyi ya unị́yapu unya ntsi gi wa mọ aka ibibi ni gasẹ gụmẹ, u gẹ̀'ẹ unị́ utsitsi ukpasa udẹ̀ mẹ tẹ̀. ¹¹ ''N gẹ̀ẹ gẹ̀dẹ likyé nnyẹ su igebene yẹnyẹ, a gẹẹ gami kẹnyẹ. ¹² Nnẹyẹ usu igebene yana, u fu ngami gụyẹ ngezugẹ kaba, uvu ba lika ka anyini, nba yaba usigapa, '' nba gẹ̀dẹ ya pa ibe nko mẹ pabe la''. ¹³ U fu ta ukpasa wọ uteku, ngedu ka banị́ be uweza ana utsene ba ibe. ¹⁴ Kụ wa kyẹ́ tẹ́, u pa ULevi ubyi ya Uhalfasu, udẹndẹ nnẹ̀ gendu gagọ ugẹ́'a gẹ́dẹ, '' bami''. uba'a. ¹⁵ Kụ Uyesu zwi gami kọ Ulevi tẹ̀, uwa li ibe ilili ni banị́ aka ibibi nẹ, nu batsagba yana nẹ, nba ba'a. ¹⁶ Kẹ banị́ ibe gaka nu Ufarisawa nẹ, pa kụ Uyesu'a li ibe ilili ni banị́ aka ibibi nẹ, nu bani igendu gagụ nẹ tẹ̀, nba gẹ̀'ẹ batsagba yana, ''Ngyẹ uwa li ibe ni banị́ igendu gagụ nẹ, nu banị́ aka ibibi nẹ̀? ¹⁷ Kụ Uyesu wu tẹ́ tẹ̀, ugẹ̀ ba gẹ̀dẹ, '' Unị́ umẹ uyi gẹlẹ tẹ̀, weye ulikita la, nde unị́ umẹ uvu liba tẹ̀, uwe ye ulikita. Me be gẹ̀dẹ, ma vala banị́ gebyi la nde banị́ aka ibibi''. ¹⁸ ''Batsagba wọ Uyahaya nu Ufarisiyawa nẹ, ba mọ limẹ nde yẹnyẹ batsagba a mọ la?'' ¹⁹ Uyesu gẹ̀ ba gẹ̀dẹ belolo yọ ulolo a mọ limẹ kẹ ulolo dẹ ni banẹ tẹ̀? be'e le ni ulolo nẹ ba mọ limẹ la''. ²⁰ Nde izu'a be imẹ a'a su ulolo a ki ba tẹ̀, ni izu yẹ nba mọ limẹ. ²¹ Anya unị́ umẹ uwa kọ'u gugye upipa wa gbụnụ nu gugye ukpụkpụ nẹ, gi gugye guyẹ a ga sa la la. wa sá tsim. ²² Anya unị́ umẹ uwa sẹ̀'ẹ uzọ inabi, upipa a gbụnụ nu ukpukpu nẹ, nu ugbagya, ugbagya yẹ wa tsaka gbyi. Uzọ ya inabi nu ugbagya nẹ, wa mẹ ubaná. Ganu guyẹ tẹ̀, da uzọ inabi upipa le nu ugbagya upipa. ²³ Uzu wa aduwa, Uyesu gẹẹ unọ ni batsagba yana nẹ, nba tẹ ibekọ. ²⁴ Ifarisayawa gẹ̀'a gẹ̀dẹ, ''pa ngyẹ nba mẹ ube umẹ aná mẹ'a nu uzu ya aduwa nẹ la tẹ̀ ?'' ²⁵ U gẹ̀'ẹ ba gẹ̀dẹ ''Nyinẹ gẹ̀ ube umẹ utu umẹ udẹ ngeye, ni limẹ, na ni banị́ yana nẹ, le ná nẹ. ²⁶ Kụ zwi gami kọ Usigapa utu umẹ abiada vu ufirisiti unị́kpụkpụ tẹ̀, u li ubulodi ya uFirisiti umẹ uwa gọ gẹ̀dẹ wa li'a la tẹ̀, ugi banị́ imẹ nbe le nánẹ tẹ̀? '' ²⁷ Uyesu gẹ̀dẹ, ''Uzu ya aduwa'a mẹ'a gebo ka unị́yapụ, ntẹ̀, a mẹ'ẹ unị́yapụ gebo ka uzu ya aduwa la. ²⁸ Gebo guyẹ tẹ̀, ubyi ya unị́ vu Alimasihu, sụ uzu ya aduwa.