¹ Kụ Uyesu gẹ̀ gyẹngyẹ, nbanị́ wu'a bye gbyi tẹ̀, uzwi Ukapinu. ² Gufe ka Ugoni dẹ̀, uvu liba, weyi atsi. ³ Kụ wu lika ka Uyesu tẹ̀, Ugoni mẹ né gezugẹ kọ Uyahuda, gẹ̀dẹ wa gẹ̀ Uyesu gẹ̀dẹ wa ba sẹẹ gufe kana, gi wa getsi la. ⁴ Kẹ bebe pẹlẹ ni Uyesu nẹ tẹ̀, nba gẹ̀dẹ, ugọ gẹ̀dẹ, "Nyẹ ba sẹẹ'a, ⁵ gẹ̀dẹ baliyeba kọ ukanakana yi, ugini mẹ́ gami ka aduwa giyi." ⁶ Uyesu a gẹẹ niba nẹ́. ba gẹẹ ni likpa nẹ la, Ugoni mẹ né ulólò yana dẹ̀, gẹ̀dẹ, "Ada Unị́kpụkpụ ga ba gebe la, gẹ̀dẹ ma tsị́ mẹ nnyẹ'a zwi gami kami tẹ̀ la. ⁷ Ma pa iwụ yami gyẹngyẹ gi nyẹ be uweza mi la, nde gẹ̀ lika, ubyi ya gatimẹ kami wa sẹẹ. ⁸ Gẹ̀dẹ n yi ni gada ka tizugẹ, nnya isoza ni gada kami. Ma'a gẹ̀ udẹ̀, gẹ̀dẹ 'gẹẹ' wa gẹẹ, udika gẹ̀dẹ 'be' we be, ma gẹ̀ ubyi ya gatimẹ kami gẹ̀dẹ mẹ tẹ̀, wa mẹ." ⁹ Kụ Uyesu wu tẹ́tẹ̀, lika dama'a, ugẹ̀ gedu gụmẹ nba ba tẹ̀, gẹ̀dẹ, "Ma gẹ̀ nẹ gẹ̀dẹ, ko ni Isẹlẹyila, anya unị́ ubangesikiya nko unị́ mẹ la." ¹⁰ Banị́ mẹ ané ba gitẹ tẹ̀, be, nba pa ubyi ya gatimẹ gụmẹ gele. ¹¹ Utu dẹ̀ Uyesu gẹẹ tụzụ gẹẹ Unayin. Batsagba yana gẹẹ na'anẹ, ni gedu ka banị́ nẹ́, ba'a. ¹² Kẹ bebe pẹlẹ ni nnẹ̀ gazwi kẹ ile yẹnẹ tẹ̀, nba pa banị́ dẹ̀ vo getsi, ubyi udẹ̀dẹ̀ ya nma ana. Nma ana uvu unị́bu, gedu kẹ ile yẹ le na'anẹ. ¹³ Kụ Uyesu pa'a tẹ̀, ngunugba mọ'a, gebo gẹ̀dẹ uvu unị́bu, ugẹ̀'a gẹ̀dẹ, "Ga'a gi gunyi la." ¹⁴ Utsu be gezuge, uda akpati ya getsi gụmẹ'ẹ, uvo getsi tẹ̀, banị́ mẹ nbe vo'a tẹ̀ gyengye tsim. Ugẹ̀dẹ, "ubyikilólò, ngẹ̀'ẹ gẹ̀dẹ likyé." ¹⁵ Ubyikilólò umẹ utsi mẹtẹ̀, ulikyé, uwa gẹ̀ lika. Uyesu na'a gi nma ana. ¹⁶ Nzizẹ mọ banị́ yẹ gbyi. Nba sa'a yaba Usigapa, agẹ̀dẹ, "Anabi Unị́kpụkpụnki likyé ni ginyi keyi be" "Usigapa pa banị́ yana be." ¹⁷ lika gụmẹ za gọ ukanakana ya Uyahuda, ni ile mẹ itsutsu ni ba nẹ́, tẹ̀nẹ. ¹⁸ Batsagba yọ Uyahaya unị́ Ubatizima, be, nba gẹ̀'a ibe mẹ iyi tẹ̀ gbyi. ¹⁹ Uyahaya vala batsagba yana iva, uné ba gẹnẹ nu Ada-Unị́kpụkpụ, gẹ̀dẹ, "Nyẹ nnyẹ'ẹ abe tẹ̀ go, ko ya ba yapụ nu unị́ dika?" ²⁰ Kẹ bebe pẹlẹ ni Uyesu nẹ tẹ̀, nba gẹ̀dẹ, "Uyahaya unị́ Ubatizima né yi, bene gẹ̀dẹ, 'Nyẹ nnyẹ'ẹ abe tẹ̀ go, ko ya ba yapụ nu unị́ dika?'" ²¹ Utu yẹ usẹẹ banị́ aba, aka-ẹkpẹlẹki, ni gumunu ibibi ni gedu nẹ, bavayapụ ugi ba gapa. ²² Uyesu wụlụ ba, ugẹ̀dẹ, "Nyinẹ'ẹ ba gẹẹ, nyinẹ a gẹ̀ Uyahaya ibe mẹ nnyinẹ pa,nnyinẹ wu tẹ̀. Bavayapụ pa, banị́ gụwụpa itsi-tsi zutuzu, ikputulu sẹẹ, itsi atakpụ wu, banị́ itsi-tsi nya ulayi, a gẹ̀ banị́ litorotsi lika usele. ²³ Unị́ mẹ'ẹ uwụlụ ni ibe imẹ nma mẹ tẹ̀ nẹ, gbogbo agẹẹ, wawa anibalika." ²⁴ Igii mẹ nbanị́ sako ya Uyahaya gii tẹ̀, Uyesu gẹ̀ gedu lika kọ Uyahaya, gẹ̀dẹ, "Ngyẹ nnyinẹ gẹẹ unọda gapa? Udẹgụ-dẹgụ umẹ uwa zene na afu nẹ tẹ̀? ²⁵ Nde ngyẹ nnyinẹ gẹẹ gapa, unị́ mẹ udẹ gugye utsụlụlụ tẹ̀? Pa banị́ mẹ'ẹ nba dẹ ngye utsụlụlụ ya gibe tẹ̀, be le nu uda ya bagọmọ. ²⁶ Nde ngyẹ nnyinẹ gẹẹ gapa? Anabi? I, Ma'a gẹ̀'ẹ ẹnẹ, nyinẹ apa ape anabi. ²⁷ Umẹ uvu na, umẹ'ẹ aka tẹ̀, 'Pa, me'e né banị́ ntẹ gené kami niyapụ nẹ, "Unị́ mẹ uwa gini utumozi ni gegu kẹnẹ tẹ̀.' ²⁸ Ngẹ̀'ẹ ẹnẹ, ni ginyẹ ka banị́ mẹ'ẹ nbenyine mọ́ tẹ̀, anya unị́ mẹ'ẹ upe Uyahaya tẹ̀ la, nde unị́ mẹ'ẹ apa zi gyẹngyẹ ni litsẹ kọ Usigapa la tẹ̀ pe'a." ²⁹ Kẹ banị́ wu lika gumẹ tẹ̀, si banị́ ugendu gagu, gẹ̀dẹ, Usigapa uvu Unị́ upilili. Ba yi ni ginyẹ ka banị́ mẹ'ẹ Uyahaya mẹẹ ba ubatizima tẹ̀. ³⁰ Nde Ifarasi ni banị́ mẹ'ẹ nba kpụ ibe izizi ya Uyahuda tẹ̀, imẹ'ẹ uwa mẹẹ ba ubatizima la tẹ̀, ba gyẹ lika kọ Usigapa. ³¹ "Ngyẹ nme su'a ma mọ nu uzamani mẹnẹ? Bayi gunẹ yi? ³² Bayi gayi ka bebyiki mẹ nbe vutuva ni gigyẹ tẹ̀, imẹ nba dẹndẹ nba vala ida gẹ̀dẹ, 'Iwu limuna gi'ẹ nde nyẹ'a zi imu la. Idẹndẹ gunyi nde nyẹ'a sabaya la.' ³³ Uyahaya unị́ ubatizima be, wa li, we wu beze la, nnyinẹ gẹ̀dẹ, 'unya alizini.' ³⁴ Ubyi Ya Unị́yapụ be, uwa li uwe wu, nnyinẹ gẹ̀dẹ, 'Pa, wa pe ibe la, ugini a wu ibe, ulólò ya banị́ ugendu gagu, ni ya banị́ ibibi nẹ!' ³⁵ Giwa ga bi, yi ni bebyi yana nẹ." ³⁶ Kyekyemẹ, ufarasi dẹ̀ myẹ Uyesu gi ba ga li ibe ni gami kana. Kẹ Uyesu zwi gami kọ Ufarasi mẹ tẹ̀, udẹndẹ ni guki, gi wa li ibe. ³⁷ Unyine ni aka ibibi dẹ̀. Kụ kpụ gẹ̀dẹ, udẹndẹ ni guki ka ibe ilili ni gami ka Ufarasi mẹ tẹ̀, ubene upẹmpẹ ya banị ufufafu usesele. ³⁸ Ugyengye ni igii yana tsụtsụ ni nnẹ́ yana nẹ́, uwa gi gunyi, uwa pyi nnẹ́da yana ni baya kana nẹ́, upyi ya ni tiyi ka lutu kana nẹ́, uwu nnẹ́da yana, ufo banị ufufafu usesele mẹ. ³⁹ Ufarasi umẹ umyẹ uyesu mẹ tẹ̀, pa tẹ̀, ugẹ̀ iwụ yana gẹ̀dẹ, "Unị́ mẹ uvu anabi, wa kpụ unị́ mẹ unyine vu, uwa da mẹ tẹ̀, gẹ̀dẹ, uvu unị́ ubibi." ⁴⁰ Uyesu gine ba gẹ̀dẹ, "Usimanu, nnya ube dẹ̀ ma gẹ̀'ẹ." Ugẹ̀dẹ, "Gẹ̀, Umali!" ⁴¹ Uyesu gẹ̀dẹ, "Unị́ ikụ gamọ dẹ̀, nya banị́ ata iva. Udẹ̀ nya guta kọ usule ukpaku, udẹ̀ nya wọ ukuri. ⁴² Kẹ ba giya nu la tẹ̀, unị́ mọ ba gbyi-gbyi. Ni gayi tẹ̀, ngọ ni ginyẹ kaba uwa baliyeba kana ape?" ⁴³ Usimanu wụlụ'a, gẹ̀dẹ, "Npa tẹ̀, umẹ amọ'a pe tẹ̀." Uyesu gẹ̀'a gẹ̀dẹ, "Nya tsí iwa gyẹ." ⁴⁴ Uyesu kolegi be ni unyine mẹ, ugẹ̀dẹ, Usimanu, Nyẹ'a pa unyine mẹ. Nzwi gami kẹnyẹ. Nyẹ'a gimi uzọ, gima sụ nnẹ yami la, nde, unyine mẹ, nyini nnẹ yami, ni baya kana nẹ, upyi ya ni tiyi ka lutu kana nẹ. ⁴⁵ Nyẹ'a wu ganu kami la, nde gbogbo n be nnẹ̀mẹ tẹ̀, unyine mẹ sa'a wu mi nnẹda. ⁴⁶ Nyẹ'ẹ fo lutu kami banị la, nde ufo nnẹda yami banị ufufafu usesele. ⁴⁷ Gebo guyẹ tẹ̀, ngẹ̀ nẹ gẹ̀ḍẹ, aka ibibi uleledu yana ani mọ'a, gẹ̀dẹ, na'a ubaliyeba pe. Unị́ mẹ amọ'a gẹnyi tẹ̀, ubaliyeba gẹnyi." ⁴⁸ Ngene, ugẹ̀'a gẹ̀dẹ, "Aka ibibi yẹnyẹ ani mọ'e." ⁴⁹ Banị́ mẹ'ẹ nba dẹndẹ za tẹ̀, agẹ̀ edika gẹ̀dẹ, "Ngọ uyi tẹ̀, umẹ'ẹ uwa mọ aka ibibi tẹ̀?" ⁵⁰ Uyesu gẹ̀ unyine yẹ, gẹ̀dẹ "Ubangesikiya yẹnyẹ, nẹ'ẹ sẹẹ. gẹẹ ni liyesi nẹ."