¹ Uzụ ya usabat, Uyesu wa kyẹ́ kana nu unọ, nbatsagba yana a ta'u alkama, nbe fo ni ibo yaba, nba gini ali'a. ² Ifarasi nẹ̀ gẹ̀dẹ, "Ngyẹ nbatsagba yẹnyẹ amẹ ibe mẹ iyayi ni ibe izizi ya usabat la tẹ̀?" ³ Uyesu wụlụ ba gẹ̀dẹ, "Nyinẹ̀ akalanta ube mẹ Udawuda mẹ utu mẹ uvu limẹ ni banị́ yana nẹ́ tẹ̀ na? ⁴ Uzwi gami kọ Usigapa, usu ubulodi uli, ugi banị́ mẹ nbe le na'anẹ́ tẹ̀, nba li, sigẹ̀dẹ, ibe izizi gẹ̀dẹ, ufilisiti kili uwa li'a." ⁵ Ugẹ̀ ba gẹ̀dẹ, "Ubyi ya Ada-Unị́kpụkpụ vu ya Usabat." ⁶ Uzụ ya usabat udẹ̀, uzwi gami ka aduwa, utsene banị́ ibe nmọ. Unị́ dẹ̀, gubo ulili kana ni tsi. ⁷ Banị́ ibe gaka, ni Ifarasi nẹ̀, apa ko wa sẹẹ unị́ dẹ̀ nu uzụ ya usabat nẹ́ ma, gebo gẹ̀dẹ, ba wa tụtọ akyẹ'a gẹ̀dẹ, umẹ lika ubibi. ⁸ Ukpụ ube mẹ nba nyinẹ́ tẹ̀, ugẹ̀ unị́ mẹ ngubo kana ni tsi tẹ́, gẹ̀dẹ, "Likyé, gyengye ni gakigaki ka gọngọ."Unawa likyé gyengye nmọ. ⁹ Uyesu gẹ̀ ba gẹ̀dẹ, "Me byi anẹ̀, ibe izizi gẹ̀dẹ, uzụ ya aduwa, aga mẹ ibe sele go ko ibe ibibi, asẹẹ ulayi go ko alị'a?" ¹⁰ Upa ba gii gbyi, ugẹ̀ unị́ yẹ gẹ̀dẹ, "Tana gubo kẹnyẹ." Utana'a, ngubo kana yi gyẹ. ¹¹ Nba mẹ ipisi, nba gẹ̀ idika lika, ube mẹ nba mẹ Uyesu tẹ̀. ¹² Uzụ dẹ̀, ufu go lụgụ, gi wa mẹ aduwa. Umẹ aduwa gbogbo iyapụ kụ, gi Usigapa. ¹³ Kẹ yapụ kụ tẹ̀, uvala batsagba yana, ufune ibo nẹ̀ iva, udẹ ba liyẹ gẹ̀dẹ "Imazo." ¹⁴ Ayẹ ya batsagba yana vu Usimanu (umẹ agini'a vala'a gẹ̀dẹ Ubuturusu) ni unị́kọ yana nẹ́, Anduru, Uyakubu, Uyahaya, Ufulubusi, Ubatolomi, ¹⁵ Umatiyu, Utoma, Uyakubu ubyi ya Alfansus, Usimanu, umẹ avala'a Uzelot, ¹⁶ Uzuda ubyi ya Uyakubu, ni Uzuda Isicaroti, umẹ uvu unị́ agu tẹ̀. ¹⁷ Uyesu si nu lụgụ ni batsagba yana nẹ́, u be gyengye nu ugedegede. Gedu ka batsagba yana, ni gedu ka banị́ ya Uyahudiya ni Uriselima nẹ́, ni ukanakana ya Utaya nẹ, ni Usido nẹ. ¹⁸ Be be ge wu'a, gi wa sẹẹ banị́'a aba kọkọkọ. Banị́ gumunu bibi, usẹẹ ba. ¹⁹ Gọngọ a ye gẹ̀dẹ wa da'a, gebo ka ntsi ya banị́ ga sẹẹ, usẹẹ ba gbyi. ²⁰ Upa batsagba yana, ugẹ̀dẹ, "Anibalika vu banị litoroci, gẹ́dẹ litsẹ ka Usigapa vu yẹnyẹ. ²¹ Anibalika vu banị́ limẹ, gẹ̀dẹ ba'a wa atsì ba. Anibalika vu banị́ gunyi, gẹ̀dẹ be'a tsi timọ́. ²² Anibalika vu banị́ mẹ a ye ba la tẹ̀, a zo liyẹ kẹnẹ tẹ̀, gebo ka ubyi ya Ada. ²³ Wa'a vu liyesi agi'ẹ nẹ, gẹ̀dẹ wa'a vu lika usele agi'ẹ nẹ, ni nki, gẹ̀dẹ ikaka yẹnẹ simẹ anabi nẹ tẹ́. ²⁴ Nde gunugba vu banị́ gibe! Gẹ̀dẹ nyinẹ gụ liyesi kẹnẹ be. ²⁵ Gunugba vu banị́ mẹ nba nya gyẹngyẹ tẹ̀, gẹ̀dẹ limẹ a ba gụ ba. Gunugba vu banị́ timọ́! Gẹ̀dẹ ba ba'a gi gunyi. ²⁶ Gunugba vu banị́ mẹ agẹ̀ lika usele ni lutu kaba tẹ̀! Gede ikaka yẹnẹ, simẹ anabi ibibi tẹ́. ²⁷ Nde ma gẹ̀'ẹ nẹ́, mẹ nnyẹnẹ́'a wu mi mẹ tẹ̀, baliyeba ka unị́ bibi yẹnẹ́, nnyẹ'a mẹ lika usele a gi unị́ mẹ uwe ye nẹ́ la tẹ̀. ²⁸ Dẹ unị́ mẹ uwa kyẹ tụtụ tẹ̀ anibalika, nnyẹ'ẹ amẹ banị́ mẹ nba mẹ'ẹ nẹ́ aka kpẹlẹki tẹ̀ aduwa. ²⁹ Unị́ mẹ ule gupi ni lugbọ́ gudẹ̀, gi'a lugbọ́ uvuva. Unị́ dẹ̀ usu'ẹ utogo, nyẹ'a nabo'a. ³⁰ Gi gọngọ umẹ ubyi'ẹ tẹ̀. Unị́ dẹ su'ẹ ube dẹ̀, umẹ uvu yẹnyẹ tẹ̀, ge byi'a, gẹ̀dẹ wa'e bene'a avo'e la. ³¹ Ube mẹ nnyẹ ye gẹ̀dẹ amẹ agi'ẹ tẹ̀, mẹ'a gi unị́va. ³² Nyẹ ye banị́ mẹ nbe ye tẹ̀ kili, ngyẹ nnyẹ'a wa nmọ? Gẹ̀dẹ banị́ ibibi a ye idika. ³³ Nyẹ'a mẹ lika usele gi banị́ mẹ nba mẹ usele agi'ẹ tẹ̀ kili, ngyẹ nnyẹ'a wa nmọ? Gẹ̀dẹ banị́ ibibi amẹ kaba tẹ̀, ni ida nẹ́. ³⁴ Nyẹ'a gi banị́ ibe, imẹ nnyẹ pa gẹ̀dẹ be kolegi agi'a tẹ̀ kili, ngyẹ nnyẹ'a wa nmọ? Banị́ ibibi agi'ẹ idika, imẹ nba pa gẹ̀dẹ ba wa ba ba wa tẹ̀. ³⁵ Nde baliyeba ka banị́ ibibi yẹnyẹ, nnyẹ'a mẹ lika usele giba. Mọ ba, ga'a ba yapụ ni ga wa gala, uliba yẹnyẹ, wa yi mọ'a. Nyinẹ́'a vu bebyi ya Unị́ mẹ Upe tẹ̀, gẹ̀dẹ na'a ni iwụ yana nẹ, amẹ liyegba ni banị́ ibibi ni banị́ isele la. ³⁶ Mọ banị́, gi Ada yeyi amọ yi. ³⁷ Ga'a za iwa la, gi aga'a za'e iwa la. Ge'e zo uni la, gi aga'a zo'e la. Mọ banị́, gi'a mọ'e. ³⁸ Gi banị́, gi'a gi'ẹ. Wa'e lele, gi wa ta ida, gi wayi bele, gi wa'e fune. Ube mẹ nnyẹ'a mọ̀ na'anẹ́ tẹ̀, a mọ̀ a gi'ẹ. ³⁹ Ugini gẹ̀ ba akizi, gẹ̀dẹ, "Uvayapụ a tsini uvayapụ nnẹ̀ki? Umẹ, be'e pyili a zwi ugye za, wayi tẹ́ na? ⁴⁰ Ubyi ya umakalanta wa'ẹ pe umali la, unị́ mẹ a tsene'a tsim, wayi gayi ka umali yana. ⁴¹ Ngyẹ nnyẹ'a pa ube mẹ, udẹ ni iyapụ ya unị́va tẹ̀, nde nyẹ'a pa umẹ udẹ ni iyapụ yẹnyẹ la tẹ̀? ⁴² Ngyẹ nnyẹ'a gẹ̀ unị́va, gẹ̀dẹ, 'nbeli gi ma'e fune ube mẹ, udẹ ni iyapụ yẹnyẹ tẹ̀,' nnyẹ'a pa ube mẹ udẹ ni iyapụ yẹnyẹ tẹ̀ la? Nyẹ'ẹ Ufarasi! Fune ube mẹ udẹ ni iyapụ yẹnyẹ tẹ̀, tsẹ, gi nyẹ'a fune ya iyapụ ya unị́va. ⁴³ Anya uki usesele mẹ'ẹ, uwa mẹ iwọwọ ivụvụ tẹ̀ la, anya uki ubibi umẹ'ẹ, uwa mẹ iwọwọ usesele tẹ̀ la. ⁴⁴ Gbyi iki, akpụ'a ni iwọwọ yana nẹ́. Gẹ̀dẹ gọngọ apili iwọwọ ni uki mẹ, uwa vu iwọwọ yana la tẹ̀, pa be la. ⁴⁵ Unị́ usesele fu ni iye yana isesele, ubene ibe isesele mẹ iyi ni iye yana tẹ̀, unị́ bibi fu ni iye ibibi yana, mẹ unya tẹ̀. Gẹ̀dẹ ni ibe mẹ unị́ nya ni iye yana tẹ̀, ugẹ̀ fune ni ganu kana. ⁴⁶ Ngyẹ nnyẹ'a vala gẹ̀dẹ, 'Alimasihu, Alimasihu, 'Nde nyẹnẹ'a fulu'aba ibe mẹ n ma gẹ̀ nẹ́ tẹ̀ la? ⁴⁷ Unị́ mẹ ube woza mi, uwu lika kami, ufuluba ya, ma'a gẹ̀ nẹ́ kụ unị́'a wa yi tẹ̀. ⁴⁸ Uyi gayi ka unị́ mẹ umẹ́ gami kana, ugba tịzẹ tsẹ, uwa mẹ́ gami kana, utọpọ ni iku sesele nẹ. Gẹ̀dẹ afu yọ ugbọ, ube wa sine'a tịzẹ la, gẹ̀dẹ a ta ga mẹ́ kana upọ sesele. ⁴⁹ Nde unị́ mẹ wu lika kami, uwa fuluba'a la, uyi gayi ka unị́ mẹ umẹ́, gami kana ba na ayise tẹ̀. Afu yọ ugbọ be, ukụ gami gụmẹ a mẹ́'a sesele la tẹ́. Gami gụyẹ a sọ, a le ntịzẹ gbyi.