¹ Kẹ gedu ta gii Uyesu gọ tẹ̀, nbe wu lika kọ Usigapa, ugyengye nu ganu ka uteku ya Ugenesaret. ² Upa gukpa ka uzọ a fu nu utaku. Banị́ ngbetu gamọ fu ki'a, nba nyini getse kaba. ³ Uyesu zwi udẹ̀ ya gukpa gụyẹ, ya Usimanu, ugẹ̀dẹ wa tsu'a gẹnẹ. Udẹndẹ, uwe tsene banị́ nu gukpa kọ uzọ mẹ. ⁴ Kụ ni lika ge bye tẹ̀, ugẹ̀ Usimanu, "Tsu gukpa kẹnyẹ zwinẹ nnẹ̀mẹ unya ginyẹ tẹ̀, gi nyẹ tse getse, gẹ̀dẹ nyẹ'a mọ ngbetu." ⁵ Usimanu wụlụ'a gẹ̀dẹ, "Ugẹngyẹ, itse getse gbogbo iyapụ kụ, nde ya mọ ngbetu la, tọ, kẹ nyẹ'ẹ gẹ̀ mẹ tẹ̀, me'a tse n ma pa." ⁶ Kẹ be tse tẹ̀, ba mọ ngbetu wa'a ngetse kaba atsi. ⁷ Nba vala banị́ dẹ̀, gẹ̀dẹ be'a be nba ba dẹ niba ibo. Ngbetu lele ikpa kọ uzọ, gbogbo ikpa yẹ aki. ⁸ Usimanu Ubuturusu, kụ'ụ pa tẹ́ tẹ̀, upili nu gezugẹ kȯ Uyesu, ugẹ̀dẹ, "Nabo mi gẹ̀dẹ nvu unị́ ubibi, Ada-Unị́kpụkpụ." ⁹ Gẹ̀dẹ lika dama'a ni banị́ mẹ nbe le za na'anẹ́, kẹ ba mọ ngbetu yẹ tẹ̀. ¹⁰ Uyakubu ni Uyahaya nẹ̀, ubyi ya Uzebedi, ba vu banị́ kíkí ya Usimanu. Uyesu gẹ̀ Usimanu gẹ̀dẹ, "Ga'a mọ nzizẹ la, gebo gẹ̀dẹ, kyekyemẹ gẹẹ nyẹ'a mọ banị́." ¹¹ Kẹ be fune gukpa kọ uzọ tẹ̀, nba nabo gyẹngyẹ nba ba'a. ¹² Kụ udẹ nu ile dẹ̀ tẹ̀, unị́ ukputulu dẹ̀ dẹmọ. Kụ'ụ pa Uyesu tẹ̀, upili zi, ugẹ̀ Uyesu tsukutsuku, "Ada-Unị́kpụkpụ, uba'ẹ, nyẹ'a sẹẹ mi." ¹³ Uyesu tana gubo kana, uda'a ugẹ̀dẹ, "Ubami. Wa gasẹẹ."Kụkwa ikputulu nabo'a. ¹⁴ Ugẹ̀'a gẹ̀dẹ, uga gẹ̀ gọngọ la, nde ugẹ̀'a gẹ̀dẹ, "Gẹẹ kẹnyẹ, nnyẹ'a ga tsini iwụ yẹnyẹ nu ufilisiti, gi nyẹ'a mẹ usadaka ya gayi tsa, kụ Umusa gẹ̀ tẹ̀, ya liyesi kaba." ¹⁵ Nde lika kana zagọ, ngedu ka banị́, be giba wu'a, utsene ba, usẹẹ aba mẹ'ẹ a bene tẹ̀. ¹⁶ Nde we'a gii agẹẹ nnẹ̀ iwowo, gi wa mẹ aduwa. ¹⁷ Uzụ dẹ̀, uwe'a tsene ibe, Ifalasi nẹ̀, ni banị́ ibe getsene ka ibe izizi nẹ́, dẹndẹ nmọ, imẹ'ẹ nbe be nu gulekye-gulekye kọkọkọ tẹ̀, nu ukanakana ya Ugalili, ya Uyahuda, nu ile inikpụkpụki ya Urisẹlima nẹ́ tẹ̀. Ntsi ya Ada-Unị́kpụkpụ yi na'anẹ́ gi wa sẹẹ banị́. ¹⁸ Banị́ dẹ̀ be, vo unị́ iwụ utsitsi ukpasa udẹ̀, nu igebene, be ye nnẹ̀ki gi be zi'a nu gezugẹ kọ Uyesu. ¹⁹ Gebo ka gedu, ba wa nnẹ̀ki gi ba zwinẹ'a la, nbe go ba ngapa ka guza, nba kyẹ́ gụnna, nba ta'u igebene ilị, nba zwinẹ'a gakigaki kaba, ni gezugẹ kọ Uyesu. ²⁰ Upa ubangẹsikiya yaba, ugẹ̀dẹ, "Ulólòni, ani aka ibibi yẹnyẹ mọ'ẹ." ²¹ Banị́ ibe gaka ni ifarasi nẹ́nẹ̀, nbe bi ligẹ, gẹ̀dẹ, "Ngọ uwa gẹ̀ lika ni tụtụ nẹ̀ tẹ̀? Ngọ uwa mọ aka ibibi, Usigapa kili?" ²² Nde Uyesu, kpụ ube mẹ nba nyinẹ tẹ̀, uwụlụ ba gẹ̀dẹ, "Ngyẹ̀ nnyinẹ́ a byi lika gụmẹ ligẹ ni iye yẹnẹ́? ²³ Uno uyi fẹnẹ gẹ̀dẹ, 'Aka ibibi ani mọ'ẹ' ko 'Likyé gi nyẹ'a zutuzu?' ²⁴ Nde nyinẹ́ kpụ gẹ̀dẹ ubyi ya Unị́ unya ntsi ni gasẹ gi wa mọ aka ibibi, Ngẹ̀'ẹ gẹ̀dẹ, 'Likyé, su igebene yẹnyẹ, nyẹ'a gẹẹ gami.'" ²⁵ Ulikyé ni yapụ yaba, usu igebene umẹ uzi mọ tẹ̀, ugẹẹ gami kana, uwa'a yaba Usigapa. ²⁶ Lika dama gọngọ, nba yaba Usigapa. Nzizẹ mọ ba, nba gẹ̀dẹ, "Ipa lika ka anyini nnyẹmẹ." ²⁷ Kẹ lika gụyẹ yi tẹ̀, Uyesu fu nnẹ̀yẹ, upa unị́ ugendu gagu, avala'a gẹ̀dẹ Ulevi, udẹndẹ ni nnẹ̀mẹ uwa gu ugendu tẹ̀. Ugẹ̀'a gẹ̀dẹ, "bami." ²⁸ Ulevi nabo gyẹngyẹ, ulikyé, uba'a. ²⁹ Ulevi mẹ'ẹ ibe ilili gi Uyesu ni gami kana, banị́ igendu gagụ ledu nmọ, ni banị́ dika nẹ́, imẹ nba li ibe ilili niba nẹ́ tẹ̀. ³⁰ Nde Ifarasi nẹ̀, ni banị́ ibe gaka nẹ́, ba gẹ̀'ẹ batsagba yana gẹ̀dẹ, "Ngyẹ nnyinẹ́ ali, awú ni banị́ igendu gagụ ni banị́ aka ibibi nẹ́?" ³¹ Uyesu wụlụ ba, gẹ̀dẹ, "Banị́ mẹ nba yi gẹlẹ tẹ̀, aye ulikita la, banị́ aba nbe ye ulikita. ³² Me'a be ni banị́ isele geye la, nbe banị́ ibibi geye, gi be tuba." ³³ Ba gẹ̀'a gẹ̀dẹ, "Batsagba yọ Uyahaya ba mọ limẹ na aduwa nẹ́, bastagba ya ifarasi nẹ̀, amọ limẹ. Nde batsagba yẹnyẹ ali awú." ³⁴ Uyesu gẹ̀ ba gẹ̀dẹ, "Unị́ dẹ̀ amẹ belólò ya ulólò, ni gamvọ, gi ba mọ limẹ, kụ ulólò tsitsi dẹ ni ba tẹ̀? ³⁵ Uzụ abelị umẹ'ẹ asu ulólò aki ba tẹ̀, utu yẹ nba'a mọ limẹ." ³⁶ Uyesu ta akizi gi ba gẹ̀dẹ. "Anya unị́ mẹ uwa sa gugye upipa, gi wa kwọ ukpụkpụ na'anẹ́ tẹ̀ la. U mẹ tẹ́, u sa gugye upipa, ukwọ gugye ukpụkpụ na'anẹ́, wa gọnẹ'a la. ³⁷ Anya unị́ mẹ uwa sẹ'ẹ beze usesele, ale nu ugbagya ubibi tẹ̀ la. U mẹ tẹ́, usesele wa tsaka ugbagya yẹ, beze afene, ugbagya yẹ wa gbasa. ³⁸ Nde beze usesele, ale'a nu ugbagya usesele. ³⁹ Anya unị́ mẹ, uwú beze ubibi, we'a ye usesele tẹ̀ la, gebo gẹ̀dẹ, wa gẹ̀dẹ, 'Ubibi uyeliye pe.'"