¹ Gumunu-Tsa yi Uyesu, ukolegi nu Ukogi ya Urudu, Ngumunu-Tsa vo'a gẹ́nẹ́ unọda, ² izụ uwogba, usedam mọ̀'a pa. Nu izụ yẹ, wa li gyẹngyẹ la, nge bye nlimẹ agu'a. ³ Usedam gẹ̀'a gẹ̀dẹ, "Nyẹ'a vu ubyi ya Usigapa, gi ukụ mẹ ganu gi wa gii ubulodi." ⁴ Uyesu wụlụ'a gẹ̀dẹ, "Aka gẹ̀dẹ, 'Unị́ ayi nu ubulodi nẹ́ kili la'" ⁵ Usedam vo'a gone agbogbolo, utsini'a litsẹ ka gasẹ. ⁶ Usedam gẹ̀'a gẹ̀dẹ, "Ma'a gi'ẹ ntsi gi nyẹ vo litsẹ gụmẹ, ni ibe yana nẹ́. Ma'a mẹ, gẹ̀dẹ ani ya gimi gẹ̀dẹ me'a vo'a, ma'a gi unị́ mẹ ubami tẹ̀. ⁷ Nnyẹ'a vini agimi, ibe mẹ gbyi yavu yẹnyẹ." ⁸ Nde Uyesu wụlụ'a gẹ̀dẹ, "Aka gẹ̀dẹ, 'Nyẹ'a vini agi'a Ada-Unikpụkpụ Usigapa yẹnyẹ, nnyẹ'a mẹ gatimẹ agi'a kili.'" ⁹ Umẹ uba'a tẹ̀, usedam vo'a gẹnẹ Uruselima, Udondon dẹ̀ ya guza ka aduwa, ugẹ̀'a gẹ̀dẹ, "Nnyẹ'a vu ubyi ya Usigapa, tse iwụ yẹnyẹ sine. ¹⁰ Gẹ̀dẹ, aka gẹ̀dẹ, 'Wa'a gi imaleka yana ganu, gi ba adẹ ibo, gi gyengye aga mẹ'ẹ la,' ¹¹ 'Be'e vo'e ni ibo yaba nẹ́, gi nyẹ'ẹ ge tu ginẹ́ nu ukụ la'." ¹² Uyesu wụlụ'a gẹ̀dẹ, "A gẹ̀dẹ, 'Gamọ̀ Ada-Unikpụkpụ Usigapa yẹnyẹ la.'" ¹³ Kụ Usedam ni Uyesu mọ̀ pa gbyi tẹ̀, ugii. ¹⁴ Uyesu kolegi be Ugalili, ni ntsi ya Gumunu-Tsa nẹ́, lika kana za gọ ukanakana yẹ. ¹⁵ Utsene ibe ni guza ka aduwa yaba, ngọngọ yaba'a. ¹⁶ Uzụ udẹ̀ u be Unazaret, ile imẹ ukyé nmọ̀ tẹ̀. Kụ wa'a na mẹ tẹ̀, uzwi guza ka aduwa nu uzụ ya Usabati nẹ́, ugyengye gi wa gẹ̀ Ubabulu. ¹⁷ Utakada ya Anabi Iseya, ani gi'a, upye'a, upa nnẹ̀ dẹ̀, umẹ aka gẹ̀dẹ, ¹⁸ "Gumunu ka Ada-Unị́kpụkpụ yi nimi nẹ́, gebo gẹ̀dẹ ufo mi bani, gima'a mẹ uwazi ya lika usele ma'a gi banị́ litolotsi. A né mi, gima gẹ̀ bani lika ka lina, ma gi banị́ mẹ ani ba kyẹ̀ tẹ̀, iyapụ gepye, bava iyapụ, ma mẹ lina magi banị́ mẹ nba ni ka tẹ̀, ¹⁹ ma gẹ̀ uye ya gawuye kọ Ada-Unị́kpụkpụ." ²⁰ Ukulu'a, ugi unị́ gatimẹ ga mẹ nu aduwa, udẹndẹ. Iyapụ ya gọngọ na'a aduwa yẹ, yi nu uweze'a na. ²¹ Uwa gẹ̀ lika niba nẹ́, gẹ̀dẹ "Nnyẹmẹ lika gụmẹ ni mẹ ni iyapụ yẹnẹ́." ²² Gọngọ wu ube mẹ ugẹ̀ tẹ̀, nlika ni dama ba, ni lutu ka aka inikpụkpụ-nikpụkpụ mẹ iya fu nu ganu kana tẹ̀. Nba gẹ̀dẹ, "Avu ubyi ya Uyusufu yẹ, utẹ̀ la?" ²³ Uyesu gẹ̀ ba gẹ̀dẹ, "Nyẹnẹ́'a gẹ̀ mi akizi mẹ, gẹ̀dẹ, 'Ulikita sẹẹ iwụ yẹnyẹ. Ibe mẹ iwu, gẹ̀dẹ, nyẹ'a mẹ nu Ukapinọ tẹ̀, mẹ'a nnẹ̀mẹ ni ile ya gami kẹnyẹ.'" ²⁴ Ugini gẹ̀dẹ, "Ukụkwasi ma gẹ̀ nẹ́, anya anabi umẹ awụlụ na'ane ni ile yana tẹ̀ la. ²⁵ Ma'a gẹ̀ nẹ́, lika ka ukụkwasi, utu ya Elẹza, umẹ ugbọ a be la, gbogbo iye ita ni gatsiva nẹ tẹ̀, banị́bu ledu nu Isẹlẹyila, umẹ limẹ yi nu tịzẹ gụyẹ tẹ̀. ²⁶ Nde ané Elẹza gẹẹ nẹ́ nu unị́bu udọdẹ la, nde umẹ udẹ nu Uzarefat tsutsu nu ile ya Usidon nẹ́ tẹ̀. ²⁷ Ikputulu ledu nu Isẹlẹyila, utu ya anabi Elẹsa, nde anya umẹ usẹẹ tẹ̀ la, nde Unaama ya Usiriya kili." ²⁸ Gbyi banị́, nu aduwa yẹ, amẹ'ẹ ipisi, kẹ be wu ibe mẹ tẹ̀. ²⁹ Nbe likyé, nbe gù'a funẹ́ ki ile yẹ, gẹẹ nẹ́ ganu ka agbogbolo dẹ̀, umẹ amẹ́ ile yẹ tẹ̀, gi be'e tsu'a azunẹ́ ugye. ³⁰ Nde uzutuzu kyẹ́ ni gakigaki kaba, ugẹẹ kana. ³¹ Ngene ugẹẹ Ukapinọ, ile ya Ugalili. Uzụ ya Usabat udẹ̀, uwa tsene ba nu guza ka aduwa. ³² Uvu ba lika ka anyini ni lutu kọ ibe itsetsene yana, gebo gẹ̀dẹ, wa gẹ̀ lika ni ntsi nẹ. ³³ Nu'u guza ka aduwa akiye, unị́ dẹ̀ nya gumunu ibibi, ugi gunyi gbó, ³⁴ "Ngyẹ nnye'a mẹ niyi nẹ́, Uyesu ya Unazaret? Nyẹ be gi nyẹ'a lị yi gó? Nkpụ unị́ mẹ nnyẹ'a vu tẹ̀! Nyẹ vu unị́ Tsa udẹ̀ Yọ Usigapa!" ³⁵ Uyesu fune alizeni, ugẹ̀dẹ, "Yi kpọ, gi nyẹ'ẹ fu aki'a!" Kụ alizeni tsu'a lu'u ni gakigaki kaba tẹ̀, ufu ki'a, wa mẹ'a gyẹngyẹ la. ³⁶ Lika gụyẹ dama ba, nba gẹ̀ lika gụyẹ nginyẹ kaba. Ba gẹ̀dẹ, "Lika kongyẹ no utẹ́? Ugi alizeni ganu ni ntsi nẹ́, nbe fu ki'a." ³⁷ Lika kana zagọ nnonono nu ukanakana yẹ. ³⁸ Uyesu nabo guza ka aduwa uzwi gami ka Usimanu. Ugọ ya Usimanu vu ntẹnẹ, nba mẹ Uyesu tsukutsuku taganu kana. ³⁹ Ugyengye, ufune ntẹnẹ yẹ ki'a, ntẹnẹ nabo'a. Ulikyé, u mẹ ibe ilili gi ba. ⁴⁰ Kụ uzụ akị tẹ̀, abene aba iyiliyili. Uba ba gubo kana usẹẹ ba. ⁴¹ Alizeni fu ki banị́ ni gedu nẹ́, nba gi gunyi gẹ̀dẹ, "Nyẹ'a vu ubyi ya Usigapa!" Uyesu na le alizeni, gẹ̀dẹ ba yi kpọ, gebo gẹ̀dẹ, ba kpụ gẹ̀dẹ uvu Alimasihu. ⁴² Kẹ yapụ kụ tẹ̀, gii gẹẹ nnẹ̀ wowo. Gedu ka banị́ aye'a, nbe be nnẹ̀ mẹ'ẹ ugima dẹ tẹ̀. Be ye gẹ̀dẹ wa gẹẹ la. ⁴³ Nde ugẹ̀ ba gẹ̀dẹ, "Ma'a gẹẹ, gima ga mẹ uwazi ya litsẹ ka Usigapa nnẹ̀ kiki, gebo gẹ̀dẹ, gayi tẹ̀, ané mi bene tẹ̀." ⁴⁴ Uwa mẹ uwazi nu guza ka aduwa nu Uyahudiya.