¹ Uye ubo nẹ́ utụtọ ya litsẹ ka Utiberiyu Usiza, Upotiyu Upilat vu Ugomina ya Uyahuda, Uhiridus vu ugole ya Ugalili, Unị́kọ yana Ufilibusu vu ugole ya ukanakana ya Ituraya, Utarakonitis, ni Ulisaniya nẹ́, vu ugole ya Abilene, ² utu ya Ufirisiti ya Annas ni kefasi nẹ́, lika kọ Usigapa be nu Uyohana ubyi ya Uzakariya, nu unọda. ³ Ugii gọ ukanakana yọ Ukogi ya Uzoda, wa mẹ uwazi ya getuba ni gamọ ka aka ibibi nẹ́. ⁴ ka ase ka nu utakada ya Inabi Iseya tẹ̀, "Gulẹ kọ unị́dẹ̀ avala nu unọda, 'Gini utuwezi ya Ada-Unikpụkpụ, mẹ utuwezi yana tii. ⁵ Gbyi ugẹdẹgẹdẹ we'e lele, gbyi agụ ni agbogbolo nẹ́, ya yi gbẹdẹgbẹdẹ, ituwezi ugibigibi ya yi tii, ituwezi utsukutsuku ya yi gbẹnẹgbẹnẹ. ⁶ Gbyi banị́ ba pa lina kọ Usigapa.'" ⁷ Uyohana gẹ̀ gedu unikpụkpụki mẹ, imẹ nbe be gi wa mẹ ba ubatizima mẹ tẹ̀, gẹ̀dẹ, "Bebyi ya awa imẹ nba nya tubwa tẹ̀, gẹ̀dẹ, ba fulu nu ukikpa umẹ uwe be tẹ̀? ⁸ Mẹ lika gụmẹ uvu ya getuba tẹ̀, ga'a ge iwụ yẹnyẹ gẹ̀dẹ, 'Inya Ibilayi Ada wayi la,' gẹ̀dẹ Usigapa we'e likyéné bebyi ya ibilayi nu ikụ mẹ iyi mẹ tẹ̀. ⁹ Agozi ni gadigba so nu izu ya ikí be. Gbyi ikí mẹ iya mẹ iwụwụ la, a tsí'a, a tse'a, a dẹ nu giwa." ¹⁰ Banị́ ni gedu gụmẹ, byi'a, gẹ̀dẹ, "Ya mẹ gụnẹ mẹ?" ¹¹ Uwulu ba gẹ̀dẹ, "Unị́, unya Utunik iva, wa nu udẹ̀ gi unị́ mẹ'ẹ uwa nya la tẹ̀, unị́ mẹ'ẹ unya ibe ilili, wa mẹ du." ¹² Banị́ ugendu gagu be gẹ̀dẹ, a mẹ'ẹ ba ubatizima, nba gẹ̀'a gẹ̀dẹ, "Umali, ngyẹ iya mẹ?" ¹³ Ugẹ̀ ba gẹ̀dẹ, "Ga'a gu pe ka gẹ̀dẹ nyẹ'a gu tẹ̀ la." ¹⁴ Isoza idẹ̀ byi'a, gẹ̀dẹ, "Niyi pa? Ya mẹ'ẹ gụnẹ mẹ?" Ugẹ̀ ba gẹ̀dẹ, "Ga'a gu iku ya gọngọ ni ntsi nẹ́ la, ga'a kyẹ̀ gọngọn tọtụ ka amị la. Ibe mẹ'ẹ a gi'a tẹ̀, wa tsi'e. ¹⁵ Kyekyemẹ, banị́ a pu ge be kọ Alimasihu mẹ tẹ̀, lika ni dama banị́ ni iye yaba gẹ̀dẹ, ko Uyohana vu Alimasihu yo. ¹⁶ Uyohana wụlụ ba gbyi gẹ̀dẹ, "Nimi, ma mẹ'ẹ nẹ́ ubatizima nu uzọ nẹ, nde unị́dẹ̀ a be lị, umẹ unya ntsi pe mi tẹ̀, ma tsi gima bana ulị ya gudaba kana la. Wa'a mẹ'ẹ nẹ́ ubatizima ni Gumunu-Tsa nẹ, ni giwa nẹ. ¹⁷ Ube ya gatimẹ kana, yi ngubo kana, gi wa kụ'ụ gidẹ, gi wa ta alkama libolibo, ale nu uwọ yana. Nde wa'a du ngbọ'ụ, ni giwa gụmẹ alị'a la tẹ̀ nẹ́." ¹⁸ Nu uwazi ni gedu nẹ, ugẹ̀ lika usele gi banị́. ¹⁹ Uyohana mẹ ugole Uhirudus ukana, ya unyine ya unị́kọ yana gavọ, Uhirudiya, ni gbyi ibe ibibi mẹ Uhirudus a mẹ tẹ̀ nẹ́. ²⁰ Nde Uhirudus mẹ aka ibibi idika kpọ wa. Umọ Uyohana dẹ nu ubulusuna. ²¹ Kụ Uyohana mẹ banị́ gbyi ubatizima, su Uyesu tẹ̀. Kụ uwa mẹ aduwa tẹ̀, nki gu. ²² Gumunu-Tsa si ngapa kana kụ ukẹtẹbẹ tẹ́, ngụlẹ fu ni nki, gẹ̀dẹ, "Nyẹ'a vu ubyi mẹ nbaliyeba kẹnyẹ tẹ̀. Iye simi nẹnẹ́. ²³ Uyesu vu iye iketsẹyi, kụ utọpọ yẹ ibe ga tsini tẹ̀. Uvu ubyi ya Uyusufu, ubyi ya Uheli, ²⁴ ubyi ya Umattat, ubyi ya Ulevi, ubyi ya Umelika, ubyi ya Uzanayi, ubyi ya Uyusufu, ²⁵ ubyi ya Umatatiya, ubyi ya Amosi, ubyi ya Unahum, ubyi ya Esili, ubyi ya Unagayi, ²⁶ ubyi ya Umaata, ubyi ya Umatatiya, ubyi ya Usemeyi, ubyi ya Uzoseka, ubyi ya Uzoda, ²⁷ ubyi ya Uzowana, ubyi ya Uresa, ubyi ya Uzerubabe, ubyi ya Usetiye, ubyi ya Uneri, ²⁸ ubyi ya Umeki, ubyi ya Adi, ubyi ya Ukosam, ubyi ya Elimadam, ubyi ya Eri, ²⁹ ubyi ya Uzosuwa, ubyi ya Eliyaza, ubyi ya Uzorim, ubyi ya Umatata, ubyi ya Ulevi, ³⁰ ubyi ya Usimiyo, ubyi ya Uyahuda, ubyi ya Uyusufu, ubyi ya Uzonam, ubyi ya Eliyakim, ³¹ ubyi ya Umeleya, ubyi ya Umena, ubyi ya Umatata, ubyi ya Unatan, ubyi ya Udawuda, ³² ubyi ya Uzese, ubyi ya Obed, ubyi ya Ubowaz, ubyi ya Usamon, ubyi ya Unason, ³³ ubyi ya Aminada, ubyi ya Admin, ubyi ya Ani ubyi ya Uhezon, ubyi ya Upere, ubyi ya Uyahuda, ³⁴ ubyi ya Uzoko, ubyi ya Isaku, ubyi ya Ibilayi, ubyi ya Utera, ubyi ya Unaho, ³⁵ ubyi ya Useru, ubyi ya Urewu, ubyi ya Upele, ubyi ya Ebe, ubyi ya Usela, ³⁶ ubyi ya Ukayina, ubyi ya Afaxa, ubyi ya Usem, ubyi ya Unuhu, ubyi ya Ulamek, ³⁷ ubyi ya Umetusela, ubyi ya Enok, ubyi ya Uzare, ubyi ya Umahalale, ubyi ya Ukayina, ³⁸ ubyi ya Enos, ubyi ya Uset, ubyi ya Adamu, ubyi ya Usigapa.