¹ Ni izụ yẹ nẹ, Ucisara Agusutu gi ganu gẹ̀dẹ, a za banị́ gbyi imẹ nbe le ni gasẹ tẹ̀. ² Umẹ'ẹ uvu ya ngbọngbọ, umẹ a za banị́ nu utu ya Ukurinusu Ugomina ya Usiriya. ³ Gọngọ gẹẹ tịzẹ kana gi'a za'a. ⁴ Uyusufu likyé ni ile yana, Unazarat nu Ugalili gẹẹ Uyahudiya ile ya Ubatalami, umẹ a kpu'a ni ile ya Udawuda nẹ tẹ̀, gebo ka gẹ̀dẹ uvu idengi ya gami ka Udawuda. ⁵ Ugẹẹ ni Umariyamu nẹ, gi'a za ba, umẹ u mẹ anikaweli na'anẹ tẹ̀, umẹ uweye amọ́ ubyi tẹ̀. ⁶ Kẹ be le nnẹyẹ tẹ̀, utu ya ubyi gamọ́ ni mẹ. ⁷ Umọ́ ubyi ulólòni, ubyi ya ngbọgbọ yana, ubu'a gugye. Una'a zi ni gami ka izikpa, gebo gẹ̀dẹ anya guza gi be le nmọ la. ⁸ Nu ukanakana yẹ, unya banị́ enẹ ge toro, imẹ nbe le nu unọda, apa izikpa nu utú nẹ tẹ̀. ⁹ Umaleka ya Ada-Unikpụkpụ fuba ba, uyaba ya Ada-Unikpụkpụ akụkụ nyalinyali niba nẹ, nba mọ nzẹzẹ. ¹⁰ Umaleka gẹ̀ ba gẹ̀dẹ, "Nyinẹ aga mọ nzẹzẹ la, gẹ̀dẹ nbene gitẹ usesele, umẹ uwe bene liyesi avo gọngọ tẹ̀. ¹¹ Nnyẹmẹ amọ́ unị́ lina nu ile ya Udawuda! Uvu Alimasihu Ada-Unị́kpụkpụ! ¹² Alama umẹ agi'ẹ nẹ tẹ̀ utẹ̀, nyinẹ apa ubyi, dẹ nu gugye ububu, azi'a nu guza ka izikpa." ¹³ Nu Umaleka yẹnẹ, gedu ka isoza ni nki ayaba Usigapa, agẹ̀dẹ, ¹⁴ "Uyaba vu ya Usigapa ni nki, nbeli gi liyesi ayi ginyẹ ka banị́yapụ umẹ iye si'a tẹ̀ utẹ̀." ¹⁵ Kẹ Imaleka nabo ba, nbe go nki tẹ̀, banị́ ẹnẹ ge toro yẹ, gẹ̀ iwụ yaba gẹ̀dẹ, "Ya gẹẹ nẹ Ubatalami, gi ya pa ube mẹ uyi mẹ tẹ̀, umẹ Ada-Unị́kpụkpụ gẹ̀ yi mẹ tẹ̀." ¹⁶ Ba mọdẹ gẹẹ, nba pa Umariyamu ni Uyusufu nẹ, nba pa ubyi zi nu gami ka izikpa. ¹⁷ Kẹ ba pa tẹ̀, nba gẹ̀ banị́, ube mẹ agẹ̀ ba ni lutu ka ubyi yẹ tẹ̀. ¹⁸ Gbyi banị́ mẹ nbe wu lika gumẹ'ẹ nbani ẹnẹ ge toro mẹ gẹ̀ tẹ̀, uvu ba lika udadama. ¹⁹ Nde Umariyamu sa'a nyinẹ'ẹ lika gumẹ'ẹ uwu tẹ̀, uzi ya ni iye yana. ²⁰ Banị́ ẹnẹ ge toro mẹ, kolegi, nba yaba Usigapa nu lutu ka ibe mẹ nbe wu, nba gini pa tẹ̀, kẹ asi gẹ̀ ba tẹ̀. ²¹ Kụ uvu izụ tọta tẹ̀, utu ya gepotsí gatsi ka ubyi, nba dẹ'a liyẹ gẹ̀dẹ, Uyesu, liyẹ gumẹ umaleka dẹ'a tse gi'a nya liyẹ kana tẹ̀. ²² Kẹ izụ ya gamẹ'a tsa kyẹ tẹ̀, kẹ ibe izizi ya Umusa yi tẹ̀, Uyusufu ni Umariyamu nẹ, bene'a guza ka aduwa nu Uruselima, gi'a tsini Ada-Unị́kpụkpụ. ²³ Kẹ ibe izizi ya Ada-Unị́kpụkpụ yi tẹ̀, "Ubyi mẹ ugụ'u limọ́ ka nma ana, abene'a atsini Ada-Unị́kpụkpụ." ²⁴ Be be usadaka, "ya Ikẹtẹbẹ iva nu aleku ikịkị iva nẹ," gamẹ nẹ, kẹ agẹ̀ nu ibe izizi ya Ada-Unị́kpụkpụ tẹ́. ²⁵ Unị́dẹ̀ dẹ Urusẹlima, liyẹ kana vu Usiyaminu. Uvu unị́ ya ukụkwasi nu unị́ ya ukụzali. Wa'a pu unị́'a guyitsa kọ Isẹlẹyila gẹ̀bẹ, Gumunu-Tsa yi na'anẹ. ²⁶ Gumunu-Tsa tsini'a, gẹ̀dẹ we tsí tse gi'a mọ́ Ada-Unị́kpụkpụ Alimasifu la, wa'a pa tse. ²⁷ Uzụ dẹ̀ Gumunu-Tsa vo'a bene guza ka aduwa. Nbanị́ mẹ nba mọ́ Uyesu tẹ̀, vo'a bene guza ka aduwa, giba mẹ'a ube mẹ izizi aye tẹ̀, ²⁸ Usiyaminu gu'a nu ibo yana, uyaba Usigapa gẹ̀dẹ, ²⁹ "Nbeli gi unị́ gatimẹ kẹnyẹ atsí ni liyesi nẹ́, Ada-Unị́kpụkpụ, kẹ lika kẹnyẹ gẹ̀dẹ tẹ̀. ³⁰ Gẹ̀dẹ iyapụ yami pa lina kẹnyẹ be, ³¹ umẹ nnyẹ'a gini niyapụ ya banị́ tẹ̀. ³² Uvu giwa gi wa tsini banị́ ibibi uyaba ya banị́ ya Isẹlẹyila. ³³ Ada ni Nma ya ubyi nẹ, lika dama ba nu lutu ka ibe mẹ agẹ̀ wana tẹ̀. ³⁴ Usiyaminu dẹ ba anibalika, ugẹ̀ nma ana gẹ̀dẹ, "Ubyi mẹ wa vu ge pyili ni ge likye ka banị́ Isẹlẹyila, ni alama mẹ agẹ̀ tẹ̀. ³⁵ Gasengeli a zwi ganyinẹ́ ka iye ya banị́, gi wa tse ba gasẹ." ³⁶ Anabiya Anna dẹ nmọ. Uvu ubyi unyineni ya Ufaniya, nu gukyé ka Asaru. Ukpunuku be, udẹ nu ubana ana nẹ iye tọva, ³⁷ Uvu unị́bu iye ubo kẹlẹ tọta ni inọ nẹ. Wa nabo guza ka aduwa la, wa sa'a vini agi Usigapa ni limẹ gamọ nẹ, ni aduwa nẹ, uzụ ni utu nẹ. ³⁸ Nnẹyẹ, u be uwa gode Usigapa. Ugẹ̀ lika kọ ubyi yẹ gi gọngọ mẹ'ẹ uwa pụ lina kọ Uruselima tẹ̀. ³⁹ Kẹ ba mẹ ibe imẹ nba mẹ tẹ̀, bye tẹ̀, kụ ibe izizi ya Ada-Unikpụkpụ aye tẹ̀, nbe kolegi gẹẹ Ugalili, ile yaba, Unazarat. ⁴⁰ Ubyi yẹ kyé ni ntsi nẹ, kyé ni gakpụ, aniheli wọ Usigapa yi na'anẹ. ⁴¹ Banị́ mẹ nba mọ́ tẹ̀, ba gẹẹ Uruselima, gapya kọ getsesa. ⁴² Kụ Uyesu vu iye ubo nẹ iva tẹ̀, nba gini gẹẹ gapya gamẹ. ⁴³ Be le gbogbo izụ ya gapya ni bye, nbe kolegi agẹẹ gami. Nde ubyi Uyesu gyengye ana nu Uruselima, banị́ mẹ nba mọ́ tẹ̀, a kpụ la. ⁴⁴ Ba mẹ gẹ̀dẹ udẹ ni banị́ mẹ nba dẹ nnẹ tẹ̀ nẹ, nba zutuzu uzụ udẹ̀. Ngene nba dẹ yapụ yana ni banị́kọ yaba ni belólò yaba nẹ, ⁴⁵ Kẹ ba pa'a la tẹ̀, nbe kolegi gẹẹ Uruselima, nba dẹ yapụ yana nmọ. ⁴⁶ Uzụ utita nba pa'a nu guza ka aduwa, udẹndẹ ni gakigaki ka bamali, a wu ba, uwe'e byi ba ligẹ. ⁴⁷ Gbyi banị́ mẹ nbe wu'a tẹ̀, uvu ba lika ka anyini ni gakpụ kana, ni gawụlụ kana nẹ́. ⁴⁸ Kẹ ba pa'a tẹ̀, lika gụyẹ mọ ba. Nma ana gẹ̀dẹ, "Ngyẹ nnyẹ'a mẹ tẹ̀? Pa, Ada nyẹ nimi nẹ́ aye'e." ⁴⁹ Ugẹ̀ ba gẹ̀dẹ, "Ngyẹ nnyinẹ̀ ayemi? Nyinẹ̀ akpụ gẹ̀dẹ ma'a dẹ ni gami ka Ada mi na?" ⁵⁰ Nde ba wa gaba ka aka ye la. ⁵¹ Ngene ukolegi gẹẹ gami Unazarat niba nẹ́, uwa fulu'aba ba. Nma ana ni lika gụyẹ zi ni iye ana. ⁵² Uyesu we'e sa'a kyé ni gakpụ nẹ́, ni guwupa nẹ́, gawuye kana nu Usigapa ni baniyapụ nẹ́, ape tẹ́ pepe.