¹ Banị́ ni gedu nẹ, mẹ giba gẹ̀ ibe imẹ iyi tẹ̀, imẹ igozi yi kaba ni ginyẹ keyi te.̣̀ ² kẹ a nabo ya giyi tẹ̀, umẹ ni ngbọgbọ ẹ pa ni yapụ nẹ, ni unị́ gatimẹ ka gitẹ né nẹ. ³ Nimi, kẹn pa, ngbọpọ tsim tẹ̀, nbyi ligẹ ibe imẹ iyi ni ngbọgbọ tẹ̀, uyi tii, gima ka ya gyẹ gyẹ gyẹ, unị́ uyaba, Utiyofilus. ⁴ Uyi tẹ́, gẹ̀dẹ nyẹ'a kpụ lika ka ukụkwasi nu lutu ka ibe imẹ a tsene tẹ̀. ⁵ Ni ginyẹ ka utu ya Uhiludus, Ugọmọ ya Uyahudiya, anya Ufilisiti Unị́ liyẹ ka Uzakaliya, nu kanakana ya Abija. Unyine yana fu ni ginyẹ ka bebyi benyine ya idẹngi yọ Uharuna, liyẹ kana uvu Alisebetu. ⁶ Gbyi gbyi yaba vu banị́'a alimaki, ni gegu ka Usigapa, ba fulu'aba ibe izizi ya Ada-Unị́kpụkpụ. ⁷ Nde ba nya ubyi la, gẹ̀dẹ Alisebetu a mọ́ ubyi la, utu yẹ ba kụ nuluku tsim be. ⁸ Utu umẹ Uzakariya dẹ nu gami ka Usigapa tẹ̀, wa mẹ gatimẹ kana ya Ufirisiti yọ ibe izizi ya gatimẹ kana. ⁹ Kụ alada ya Ufirisiti ge fune, gi wa mẹ gatimẹ tẹ̀, a fune'a nu ukuliya getse, gi wa zwi gami ka Ada Unị́kpụkpụ gi wa'a du utulale. ¹⁰ Gbyi gedu ka banị́ a mẹ'a aduwa kụ'a du utulale tẹ̀. ¹¹ Utu yẹ, Umaleka ya Ada-Unị́kpụkpụ fuba, ugyengye nu gubo ulili ka ukpakili ya utulale ga du. ¹² Uzakariya zene, kụ'u pa'a tẹ̀, nzẹzẹ mọ'a. ¹³ Nde Umaleka gẹ̀'a gẹ̀dẹ, "Ga mọ nzẹzẹ la, Uzakariya, gebo gẹ̀dẹ a wu aduwa yẹnyẹ. Unyine ̣nyẹ Alisebetu, wa mọ́ ubyi a gi'ẹ. Nyẹ'a vala liyẹ kana gẹ̀dẹ Uyahaya. ¹⁴ Nyẹ'a mẹ nmọ'ana ni liyesi nẹ, gedu ba mẹ nmọ'ana ni gamọ́ kana nẹ. ¹⁵ Gẹ̀dẹ wa'a vu unị́kpụkpụ. We'e wu uzọ ya inabi la, ko ibe imẹ iya mẹnẹ banị́ tẹ̀ la, gẹ̀dẹ ulele ni gumunu utsa nẹ, ni ginyẹ ka nma ana. ¹⁶ Gẹ̀dẹ Isẹlẹyila ni gedu nẹ, be'e gii a be nu Ada-Unị́kpụkpụ Usigapa. ¹⁷ Wa'a zutuzu nu gegu ka Ada-Unị́kpụkpụ, ni ntsi ya gumunu ka Iliya nẹ. Wa'a mẹ gi wa gine iye ya Ada nẹ, a gi bebyi ya ba, gebo ka banị́ imẹ nba fulu'aba lika la tẹ̀, ba zutuzu nu utuwezi umẹ ugọ ginẹ tẹ̀. gebo gẹ̀dė, wa'a gini banị́, a zi Ada-Unị́kpụkpụ, umẹ ani gini zi gebo kana tẹ̀." ¹⁸ Uzakariya gẹ̀ Umaleka, gẹ̀dẹ, "Ma'a kpụ tẹ̀, gune kpụ? Pa nni nuluku, unyine yami iye yana ledu." ¹⁹ Umaleka wulu'a gẹ̀dẹ, "Nimi nvu Ujibili, umẹ nme'e gyengye nu gezugẹ ka Usigapa tẹ̀, a né mi gẹ̀dẹ, ma gẹ̀'ẹ lika usesele mẹ ²⁰ Pa, nyẹ'a vu utsiganu, nyẹ'a gẹ̀ lika la, gbogbo gi lika gụyẹ ayi. Wa'a yi tẹ́, gẹ̀dẹ, nyẹ'a wụlụ ni lika gụyẹ nẹ la, umẹ uwa ba yi nu utu yẹnẹ tẹ̀ la. ²¹ Kẹ banị́'a pụ Uzakariya ni gasẹ tẹ̀. Lika dama ba, umẹ usu utu nu gami ka aduwa tẹ̀. ²² Nde kụ fu tẹ̀, wa gẹ̀ lika nula. Nba kpụ gẹ̀dẹ, upa ulakulu utu umẹ udẹ nu gami ka aduwa tẹ̀. Wa gẹ̀ lika ni ibo nẹ, wa gẹ̀ lika nula. ²³ Kụ izụ ya gatimẹ kana bye tẹ̀, u'u gẹẹ gami kana. ²⁴ Ni igi ya izụ yẹ unyine yana Alisebetu su liyẹ. Uwo iwụ yana ipyi'a iva. U gẹ̀dẹ, ²⁵ umẹ Usigapa mẹ gimi, gẹ̀dẹ, we'e su, azi a kimi, ni yapụ ya gedu." ²⁶ Ni ginyẹ kọ upya wa tsẹyi, a né umaleka Ujibili nu weze Usigapa gẹnẹ ile ya Ugalili wa Unazalati, ²⁷ gẹnẹ vo unyinezu umẹ a gi unị́ dẹ̀ gevo, unị̀ liyẹ ka Uyusufu. Uvu udengi ya Udawuda, a vala liyẹ kana gẹ̀dẹ Umariyamu. ²⁸ Ube weze ana, ugẹ̀dẹ, "A li'ẹ atsu, nnyẹmẹ nnyẹ'a nya gawuye tsiṃ̀! Ada-Unị́kpụkpụ dẹ nẹnẹ. ²⁹ Aka yẹ mọ'a tsim, unyinẹ, ugẹ̀dẹ, atsu nko no uyi tẹ̀. ³⁰ Umaleka gẹ̀'a gẹ̀dẹ, "Ga mọ nzẹzẹ la, Umariyamu, gẹ̀dẹ nyẹ'ẹ wa gawuye nu weze'e Usigapa. ³¹ Pa, Nyẹ'a nya liyẹ, nyẹ'a mọ́ ubyi. Nyẹ'a vala'a liyẹ gẹ̀dẹ, 'Uyesu'. ³² Wa vu Unị́ ya alimaki, avala'a gẹ̀dẹ Ubyi yọ Usigapa Unị́-Uyaba. Ada-Unị́kpụkpụ Usigapa a gi'a litsẹ ka ada ana Udawuda. ³³ We'e vo litsẹ ka gbyi gami ka Uyakubu gbogbo agẹẹ. litsẹ kana anya gebye la." ³⁴ Umariyamu gẹ̀ Umaleka gẹ̀dẹ, "Umẹ, wa yi gụnẹ yi, kẹ me zi nu ulólò udẹ̀ udẹ̀ nẹ la mẹ tẹ̀?" ³⁵ Umaleka wụlụ'a gẹ̀dẹ, "Gumunu utsa wa zwi'ẹ, ntsi ya Unị́ umẹ upe tẹ̀, we be weze nyẹ. Unị́-tsa umẹ amọ́ tẹ̀, avala'a gẹ̀dẹ, Ubyi yọ Usigapa. ³⁶ Pa, unị́kọ nyẹ Alisebetu, su liyẹ nuluku kana be. Upyi'a wa tsẹyi ana tẹ̀, na mẹ uwa nya limọ́ la tẹ̀. ³⁷ Gẹ̀dẹ, gyẹngyẹ anu Usigapa iwụ la." ³⁸ Umariyamu gẹ̀dẹ, "Pa, nvu gufe kọ Usigapa. Wasa yi kẹ ané gitẹ tẹ̀." Umaleka gii. ³⁹ Umariyamu likyé bilibili nu izụ yẹ nẹ, ugẹẹ ile ya agụ, ile ya Uyahudiya. ⁴⁰ Uzwi gami ka Uzakariya, uli Alisebetu atsu. ⁴¹ Kụ Alisebetu wu atsu ya Umariyamu tẹ̀, ubyi ni ginyẹ kana, mẹ nsẹ̀, Alisebetu lele nu gumunu utsa nẹ. ⁴² Ugẹ̀ lika gbo gẹ̀dẹ, "Nyẹ'a vu unị́ anibalika ni ginyẹ ka benyine, anibalika vu limọ́ kẹnyẹ. ⁴³ Ngyẹ, nma ya Ada-Unị́kpụkpụ be weza ami? ⁴⁴ Pa, kẹ gụlẹ ka atsu yẹnyẹ zwi gutakpụ kami tẹ̀, ubyi ya ginyẹ kami, mẹ nsẹ̀ ya nmọ'ana. ⁴⁵ Anibalika vu wọ unị́ mẹ uwụlụ gẹ̀dẹ, ube mẹ agẹ̀'ẹ tẹ̀, wayi, nu Usigapa tẹ̀." ⁴⁶ Umariyamu gẹ̀dẹ, "Iye yami yaba Ada-Unị́kpụkpụ, ⁴⁷ gumunu kami, mẹ nmọ'ana nu Usigapa umẹ usẹ mi tẹ̀. ⁴⁸ Gẹ̀dẹ, upa gasafu ka gufe unyineni kana la. Pa, kyékyémẹ agẹẹ, banị́ avala ami gẹ̀dẹ, unị́ anibalika. ⁴⁹ Na mẹ'ẹ uyi mọ'a tẹ̀, mẹ lika ka alimaki gimi, liyẹ kana yi tsa. ⁵⁰ Gunugba kana yi gbogbo agẹẹ, nu lutu ka banị́ imẹ nba fulu'aba tẹ̀. ⁵¹ U mẹ ntsi nu gubo yana nẹ, ugbasa banị́ imẹ nba nya akanikpụkpụ ni iye yaba tẹ̀. ⁵² Usine bebyi ya tigọmọ ki litsẹ kaba. Ulikyéne banị́ mẹ nbe gofu la tẹ̀. ⁵³ Ugi banị́ limẹ ukosi usesele, banị́ gibe uguba gẹnẹ gudu-gudu. ⁵⁴ Udẹ Isẹlẹyila ibo, umẹ uwa mẹ gatimẹ agi'a tẹ̀. gima tẹ́, gima tsini gamọ̀ kami, ⁵⁵ Nkomẹ'ẹ ugẹ̀ Ada weyi Ibilayi ni idengi yana nẹ gbogbo agẹẹ tẹ̀." ⁵⁶ Umariyamu dẹ nu Alisebetu nẹ, upyi'a ita, ukolegi gẹẹ gami kana. ⁵⁷ Utu be, umẹ'ẹ Alisebetu amọ́ ubyi yana tẹ̀, umọ́ ubyi ulólòni. ⁵⁸ Banị́ mẹ nba tsutsu na'anẹ tẹ̀, ni banị́kọ yana nẹ, wu'u gunugba unikpụkpụki gụmẹ, Ada-Unị́kpụkpụ mẹ gi'a tẹ̀, mẹ nmọ'ana na'anẹ. ⁵⁹ Uzụ ya utọta, nbe be gepotsi kọ ubyi gatsì. Ba gima'a vala'a gẹ̀dẹ, "Uzakariya," liyẹ ka ada ana. ⁶⁰ Nma ana wụlụ ba, gẹ̀dẹ, "A'a. Avala'a gẹ̀dẹ, Uyohana." ⁶¹ Nba gẹ̀'a gẹ̀dẹ, "Anya unị́ mẹ'ẹ, uli liyẹ nkomẹ ni banị́kọ yẹnyẹ tẹ̀ la." ⁶² Ba mẹ ni gubo nẹ, gi'a ada ana, kụ wa'a vala'a liyẹ kana tẹ̀. ⁶³ Ada byi ligẹ ka ube ukaka ibe, uka gẹ̀dẹ, "Liyẹ kana vu Uyohana." Nlika gụyẹ dama ba. ⁶⁴ Nnẹyẹ, nganu kana pyi'a, ngakulẹ kana agẹ̀ lika. Ugẹ̀ lika, uyaba Usigapa. ⁶⁵ Nzẹzẹ mọ banị́ imẹ nbe le mọ tẹ̀. Gbyi lika gụmẹ zagọ tịzẹ ka agu ya Uyahudiya. ⁶⁶ Gbyi banị́ mẹ nbe wu tẹ̀, na'a zi ni iye, gẹ̀dẹ, "Ubyi yẹ aba yi gụnẹ yi?" Gẹ̀dẹ gubo ka Ada-Unị́kpụkpụ yi na'anẹ. ⁶⁷ Ada ana Uzakariya, Gumunu-Tsa dẹ na'anẹ, umẹ anabici gẹ̀dẹ, ⁶⁸ "Uyaba vu ya Ada-Unị́kpụkpụ, Usigapa ya Isẹlẹyila, gẹ̀dẹ, u be gi wa dẹ yi ibo, gi wa mẹ gatimẹ ka banị́ ga sẹẹ. ⁶⁹ Ugone utụ́tụ́ ya lina giyi, nu gami kọ ubyi ya gatimẹ, Udawuda, ⁷⁰ kụ gẹ̀ ni ganu ka Anabi-Tsa ya ikiyekiye tẹ̀. ⁷¹ We'e bene lina nu banị́ ibibi yeyi, nu banị́ imẹ nba pa yi ni yapụ nẹ la tẹ̀. ⁷² Wa'a mẹ tẹ̀, gi wa pa gunugba ka Adanẹ yeyi, gi wa tẹ́ ugu'uliba Tsa kana, ⁷³ nu ganu gụmẹ u mẹ'ẹ nu ibilayi ada yi tẹ̀ nẹ. ⁷⁴ Ugu'uliba gẹ̀dẹ, na'a fune yi ni ibo ya banị́ ibibi, na'a sẹẹ ba ni nzẹzẹ nẹ la, ⁷⁵ nu gayi Tsa nẹ, ni gayi pilili nẹ, nu gegu kana, gbogbo agẹẹ. ⁷⁶ I, nyẹ, ubyi, avala'ẹ gẹ̀dẹ, anabi unị́kpụkpụki, gẹ̀dẹ nyẹ gẹẹ nu upisika ya Ada-Unị́kpụkpụ, nnyẹ'a gini ituwezi, gi wa gini banị́ zi gebe kana, ⁷⁷ gi wa gi banị́ gakpụ ka lina kana, ni gamọ̀ ka aka ibibi nẹ. ⁷⁸ Umẹ wayi gebo ka gunugba kọ Usigapa, gebo ka uzụsa umẹ uwa dẹ yi ibo tẹ̀, ⁷⁹ gi nnẹ̀ki a kụwa, nu banị́ mẹ nba dẹ̀ndẹ nu gubi tẹ̀, ni gumunu ka getsi tẹ̀ nẹ. Wa'a mẹ, gi wa'a vo yi ni nnẹda, ni ginyẹ ka liyesi." ⁸⁰ Ubyi kyé, unya ntsi nu gumunu, udẹ nu unọda gbogbo utu wa gebe kana Isẹlẹyila mẹ.