¹ Nu utu dé nẹ, Uyesu a mẹẹ aduwa ni nné dé, Utsagbani yana dé, u gé gédẹ, "Ada unịkpụkpụ, tsini yi ké ya mẹẹ aduwa té nko mẹ'ẹ Uyahaya tsini Batsagba yana té." ² Uyesu gé ba gédẹ, nde nnyinẹ'a mẹẹ aduwa nyine'a gédẹ, "Ada liyẹ kẹnyẹ yi tsa, litsẹ a be. ³ Giyi ibe ilili ya gayapuku gayapụku. ⁴ Mọ yi aka ibibi yeyi, kanko mẹ'ẹ iya mọ banị mẹ'ẹ yi aka ibibi tẹ. Ga zwi nẹ yi aka ibibi la." ⁵ Uyesu gé ba, "Ngọ yẹnẹ uwa nya ulolo, gi wa gẹẹ uwoza na nu utinẹ, giwa gé'a gédẹ, ulóló, mọ mi iburodi ita, ⁶ gédẹ kụ ulóló sibe nu uturezi té nya nya gyẹngyẹ a gi' a la." ⁷ Ngene ulóló yé, a gédẹ, nimi ni bebyi yami ne kụzi keyi be. Gebo guyẹ té, me likyé gima gi'e uburodi la. ⁸ We likyé a gi'a uburodi la, nnya mọ azi la, nnya sa lu ukpaki, ba gaa nabo, we likyé giwa gi'e iburodi imẹ'ẹ nnye ye té. ⁹ N gini gé nẹ gédẹ, byi, a gi'ẹnẹ; ye, nya wa, lu ukpaki, a gi'a. ¹⁰ Unị me ubyi té, wagu, unị me ye té, wawa, unị uhi ukpaki té, a gu'a a giă. ¹¹ Ada no nginye kẹnẹ, ubyi yana a byi'a ligbe tu,gi we su gụwa a gi'a, ko we'a byi'e uburodi gi nyẹ su ukụ a gi'a? ¹² Ko ubyi ligẹ ka lize, nya gi'a gani? ¹³ Gebo gụyẹ té, nyinẹ banị ukikpa, kpu ibe isesele ga gi bebyi yẹnẹ, bele teni Ada nẹ, wa nki, wa gi gumunu utsa, a gi banị me nbe byi'a té kili?" ¹⁴ Kyekye mẹ, Uyesu a fune alizini utsi-ganu. Alizini mẹ fu ki'a, utsi ganu mẹ gé lika, nlika guyẹ dama gedu gumẹ. ¹⁵ Banị idika mọ'apa, gédẹ, "Ni ntsi ya ubazabuba ugọmọ ya alizini, u wa fune alizini na'anẹ." ¹⁶ Banị idika mọ'apa, gédẹ wa mẹẹ ba lika ka anyini umẹ ufu ni nki té. ¹⁷ Uyesu kpụ iye yaba, ugé ba gédẹ, "Litsẹ gumẹ uni tsi- iva, wa sọ, gami gumẹ uni tsi-iva we pyili. ¹⁸ Usetan uni tsi-iva ni iwụ yana nẹ, we gyengye gunẹ gyengye? Nginẹ gédẹ me fune Alizini ni ubazabuba nẹ. ¹⁹ Nfune alizini ni ubazabuba nẹ, banị mẹ nba ba'ẹ nẹ té, be fune'a ba ni ngyẹ nẹ? Gebo ka gayi té, niba nba za'ẹ nẹ iwa. ²⁰ Nde nfune alizini ni gunebi kọ Usigapa nẹ nté litsẹ ko Usigapa be woze nẹ té. ²¹ Unị mé'ẹ unya ntsi tẹ wa pa gami kana, ibe ya ni na, ²² uvu mẹ'ẹ unị dé nya ntsi pa'a, we'e pe'a affu té, unị mẹ'ẹ upe'a té, wa gu'a ibe giwa, giwa kụ'a ibe ya gami kana. ²³ Unị mẹ'ẹ uwa dẹ nimi nẹ la, wavu wami la, unị mẹ'ẹ uwa tagọ nim nẹ la, wa gbasa-gbasa. ²⁴ Gumunu ubibi ufu ki unị, wa gẹẹ uneze, uwe ye nné ye nné ga wa la, u gédẹ, 'Me'e kolegi me be gami kami ukpụkpụ.' ²⁵ Ube upa gami guyẹ gudu-gudu ba gyẹngyẹ. ²⁶ Wa gẹẹ giwa ga ye gumunu ibibi tọva a gbunu'a gi be be le mọ. G ebye ka unawa wa mọnyi ape ya ngbọgbọ." ²⁷ Kụ ugé aka mẹ té, unyine dé ukyéne gule ni gedu gédẹ, "Anibalika vu unyine umẹ'ẹ u mó té, ni libatụ gumẹ nnyẹ wu ténẹ." ²⁸ Nde ugédẹ, "Umali, anibalika vu unị mẹ'ẹ uwu lika kọ Usigapa, uwa mẹẹ'a té." ²⁹ Kẹ gedu abe ape té té, Uyesu a gédẹ "Gasẹ ka kyekyemẹ, vu gasẹ ubibi. We ye aka ya anyini, nde yo uzona. ³⁰ Kẹ uzona vu anyini gi uneneba té, té ubyi ya uni wa vu anyini a gi gasẹ ka kyekyemẹ. ³¹ Usonya ya gada we likyew iwa gaza ni ni banị gasẹ ka kyekyemẹ nẹ, gi we'e zo ba, gédẹ ube ni gebye ka gasẹ, gi wa wu giwa ka bi ya usulemanu, giwa pa unimẹ'e upe usulemanu nné mẹ. ³² Banị uneneva be'e gyengye iwa, ni banɩ ya gasẹ ka kyekyemẹ nẹ, be tuba nu uwazi yọ uzona, ba pa unị mẹ upe uzona tẹ. ³³ Anya unị mẹ'ẹ uwa ta uoyitila a sị ngada kọ ukaki, nde wa ba nu uzingili, gebo gédẹ unị mẹ'ẹ uzwi wa pa giwa. ³⁴ Iyapụ vu giwa ka gụwụpa. iyapu yẹnyẹ iyeliye, gụwụpa.kenyẹ wa yingubyi. ³⁵ Gebo guyẹ té, mẹ ankeli gi giwa kenyẹ a ga vu gubyi la. ³⁶ Gụwụpa kẹnyẹ uyi gyẹ, ngụna gudé ayi ngubyi la, gụwụpa kẹnyẹ wa kụkụ té kẹ giwa ka nki té." ³⁷ Ku gẹ lika bye té, ufarasi gé'a gédẹ wa ga li ibe ni gami kana, Uyesu zwi udẹndẹ. ³⁸ Lika dama ufarasi yẹ, gédẹ Uyesu a su ibo tse uli ibe la. ³⁹ Nde Ada unị kpụkpụ gédẹ, nyinẹ ifarasi a pyi igii ya ukupi ni gupye nẹ, nde ginye kẹnẹ vu aka itsuku. ⁴⁰ Nyinẹ a kpa aka la, unị mẹ umẹ gasẹ té, ume ginyẹ na? ⁴¹ Gi uni litolotsi ibe ya ginyẹ, gi nyine a yi tsa. ⁴² Aliwade nẹ ifarasi, nyinẹ a gi uzaka ni ibe ikiki nẹ, nde nyinẹ a gi uzaka ni lika usele, ni liye ba kọ Usigapa nabo. Nyẹ'a baliyeba kọ Usigapa na aka isele nẹ, nde nabo aka ikiki. ⁴³ Aliwade nẹ ifarasi, nyine ye atsụ wọ ugede-gede ni ganu ka gigye nẹ, ni ga dẹndẹ ni gẹzuge ka guza ka adwwa. ⁴⁴ Aliwade nẹ, gédẹ nyinẹ yi gayi ka bekune, umẹ a kpụ unawa la té. ⁴⁵ Udé ni ginye ka bamali ya ibe izizi gédẹ, "Umali, nyẹ'a kyẹ yi toto." ⁴⁶ Uyesu gédẹ, "Aliwade nẹ, banali ya ibe izizi! Nyinẹ kyé lika ununu iwụ ba banị, gibe'e vo, nde nyine a ma'a la. ⁴⁷ nẹ, nyinẹ mé bekune gi anabinẹ, nde ikaka yẹnẹ mba wụ ba. ⁴⁸ Nyinẹ fu useda gédẹ, ikaka yẹnẹ wụ ba, mmba mé bekune kaba. ⁴⁹ Ni gayi tẹ, giwa ga bi kọ Usigapa gédẹ "Me'e né anbị ni batsagba nẹ, gi ba gi ẹnẹ liyé a gini a wụ ne ." ⁵⁰ Banị ya gase ka kyekyemẹ, a byi ligẹ ka beyũ kaba ni gubo kẹnẹ ni ga topo ka gasẹ. ⁵¹ Topọ ni beyii ka abila nu uzakaliya, ume nyine wu'a nu ugudu ya Usigapa té. Banị ya gasẹ ka kyekye mẹ a byi nẹ. ⁵² Aliwade nẹ, bamaliya ibe izizi ya Uyahuda, gebo gédẹ nyinẹ mẹ ube kpaki ya gakpụ sụ, nyinẹ'a zwi la, nyinẹ fu la, ni tatsi ganu kọ ukpaki." ⁵³ Tse gi Uyesu a nabo nnéyẹ, banị ibe gaka ni ifarasi nẹ mẹ gamitsi ni ibe ni gedu nẹ. ⁵⁴ Ba mẹ mẹ mẹ, gi ba mọ ni lika kana.