¹ Gazuge ka ifirist g'ẹdẹ "Aka me si yi te go? ² Ustiven g'ẹdẹ , ada ne ni baniko ne, nyine ewu mi: Ubilayi pa Usigapa tu me de ni tize ka Umesofotamiya te, tse gi wa ebe tize ka Uharan. ³ U ga'a g'ẹdẹ, nabo tizze ka nye si bani ya nye gi nya gee nnede ma'a gye te. ⁴ U nabo tize ka Ukaldiyawa u ge tize ka Uharani ada'ana ba tsi tse Usigapa bene'a nnnede nyinee le kyekye me te. ⁵ Usigapa e fulu tize ka ikube yana gi'a kpẹẹ be la. Nde u me anikoweli, si g'ẹdẹ Ubilayi anya ubyi be la g'ẹdẹ nneye waa vu ikube wa Ubilayi ni idangi yana ne. ⁶ Usigapa ge lika nane te, g'ẹdẹ idangi yana baa vu baniza ni tize ka bani de, bani ye ba egine ba-fe gi ba gi ba liye a bya. ⁷ Usigapa g'ẹde, nde banị me nba gine idangi enye ba-fe te, maa za ba iwa, gi ba fu aba vini a gimi ni nneme. ⁸ Usigapa gi Ubilayi anikowoli ya galo-gatsi, nyine wu Ubilayi mọ Isaku u tsia galo ni uzu wa tova ne; Isaku mọ Uyakubu, Uyakubu mọ Adakpu ya Islaila ne bone iva. ⁹ Gebo g'ẹdẹ banị a mee agu ya Uyusufu, nba zune'a gene Umasali, nde Usigapa de na'a ne. ¹⁰ U fune'a ni aka ibibi. U gigi nlika kana si Ufilawuna, Ugomo wa Umasali iye, U de'a Ugomina wa Umasali ni gyengye me ivu yana te ne. ¹¹ N lime zwi tize ka Umasali ni Ukaana ne, nyine nbanị me liye, gebo g'ẹdẹ ube ulili ayi la. ¹² Nde Uyaakubu ba wu g'ẹdẹ ibe-ilili yi ni Umasali ufune ada eyi ne gene nmo. ¹³ Ukele vuva me nba gee nmo te, Uyussufu tse iwu yana gase gi banikwo yana, u Gomo Ufiliuna gini ni ba kpu. ¹⁴ Uyusufu ne banikwo yana g'ẹdẹ ba ge Uyakubu, ada'ana g'ẹdẹ wa kwu banị yana ubo-ibo tova ni ito ne evo gi ba ebe Umasali. ¹⁵ Uyakubu kwu ibe ge Umasali, na si ada'eyi ne tsi nmo. ¹⁶ A ge pu ba ba nu Ushekemi, ni guge gume Ubilayi si ni iku ya azulufa ne ni bebyi ya Uhamo te ¹⁷ Utu wa anikowoli ba tsutsu, anikowoli me Usigapa me Ubilayi te, n banị ye mo n ba le idu ni Umasali. ¹⁸ Nyine u gomo udika me wa kpu Uyusufu la te gwu ti-gomo ¹⁹ Ugeniye Ugomo za banị yeyi, u pala ba, ugigi n ba mó bebyi ya ba ibo la, gi ba tysi. ²⁰ Tu me a mọ Umusa te; u da ga-pa ni gegu ka Usigapa, nyine wu libatu ipya ita ni gami ka ada ana. ²¹ Tu me anaa nabo ni gase te, ubyi wa Ufilauna su'a u kpaa, u gine'a ubyi ana. ²² Umusa wa gaba ka gyengye ya banị Umasali, ubi lika gage, u ggini bi gatume ga me ²³ Nde u ba ni nu iye wogba, u m'ẹ g'ẹdẹ ugwo g'ẹdẹ na aga pa beebyi ya Islaila. ²⁴ Umusa ba ke a lu ubi'aba de te, ude ibo zune tipi guye, u pata ubyi wa banị Umasali iye ²⁵ Umusa tse yapu ba g'ẹdẹ banị yana a kpu g'ẹdẹ Usigapa u wa de ba ibo t'ẹ gi wa de ba ibo, nde wa zu ba la ²⁶ Ga-yapu-ku kana, u ga tsi gwo babyi ya Islaila de nba mó tipi, u ge g'ẹdẹ pa de, nyine vu banikwo, ngye yi nnyina elu idika? ²⁷ Nde unume iwa móa te tsu Umusa, u gaa g'ẹdẹ ngwo u nee g'ẹdẹ nya ba tsi yi? ²⁸ Nya gini aye a wumi ku nya wu ubyi wa banị Umasali eli te go? ²⁹ Umusa ssi wu te, utsa aki gee tize ka Umidinawa ge gae bwo nmo, u mwo bebyi iva nneye. ³⁰ Iye wogba ba kyé; U pa Umaleka te kẹ giwa t'ẹ ni gutu ka Usinai ³¹ Tu me Umusa pa giwa guye te lika guye vu'a upipa (dadama); u tsu mo'a g'ẹdẹ na a paa, Usigapa gaa lika g'ẹdẹ ³² 'Ni mi nvu Usigapa wa adakpu yane, Usigapa wa Ubilayi si Isaku ni Uyakubu ne: iwu tsi Umusa tsitsi te wa nyine nneye nu la ³³ Usigapa gaa g'ẹdẹ 'fune adaba yenye g'ẹdẹ nneme nya gyengye te yi tsaa. ³⁴ N pa liye gume n banị yami a me ni Umasali te; Nwu ga-tsu kaba, gebo guye te nbe g'ẹdẹ ma fune ba; be gi mae nee gite ni Umasali! ³⁵ Umusa me nbanị gye'a te, nba gẹ̀dẹ ngwo u nee g'ẹdẹ nya ba tsi yi tipi? Na Usigapa ne'a gẹ̀dẹ wa bee vo banị gi wa efune banị́. Usigapa tse gubo ka umaleka me Umusa paa ni gutu te, u fune'a vo banị ye ³⁶ Umusa vo ba fune ki Umasali, ni igi ya anyini me u mo ni Umasali ni unoda ne wa iye wogba te ³⁷ Usi vu Umusa u ge banị́ Islaila gẹ̀dẹ, Usigapa efune anebi ni ginye kẹ ne, anebi kanko ami ³⁸ Unume ude niyi ne ni unoda ni umaleka me uge lika naane ni lugu ka Usinai. N uvu unume u de ni adakpu yeyi ne te, na ni uvu unume u gu lika sensele voyi te ³⁹ Nani uvu unime adakpu eyi ne ku-fene te; ba fune'a ki iye yaba, nba su ni iye yaba gẹ̀dẹ ni e kolegi a gẹ̀ Umasali ⁴⁰ Tu ye te ba gẹ̀ Aluna gẹ̀dẹ wa gbu itigbogbo a gi ni ba gi ba vo niba agene Umasali. gẹ̀dẹ ya kpu ubeme u wa me Umusa me ufune yi ki Umasali me te la. ⁴¹ Nyine nba kpu funẹ, nba bẹ̀nẹ̀ uhadaya vo'a, nba me nmwana gebo ka ubeme nba baa gbu ni ubo ya ba ne te. ⁴² Nde Usigapa tse ba gi gẹ̀dẹ ba vini agi ize ya nki, kẹ a si ka ni utakalada ya anebi ne te, Banị́. Islaila, nyine si tsi ine ito gimi tume nyine le ni unoda iye wogba te go? ⁴³ Nyine wulu ni gaki ka Umolek si ize ya itugbogbo lafemi, si ibe me nyine gbu gẹ̀dẹ a vini a giba te, gebo guye te maa gene ne gi nyine aga me li-fe ni Ubabila. ⁴⁴ Adakpu eyi ne vo ni guza ka aduwa ni unoda, kẹ Usigapa nne ba kẹ u ge ni Umusa ne gẹ̀dẹ wa maa konko me usi pate. ⁴⁵ U me uvu gụvụ gume adakpu eyi ne vo bene ni utu wa Ujoshua te. Lika gume yi tume nba zwi ni tize gume Usigapa gu banị́ ibibi ya adakpu eyi ne te. Usi yi kana te gbogbo ebe utu wa Udauda. ⁴⁶ Lika gu ye si Usigapa iye gebo gẹ̀dẹ wa mẹ nneme ame aduwa te ni nneye. ⁴⁷ Nde Usulemanu umẹ gami ka Usigapa. ⁴⁸ Nde ubeme uyi te uvu gẹ̀dẹ Usigapa ana de ni gami gume ga mẹ ni ibone te la kankó anebi si ge te ⁴⁹ Nki vu nni-ga-nde kami, tize vu nneme nnẹ ya mi esi te. Gami ukwo uno nnye a me a gi mi? Usigapa ge te. Ko nnono n maa zẹẹ? ⁵⁰ Ibo yami a me ibeye gbii na? ⁵¹ Nyine vu banị́ ikpakpaki, nyine nya iye ibibisa, nyine gini ewu lika la, nyine e gwo ulufu gwogwo zam, nyine a me ibeme adakpu ene si me te. ⁵² Anebi uno u adakpu ene edu'a la? Ba wu anebi me n ba tsi gi uni ga me tii gume ebe, nyine gini vu banị́ me ba tse'a gi te, n nyine gini wu'a. ⁵³ Nyine nyina si gwu lika ka Usigapa me Imaleku bene te, nde nyine a ba ya la. ⁵⁴ Batsagba ye wu te te, iye yaba zwe, nba si'a li gaǹu ni Istifanu ne ⁵⁵ Nde ulufu yi na'a ne tẹ, u nyinẹ nki u pa liye ka Usigapa, u pa Uyesu ni gubo-ulili ka Usigapa ⁵⁶ Istifanu gẹ̀dẹ "pa de, ma pa nki li, ubyi wa uniyapu u gyengye ni gubo galili ka Usigapa te. ⁵⁷ Nde banị́ uda uye su ligba, n ba tsi atakpu yaba, n ba se kulu'a gbii ⁵⁸ Nba kwukwo'a gene ngbazi nba tse iku taa, banị́ isenda fune ngye yaba le ni gegu kaa ugbadefe de me aa vala gẹ̀dẹ Usawulu te ⁵⁹ Tu me a e tse iku a taa te, usi e su ligba gẹ̀dẹ "Uyesu, gwu ulayi ami" ⁶⁰ U ku luso, u su ligba gẹ̀dẹ, "Usigapa, kẹ vo aka ibibi me ni lutu ka ba la." U si ba ge te, u zee bala.