¹ Utu mẹ mbanị bene ledu nu Uyesu gaba tẹ̀, Iyahudawa nẹ mẹ nbefu ni tịzẹ kọ Uhilina nẹ tẹ̀, nba za Iyahuda yọ Iseleyila iwa gẹ̀dẹ ani benyine ni babana yaba ni tsi tẹ̀, nabo zi ni ngi, nu lutu kẹ ibe ilili gazà. ² gba Ubonẹ iva yẹ, vẹlẹ iwụ yaba nba gẹ̀dẹ, wọ yeliye gẹ̀dẹ, lika kẹ ibe ilili, yẹ ẹbene tipyi, gi ani lika kọ Usigapa ana bola? ³ Nba gẹ̀dẹ a fune banị dẹ tọva ni ginyẹ kaba, banị mẹ ntuzu kaba yi nu utuwezi tẹ̀, bani mẹ nba nya gakpụ nu ulufu yọ Usigapa tẹ̀. Gi nba na za ibe ilili. ⁴ Niyi banị ikiki yana mẹyi aduwa, gi iya tsini banị lika kọ Usigapa. ⁵ Like guyẹ zwi gọngọ. Ngene nbe fune Isitifanu, umẹ unya ga kpụ kọ Usigapa tẹ̀, su ufilibu, su Birokoros su Unikanar, su Utima, su Ubarmina, su Unikolas, banị Atakiya umẹ ugine wụ yana Uyahuda tẹ̀. ⁶ Bana aduwa bene banị mẹ afune tẹ̀, gegu kạ batsabga, nba baba ibo, nba mẹ ba uduwa. ⁷ Nlika kọ Usigapa gẹẹ ni likpa nẹ, nbanị mẹ nba wụlụ nu lika kọ Usigapa nẹ tẹ̀ ledu nu Uluselima, ifilisiti ni gedu nẹ, wụlụ nu Usigapa nẹ. ⁸ Isitifanu nya ntsi ni aniheli, ni ntsi yọ Usigapa uwa mẹ banị aka itsitsi yapụ. ⁹ Nde banị dẹ̀ fu nu guza ka aduwa dẹ̀, umẹ avalaba gẹdẹ Iyatahu tẹ̀, banị Ukurami nẹ si Iskandali nẹ, si banị dẹ̀ ni tịzẹ ikilisiya si Asiya. Banị mẹ Ibamẹ gamitsi ni Isitifanu ne tẹ̀. ¹⁰ Nde ba bi ga mitsi gamẹ nu Isitifanu nẹ la. Gebo gẹ̀dẹ ulufu, ni ga kpụ kọ Usigapa nẹ yi nanẹ. ¹¹ Nba niyẹ gi banị dẹ̀ iku gẹ̀de, ba gẹ̀dẹ Isitifanu wa tsini ibe ibibisa, ko ni ibe izizi yo Umusa ne, si lika kọ Usigapa. ¹² Ngeneibe bene banị aka, si Isasayapụ, si banị ibe ga kà, nba dẹ Isitifinu ni gezugẹ, nba mọ'a gẹnẹ ni ituzugẹ. ¹³ Nbe bene banị iwa gefu ka amii nba gẹ̀, nba gẹ̀dẹ ni lutu kọ aduwa ni ibe izizi nẹda. ¹⁴ Nde iwù, uwa gẹ̀dẹ, uyosu wọ unazala wa sọ nnẹ̀ki, ugini gẹ̀dẹ, na'a gini ibemẹ Umusa ka giyi tẹ̀. ¹⁵ Banị mẹ nba lẹ ni ga gọ kọ udatẹ̀ si iyapụ yana iyi kanko yọ imalẹ̀ka.