¹ Ke, Ubitilus nu uyahaya ne a gẹ̀ lika ni bani nẹ te,̣ ifilistoci nu uganibo ko gami ka aduwa si usaduki nẹ, be woze aba. ² Iye yaba ni bisa gẹ̀bo gẹ̀de ̣Ubitilus ni Uyahaya nẹ atsini banị lika ka gelikye kọ Uyesu ni gitsi kana nẹ ³ A mọ ba, a de ba, nu ubulusuna, gbọgbọ Iyapụ kụ tuni kẹ uzu ni bye be. ⁴ Ndẹ banị gedu nẹ wụlụ lika kaba nẹ nbani mẹ nba wụlụ tẹ, vu ukuli itọ. ⁵ N gene ni gayapụ kụ nẹ igwole gaba ni itunubo ni bani̇ ibe gaka kaba nẹ, gwo lubo lubo nu uliselima. ⁶ Anasi ufilisti uni kpụkpụ de mọ dụ, si ukayafa si uyaḧaÿa si usikandali si idẹngi inukpụkpụ yọ ufilisti dẹmọ. ⁷ Ke ba ta gi gwọ ubilatus nu uyahaya ne tẹ, be byi ba gẹ̀dẹ ni ntsi ya ngyẹ, ko ni liyẹ ka ngyẹ nẹ nba mẹ aka mẹ tẹ. ⁸ Ubitilus yi ni ulufu usensẹlẹ nẹ u gẹ ba gẹ̀dẹ, nyinẹ igwole ni batinibo nẹ ⁹ Uvu niyi kye kye mẹ ibeyi lige gebo ko lika sele umẹ yamẹ uni lba tẹ, ni nyinẹ tse,u wa yi gele? ¹⁰ Nbeli gi nyine'a kpụ ubeme gbyi ẹnẹ ni banị Iseleyila nẹ, gẹ̀dẹ niliyẹ kọ Uyesu Alimasihu wo ubanazale amẹ nnyine kye'a gapa tẹ, amẹ Usigapa likye na'a n bekune tẹ, nlutukana ngynegye nmeme ni ntsi ne ngegu kẹnẹ. ¹¹ Uyesu Almasihu vu ukụ umẹ nyinẹ a banị aza gamẹ gye'a tẹ, ndẹ ana gine lutu ka guza. ¹² Liyẹ ka gọngọ ayi n gasẹ gumẹ, nginyẹ ka banị umẹ uwa gi ga na t́ẹ. ¹³ Keke mẹ tẹ, kẹ ba pa iyapụn nt́si yọ Ubitilu nu Uyahaya nẹ tẹ, nba kpụ tẹ, gẹ̀dẹ, niba vu banị gudu gudu, ba gyengyẹ gakpụ. N neyẹ n lika tsị ba yapụ nba kpụ tẹ, gẹ̀dẹ Ubitilus ni Uyahaya nẹ dẹ nu Uyesu ne du be. ¹⁴ Gebo gẹ̀dẹ ba pa unị mẹ uwa ga sa'a tẹ, gyengye ni ba nẹ nba nya gyẹngyẹ a ge n lutu kana la. ¹⁵ Nde kẹ ba gi batsagba ganu gẹ̀dẹ ba nabo nnẹ̀ gagwo tẹ, ba gẹ̀ lika iwụ iwụ yaba. ¹⁶ Ba gẹ̀dẹ ngyẹ nba mẹ banị mẹ nẹ? Gebo gẹ̀dẹ lika gumẹ nba mẹ tsi gapa nu Uliselima, banị kpụ, yamẹ gamts la. ¹⁷ Nde nga gẹ̀dẹ, lika guyẹ aka za gwo banị gala, nbeli gi ya gini ga gẹ ba gẹ̀dẹ, ba ka gẹ̀ gọngọ lika nliyẹ gumẹ gala. ¹⁸ Ba vala Ubitilus ni Uyahaya nẹ zunẹ, nba gẹ̀ ba gẹ̀dẹ ba gẹ̀ gyẹngyẹ a gi gọngọ ni nliyẹ kọ Uyesu kata gala. ¹⁹ Nde Ubitilus nu Uyahaya nẹ, gi ne ba gẹ̀dẹ, nde ugavu gẹ̀dẹ uyi ngegu kọ Usigapa ugwo gẹ̀dẹ a fulu aba ẹnẹ gi anabo a, nyine'a gẹ. ²⁰ Ya bi ga nabo ubeme ipa igini wu tẹ, la. ²¹ Kẹ ba gini gẹ̀ ba lika tẹ̀ nba nabo ba nba gẹẹ. Ba ma gyẹngyẹ n lutu ka ba la, gebo ka ga gẹ̀dẹ banị a yaba Usigapa gebo kọ ubemẹ uyi tẹ̀. ²² Nba nabo ba nba Unị mẹ uwa gasẹ mẹ tẹ, uni iye umogba be. ²³ Kẹ anabo Ubitilus nu Uyahaya nẹ tẹ, be nba nị yaba nba gẹ ba ubemẹ u ifilisti ni batinibo ne geba tẹ, ²⁴ Kẹ be wu té tẹ̀, be gone gụlẹ kaba ni ligba gbyi ana gẹ̀dẹ Usigapa, nyẹ nya mẹ ni gasẹ nẹ, ni uteku nẹ si ibe mẹ iyi nmo gbyi tẹ. ²⁵ Nya gẹ̀ lika ni ulufu tsa nẹ, nganu kọ ubyi a gatimẹ ke nyẹ, Ada Udauda, ngyẹ yi nle kiki amẹ ipisi, nba ni anyi nẹ gẹdẹ ibe ikiki vu itsuku? ²⁶ Nya gẹ̀dẹ igole ya gasẹ gumẹ be gwo nnẹ̀dẹ̀dẹ̀, gebo kọ Usigapa nu Alimasihu nẹ. ²⁷ Usi yitẹ̀, tsim, gẹ̀dẹ Uhilidus nu Ubuntus si banị ikiki ni banị Isẹlẹyila nẹ, be gwo gebo kọ Uyesu usensele unị gatimẹ, umẹ ugi litse tẹ̀. ²⁸ Lika gumẹ nya kye gẹ̀dẹ nya ma tẹ̀ ba gwo gẹ̀dẹ ni ba ma ezi. ²⁹ Kyekye mẹ tẹ, Ada Unikpụkpụ gigi ubyi'a gatimẹ a gẹ lika ba nzinzẹ. ³⁰ Tana gubo kana bene gi wa sẹẹ banị, gi banị pa, lika tsi tsi yapụ nliyẹ sele, kọ uni gatimẹ kyẹnyẹ Uyesu. ³¹ Kẹ nba mẹ aduwa bye tẹ̀, nnẹ̀mẹ nba gwo tẹ̀, nbe lele nu ulufu Usesele nẹ, nba gẹ̀ lika kọ Usigapa ni ntsi nẹ. ³² Banị ni gadunẹ mẹ nba wụlụ tẹ̀, wụlụ ni iye dodẹ nẹ gọngọ a gẹ̀dẹ ubemẹ nneyẹ nya tẹ, vu gana la, nde ivu idẹdẹ gbyi. ³³ Ba tsagba yẹ funi ntsi yaba ne, nba gẹ̀ lika ka gẹ̀ like kọ Uyesu Ada, ni aniheli Unikpụkpụ nẹ n lutu kaba gbyi. ³⁴ Gọngọ ayi ni gingẹ kaba mẹ uweye ubedẹ tẹ, la, gebo gẹ̀dẹ banị mẹ nba nya tịzẹ nu aza nẹ tẹ, zunẹ, nbe bene ikụ yẹ ibemẹ nba zunẹ tẹ, ³⁵ Nbe benẹ le mi gezuge ka utsagba ni, nba za ya gi gọngọ kẹ we ye ana tẹ̀ . ³⁶ Uyusufu ubalawi unị wọ ukubulusu, umẹ n batsagba avala gẹ̀dẹ ubalinaba tẹ̀, Umẹ uvu uni iye ga gi ntsi tẹ̀ ³⁷ U nya tịzẹ, u zunẹ ubene ikụ vo utsagba ni.