¹ Utu mẹ Ubitilusu nẹ ni Uyahaya nẹ le ni utimozi a gẹẹ guza ka aduwa ni uzu nẹ tẹ. ² Unị dẹ mẹẹ uvu gapata ni limọ́ kana tẹ, a na ẹ su'a a gẹnẹ a dẹndẹ ni nni gazwi ka aduwa, gi wa'a ba ikụ. ³ Uba pa ubitilusu ni uyahaya nẹ, n be ye a zwi guza ka aduwa tẹ, u bii ba liyẹ ka iku. ⁴ Ubitilusu nẹ ni Uyahaya nẹ si'a yapụ n ba gẹ'a gẹ̀dẹ pa yi. ⁵ N gapata guyẹ nyinẹ̀ baka gẹ̀dẹ, na'a wa ubedẹ̀ ni woza aba. ⁶ Nde Ubitilusu gẹ̀dẹ ma nya Uzinari ni Azulifa nẹ la, nde ubeme n nya te, maa gi'e. Likye a zutuzu ni liye ka Uyesu. ⁷ Ubitilus mo'a nigubo ulili, u likene'a, nyine nne si ibotowo yana si bana kukwa. ⁸ N gapata guye si tana, u likye gyengye usi topo tuzu. ⁹ Gwọngwọ paa ke wa zutuzu te, n ba yaba liye ka Usigapa. ¹⁰ Ba kpu gẹ̀dẹ uniye vu unime u gima aba ibe ni nni gazwi ka aduwa iye tẹ, lika guyẹ tsi ba yapu gebo ka ubeme u tu'a te. ¹¹ Kẹ usi ni ubitilus ne ni uyahaya ne mo te, bani tsa a ki ge ni nni ga ze ka Usulemanu, lika guye tsi ba ga pa. ¹² Ubitilus pa tẹ me tẹ, u gine ba gẹ̀dẹ nyine baní Islaila, nye i yi n lika ni ntsi enye yapu? Ngye i yi nyine ni iyapu si yi, ka gẹ̀dẹ i mo anyini me ni ntsi ye ne? ¹³ Usigapa wa Ibilayi, si Isaku, si Uyakubu, Usigapa wa Adakpu eyi ne, u gone ubi'a na Uyesu. Na uvu unume nyine gye'a, nyine tse'a gi ubilatus, u gima yẹ gẹ̀dẹ na a nabo'a. ¹⁴ Nyinẹ gye'a, nyine gẹ̀dẹ a nabo uni banị gawu. ¹⁵ Nyinẹ wu uni mẹ u wa sẹẹ banị tẹ, u me Usigapa likye ni bekune, ii vu banị isenda yana. ¹⁶ Kyekye mẹ ni Ubangasikiya nẹ ni liyẹ ka na ume nyinẹ a pa, nyinẹ gini kpu'a me te, bi tuzu ga zu ubangasikiya ni Uyesu, u gigi u wa ga sẹẹ ni yapu ya nne. ¹⁷ Bnị yami, n kpu gẹ̀dẹ nyinẹ me lika guye ni gubi, kẹ tizuge ya ẹnẹ si me te. ¹⁸ Nde gbyi ibemẹ Usigapa nyine ganu ka a nebi ne gẹ̀dẹ Uyesu waa me liye te, nili ¹⁹ Gebo guyẹ te, nyinẹ a nabo aka ibibi ga me, gi a nyinẹ ẹnẹ niya e fene. ²⁰ Gebo gẹ̀dẹ a ne Uyesu me a e fune te,a vo ẹnẹ. ²¹ Na uvu unume nki a gu'a te, tse gi utu wa nneki ga gini a nu, me Usigapa ge ni ganu ka yana te. ²² Umusa gẹ̀dẹ, Usigapa e fune anebi kanko ami ni ginyẹ ka ẹne ̣. Nyine e wu ibeme waa ge ẹnẹ te, gbii ²³ Waa vu gẹ̀dẹ unume waa wulu ni annebi u ye ne la,, aa fune'a a ki nni banị kiki. ²⁴ E, si gbií anebi ne e fu ni Usamula, si ine n ba be niigi yana te, ba gẹ lika ni lutu ka izi me. ²⁵ Nyinẹ nyina vu babyi ya anebi ne ni ya anikewọli me Usigapa me ni banị ikpụkpụ ya ẹnẹ te ne, kẹ u ge Ibilayi te, Anibalika ya gọngọ gbii ni gase gumẹ ya'e fu ni gupye ka nye. ²⁶ Tume Usigapa fune ufọ'a na te, u tọpọ ne'a ni woze ẹnẹ gẹ̀dẹ wa e funẹ ẹnẹ a ki aka ibibi ya na gi nyinẹ a wa anibalika.