¹ a me izi ito, Hananiya uli-lutu ka isiris, tizuge ide, ni unide me ukpu ibe izizi te ne, a a valaa gẹ̀ utalitulus ge nmo. Mza ubeme ugwo ba ni Ubulusu ne te gi ugomina. ² Tu me Ubulusu gyengye ni gegu ka ugomina te, utalitulus za gi ugomina gẹ̀dẹ, "Gebo ka nye te, i wa liyesi, ngyana ga nyine ka nye gini nneki ni tize ka yi. ³ Gebo guye te i wulu ni ibeme nya me te ne, ugomina Filikus. ⁴ Me'e ye gède ma mo'e ma de nneme la, ma ku'e toze gẹ̀dẹ nya zi gutakpu e wu mi kwe ⁵ Gebo gẹ̀dẹ itsi gwo unume uwa zo nne banị Iyahudawa gbii ni gase gume gẹ̀dẹ ba gbu-tipi. ⁶ U gime e ye gẹ̀dẹ na a me guza ka aduwa kyemwe-kyemwe gebo guye ii mo'a. ⁷ Nde ulisiya soza ba gu'a ni ntsi ne ki yi. ⁸ Nye be bi Ubulusu, nya gini e wu'ade ni lutu ka ibeme iza gye me te." ⁹ Gbii Iyahudawa gẹ̀dẹ ibeme a za Ubulusu iwa ni lutu ka niya me te si yi kaba te. ¹⁰ Ugomina ba gi Ubulusu ganu gẹ̀dẹ wa gẹ lika, Ubulusu gine a'na gẹ̀dẹ, "N kpu gẹ̀dẹ nya vu anikali ni nneme bya be, gebo guye te iye si mi gẹ̀dẹ ma'a gbagba ma za lika ma gi'e. ¹¹ Nyaa gbagba a kpu gẹ̀dẹ wa'e pe izi bone-iva me mbe aduwa ga me ni Uliselima te be la. ¹² Kẹ ba be tu mi ni guza ka aduwa te, ma me gamintsi ni gwongwo ne la, ma gini zuli gwongwo ko ni ile ko ni guza ka aduwa la. ¹³ Gebo guye te ba nya ubeme nba za mi iwa ni lutu kana te la. ¹⁴ Nde maa ge gẹ̀dẹ, kanko ubeme ba vala udalika te, nsi vini gi Usigapa wa adakpu ye yi ne te du n ba ibe me i vu izizi te si ibe me anebi ne kate pilili. ¹⁵ Kẹ banị me si wulu ni Usigapa ne te nsi wulu na'ane gẹ̀dẹ bani isele ni banị ibibi ne e like ni bekune. ¹⁶ Gebo guye te nni yapu fune gẹ̀dẹ ma me ubeme usi Usigapa, si banị yapu iye te. ¹⁷ Aba me iye gune-gune, nbe ibo ga de banị yami, n gini vo ba iku. ¹⁸ N de ni ginye ka ga me, nyine Iyahudawa de me n ba fu ni tize ka Asiya te be tu mi ni guza ka aduwa, avu ni gedu ne la, a gini vu gẹ̀dẹ ya gini ku uzaza dodela. ¹⁹ Ugwo gẹ̀dẹ bani mene ebe aba geubeme nme ba te kekeme, uvu ume n ba nya. ²⁰ Avu te la, ba ge lika ubibi gume n ba mo mi niya ne tu me tizuge ya Iyahudawa za mu iwa te. ²¹ Nde u ga vuni lutu ka ligba gu me n su tume n de ni gaki-gaki ka ba te, nte uvu ni lutu ka ga-like ni bekune ume ugigi 'ebene mi woze nye nyeme me te. ²² Ufilikus ni lika guye te, u tsu uzu gene, u gẹ̀dẹ tu me gezuge kẹ nẹ Ulisiyas ube be, ma'a kye iwa. ²³ U ge usoza ye gẹ̀dẹ wa mo Ubulusu gubo, nde wa gba ba-da ya na ni ba waa apa, uni me u nya ibo gi wa daa wa daa. ²⁴ A wa izi iva, Ufilikus ni uni guza kana ne udulsjila, uvu banị Uyahude, u filikus vala Ubulusu u bi'a lige ni lutu ka Uyesu . ²⁵ Nde kẹ Ubulusu bana lika ka ga-yi tsaa, iwu ga-mo-ibo, ni iwa me aba za banị te ne gi Ufilikus te, iwu tsi'a tsitsi u gẹ̀dẹ, "Ani'a ge tse. Nde n ba wa nneki, ma'a ne gite gi a vala'e. ²⁶ Ni utu udode iye, u tse yapu ba gẹ̀dẹ Ubulusu waa gi na iku, gebo guye te, u si'a nne gite e vo Ubulusu zam gi wa ge lika na ne. ²⁷ A wa iye iva Ubolikiya festas vu ugomina ke Uhilikus si ki nmo te, nde Ufilikus eye gẹ̀dẹ Iyahudawa a nyi ni na, u gẹ̀dẹ a nabo Ubulusu.